SO THIS IS THE LAST CHAPTER FOR NOW. I'LL BE WORKING ON MY OTHER BOOK AS I SAID BEFORE. TUNE IN TO JEALOUS OF CANDICE. COME GET THE DRAMA YOU REALLY LOVE. YOU KNOW YOU WANT TO LOL.
_________________________________________
"Poochie wake up an no let mi affi drag yuh dung a river." Mi hear mummy seh.
"A wah time?" Mi stretch from ova mi bed to di dresser an tek up mi phone. When mi look a 7:50.
Bwoy mi ago late fi school. Mi roll back ova ina mi bed an ready fi dose off when somebody come an a slap slap mi up wid wah belt.
"Ow ow alright alright. Mi a get up nung! Alrite ow ow!" When mi finally open mi two yeye dem good mummy stan up ova mi well look mad.
"Last term yuh cya report come yah wid 46 late. No more. No more late mi seh." Den she staat soak mi up wid lick again till mi affi fly outta di bed go ina bathroom.
"Blasted woman love ramp man." Wen mi a ketch wata fi bathe di light weh fi shine ina di bathroom block by somebody. Wen mi look roun a mummy. She wrap di belt roun har hand one more time.
"Mi hear like yuh seh someting likkle while a weh yuh seh?" Mum dead serious nung. Afta mi neva did a talk so loud.
"Mi no seh noting mi just seh mi ago bathe." She gimmie some yeye den move go ina kitchen.
"Ha haaa." Mark come a di door way well dress up fi school. "Mi gawn a school. Lata late bug." Him gimmie middle finga an go roun a room.
By mi done ready an eat mi slowly a walk go tek taxi an a 8:12. Mi hair not even comb it fava when wig roll up ina dirt like how Suzy own did look afta she get kick outta Faas Mavis yaad. Mummy just deh back a mi peepee cluck cluck wid di piece a belt. Just tru mi did tiad mi affi drag out di braid dem dis mawnin. Mi head tender no baxide. Not even comb mi couldn't comb out di knot dem.
"Yuh ready Poochie?" Mi see wah taxi tap a mi foot. Mi cya bada go ina Pack Man car ino but mi late. Mi go roun a back an look out di window.
Pack Man stop an tek up bout eight more pickney an three a we schoolaz did ina di car already.
"Yow mi cya tek di noise ino." Mi shout ova di loud music but mi doubt him or nobody a hear mi.
Teejay song Grimy a beat loud wid di base dats all mi front a vibrate wid mi batty jaw dem. An a mi alone roun a back nah wol nobody so mi kinda good. All of a sudden dis man a fan off di car like him mad. Pack Man stop a him foot tun off di tune an roll dung one a di front window.
"Yow yuh know seh mi full enuh daddy," Pack Man seh.
"Mi know man dats why mi a fan yuh dung. Di man dem deh dung di road enuh so deal wid yuh ting." Di man seh to him.
"Alright respect." Pack Man seh an roll up di window dem den speed off.
Wen we reach a likkle way him stop di car an tell dis girl an wah boy ina di front fi come out. Him come an open di back door a look like seh him no see no more cya wol roun yah. Police goin ketch we today.
"Alright watch yah. Poochie step out fi mi deh." Wah bwoy an wah girl step out den mi. "So you go pan di front." Him seh to dis girl weh gwan like she full a attitude.
"So weh mi a go mi nah tek no squeeze enuh. Mi no ina it..oh."
"Calm dung no Poochie man. How it come in like yuh wake up mad dis mawnin so." Pack Man a joke wid mi but mi nah laugh.
"She neva wake up mad, she eva a gwan mad an miserable," dis attitude gyal seh.
Mi roll mi yeye an not even bada ansa har cause di wheel weh mi dah wheel har out essi kmt. Wen everybody go in lef mi last, no space no di deh fi mi go. Dis bwoy sidung pan di left side alone nah wol nobody. Yuh fi see how him kotch, mi sure not even one a him batty jaw no reach ina di car good.
"Alright gwan in now," Pack Man seh.
Mi look pan him, look ina di car back, go look ina di car front an go back go look pan him. Everybody ina di car a laugh. "Ohh so a mi a drive? Alright den."
Mi walk go round a di driver seat an sidung an lock di car door. Mi staat up di vehicle but Jah know seh if mi touch noting else a crash mi a go crash wid everybody. Mi can't drive at all.
"Come on no Poochie man." Pack Man run come open di door.
"Weh mi fi go? Eeh? Mi tell you seh mi nah tek no squeeze."
"Yuh nah get no squeeze Poochie go sidung ina di genna lap roun deso." Mi look pan him an tek up mi bag. "Yuh no see seh di bredda ago cushion up yuh big bumpa." Him a grin wid mi.
Mi cut mi yeye an go open di car trunk. Everybody a cackle. "Unu shut unu mouth mi gi unu noting fi laugh bout?" Dem laugh same way but likkle softer.
"Bwoy mi no know a weh Tara get you from. Yuh too mad." Outta har front mi did ago seh but mi shut up. Pack Man lock dung di car trunk an staat up di car.
Mi well comfortable cause a clean cardboard mi sidung pan. Mi no ave a problem.
"None a unu try no faat ina dah car yah enuh. Else mi a fling out di wol a unu. No ramp wid mi cause no window no roun yah."
Likkle way dung di road mi hear di gyal pan di front. "Unu tap di noise see di police dem yah."
Same time Pack Man roll dung fi him an di girl front window an lef di back one dem. Wen mi look, a police jeep deh under wah Apple tree. Wen mi realize one a dem a di same police weh did a chat to mi wah day yah, Officer whateva him name. Pack Man mek sure slow dung an wah next car did infront a we so di police dem stop dat deh car.
Mi see di police a point after Pack Man an mi read him mouth. It look like him a seh "Watch it enuh yute."
Wen we pass an reach a school gate dem roll dung back di window dem. Mi dis a smile cause everybody uniform crush up an mi neat same way. All who did deh a school gate a gimmie weird look but mi just roll mi yeye an go in.
_________
-------------
Fi di wol day mi miserable. Mi back ansa wah teacher an get sen outta class. Di woman too annoying man. She a ask mi dis big ole question an mi seh mi no understand. She a tell mi seh mi nah sidung till mi seh di right ansa so guess what?...I did lay down on the desk. She get vex an a run mi out so a did ansa she.
Mi seh to har "you get paid fi teach mi, yuh no get paid fi mi tell you weh dem tell you fi teach mi." My woman send mi out but mi neva care.
Afta lunch mi cya find Ashley dem an mi no wah talk to nobody else so mi go ina class wid mi lunch. Dis girl well bax mi food outta mi han an ago walk weh. So mi call har back. Yuh know weh she ago tell me seh? Ago talk bout mi lucky a mi food dash weh cause a mi wol hair style wah dash weh. What a piece a brightness? Yes! Well big an brave to.
One piece a someting so guess wah? I did show har how mi dash weh tings. A grab on pan har head an fling har pan di board. She well charge afta mi but mi know how fi dodge yuh see mi? Mi wol on pan har han an staat beat har ina har back. She drop a grung an a bax bax mi up but mi no care. Di gyal gi mi a crap pan mi han swell up mi skin. Next ting security drag mi weh gawn a DOD (Dean of Discipline) office. One wol heap a tings gwan from dat.
Today did just crappy. Right now a drag mi a drag mi foot go dung a Jada yaad. Dem call mummy from wen an she a ring off mi phone but mi nah ansa. Mi no wah go upa yaad not even up a daddy dat worse. Mi cya face dem right now. Not ever.
YOU ARE READING
Bad Gyal Poochie
Teen FictionWRITTEN IN JAMAICAN PATIOS/PATWAH "Yow yow mic check 1..2..3...yes di mic good enough cuz mi want unu hear dis loud an clear. Dis yah story affi go be a well draff up package bout I bad gyal Poochie. My lifestyle no normal an no bady cyah tep ina my...
