Bad Gyal Poochie

Chapter 12 Family Drama part 2

"Pat...Pat oye!" Mummy out a Sista Pat gate from when when a call har an not a answer. Kelly come out deh to. Marva tek up two big rock stone fi fling ina di house and Brandon wid him nuff self run an grab one outta har hand.

"Weh yah do wid dis yah?" Him a ask har an a skin teet.

Marva just tek di next one fling after him and dat bwoy run till him drop. Pat open di door an look like she did a sleep.

"Why you come a shake dung mi house?" She ask.

"Mi hear seh yuh ave some tingz fi we weh ina di barrel," Mummy say. Kelly stan up a di house side wid di ppl dem garden hose.

"Oh mi a come deh." Pat go inside an come back out shortly after wid likkle two scandal bag. She open di grill and give mummy one and give Marva the next bag. Kelly buss out a laugh and mi staat laugh to.

"So a dis alone we a get outta di how much how much barrel?" Marva ask har.

"Memba seh everybody else deh fi get enuh." Patt lean up pan di grill and hug har self. Mummy swing open di grill and poor Patt just tun ova near di likkle bush patch a di house side.

Everybody run in, wen me realize all a some family memba from out di road reach in to. No sah. Wen mi look barrel cova tek off an everybody staat grab. Kelly and Brandon a wrestle ova wah  bag a rice. No man. Mi just help mum gather up some tings and step aside before me get knock ova.

"Unu move mi ago call di police," Sista Patt run ina har room an a don't know who tell her fi do dat. But mi only know seh barrel staat roll out a di house an a Pick Up Van reverse ina the yaad. Laaawwwd. If I laugh I spoil.

"Heeeeyyy hey hey...driva wul on...mi a come....stop..stop deh..." Every so dats Patt say someting she trip pan har long Dusta Robe an get up back.

Bredda Bandy come out a di vehicle and staat cuss Sista Patt. "How you fi do dat Patt, hee? How you one must take three seal barrel a food and the man send dem fi him family weh out here. Nobody neva say you cant get nothing but use you conscience man. All dis time you have di barrel dem pack up in a you house and no tell a soul?" 

"Den mi no give who fi get wat already? Mek unu so ungrateful man?" Sista Patt step outside an hang on pan one a di barrel on the bottom step. "Unu likkle hungry belly Jamaican love fight over barrel too much. A so unu a suffer?" 

A who tell Sista Patt fi go seh dat deh Bredda Bandy and everybody staat mek up noise till crowd come.

"Sufferer? We you a call sufferer an ungrateful? Says the woman who share up not even one full barrel fi the entire family an keep 3 and a half fi har self." Bredda Bandy walk up to har and me no know if she think him did ago just tek up di two barrel cause my lady brace herself pan two.

"If somebody neva see when the barrel dem come a you yaad an tell we that mean to say you wouldn't give a soul a ting don't it? You woman, you!" Marva point pan her "You no good, and den you tek up place a di front a church pan Sunday day time." 

"Alrite Patt tek it, tek all a di barrel dem fi you self," Mummy say an kiss har teet and step out a di yaad. "Poochie bring yuh baxide yah gyal!" Mi staat walk behind mum wen bredda Bandy cuss a word deh.

"Tara you a mad sumbady enuh. Yuh mad till not even God cya fix you." Bredda Bandy shake him head after mum.

"So if she a gwan so ova the barrel no must she we uncle send dem to. A must she a could neva be fi we." Mum staat pan Bredda Bandy now. 

Him no pay her no mind an fling off di cova pan di barrel weh did pull already. Di man staat take out di rest a tings and hand out to who come. A so barrel must share is a pitty we neva realise seh Patt put on lock pan di next three barrel. Wen me look pan har the woman vex till she almost burst. Wen di barrel finally empty now Bredda Bandy roll it to di house side.

"Alrite Patt see it deh, you get three full barrel fi you self. Galang and go stock up yuh yaad cause you a gwan like a you a di real sufferer." Bredda Bandy tek up fi him likkle bag a tings and drive way. 

"Di rest a unu gwan back weh unu come from and no come back a mi yaad cause me no know weh unu still stand up here so fa. Move!" Sista Patt say. 

One heap a murmuring an everybody staat move back fi go a dem yaad. 

"Brandon come help me bring dem yah back ina di house," We hear she a shout.

"Wat a woman like dat Tara, you can believe dis?" Marva look ina har likkle bag look like she go a corner shop go buy two likkle item. 

"Marva mek we just tek dis and satisfy cause if a neva fi Bredda Bandy nuff somebody wouldnt even get rice grain." Mummy just a gwan like she calm but me see say she vex. 

"A true yah talk Tara but my God man." 

-------------
__________

By time mum dem done talk bout how di barrel share up and who fi get wat and neva get it a pure argument. Mum call Uncle an a cuss and him a cuss to say him neva know say a so Sista Patt did stingy. Him a talk bout a bag a tings say him must affi get back the tings but I sure a no Patt going give him nothing. Wen mi look pan di clock a bout afta eleven to twelve.

Riiiiinng

Riiinnng

"Heyyy bestfriend." Wait till a tell Jada bout dis..

"Poochie yuh know seh you a no good somebody though?" A weh Jada a talk bout? 

"Weh you mean by? Weh me do?" Me ask har.

"Why you go a police station go talk seh Ryan a beat me and mek dem come carry him gawn a station fah Poochie? Me an you a bestfriend enuh." Me hear Jada a cry cow bawling. 

"Jada weh you get dat from?" 

Pooop Pooop. She hand up ina me ears.