Bad Gyal Poochie

Chapter 11: FAMILY DRAMA

I'M BACK WITH A NEW UPDATE SORRY FOR THE LONG WAIT BUT THESE ARE BUSY TIMES. THANKS FOR YOUR SUPPORT GUYS
_________________________________________

Slap

A get a rahtid box from mummy mi not even can open mi mouth else mi jaw bone drop out.

"Weh mi sen u go a school fi do? Eee? Mi sen u go a school fi fight?"

Mark heng on pan di belt mummy did ago use slap mi. "Mum Poochie nah do it again mum no lick her." Mark ready fi bawl nung.

"An look pan di time weh you a come in to afta 7 from wen school ova. Yuh no ansa phone?" Mum grab mi phone outta mi hand.

"Since you no ave no use fa mi we keep it. Galang go change." Mi pass go ina room an lock di door.

Di whole time mi just bathe, eat dinner and gotry fi  study mi vex till mi da buss. She a behave like she no know seh if a gyal throw fist mi nah go fling back to. Weh mi ago mek dem do beat mi? Kmt.

Every time mi think mi ago ave a good day it ruin. If mi say it out loud di day ruin. If mi think to much bout it, then di day ruin.
________
-----------
Mi ina mi deep sleep when mi hear one bagga galanging outta door. Sound like some wol heap a cussing an so. Mi look pan mi phone and realize seh a afta 9.

"Well mi nah bada go a school," mi seh but affi scrunch up mi yeye an mi nose an lack back mi mouth fast.

Mi fly off a di bed and go wash mi face an brush mi teeth an run go outta door in a mi big shirt an jaws same way. Di shirt kinda long tho.

"Go nyam shit gal! Yuh feel like because yuh go a Merica fi one year nung yuh betta dan everybody? Yuh no more dan mi cause mi sure mi a live betta life dan you." Mi hear Kelly mother shout afta wah somebody up a road.

"Chuck off a mi Marva a no mi mek yuh man cya lowe off a mi. Yuh no see how yuh big an sour dats why gyal affi a tek yuh man ina yuh bed." Wen mi realize a Suzy. She dash weh di foreign accent quick though.

"Yuh ugly like. Di two piece a suit weh look alright weh you wear no fool nobody. George mean from him out yah so, an nung him deh yah a di same ting." Marva staat laugh.

"A fi real enuh. George mean bad. Mi hear him son ask him fi $3000 fi put gas ina di car him seh no." Mum say. Look like Suzy vex an walk gone out a di lane. "Mi hear seh di car gas tank did almost empty an di man wait till it reach outta bridge fi pop dung pan him mi hear."

Mi walk go ina house an eat something only fi hear mummy pan di phone afta Marva gone.

"When?"
.....
"A lie yah tell."
......
"Afta mi neva know."
.......
"A weh di backside yah seh to mi?"
......
"No it nah go so. Dem deh four barrel deh come fi share fi di whole family. So how dem fi tek three fi dem self an share up one fi everybody else?"
......
"It cya work so. Him no seh a fi dem yaad di barrel dem fi go cause dem have space? Mi tell him enuh mi tell him."
......
"So wah an wah dem send gi you out a di barrel?"
.....
"Two Iris Spring soap an two toothpaste?"
....... ....
...  
...
"But dem could a wrenk. Yuh know wah put on yuh clothes we a go dung a dem people deh baxide yaad.
.....
"Mi no business if dem nah mek we go ina di house. If mi affi tear off di d*mn grill dem mi dweet an go in."
....
"Yes hurry up."

Mummy run go ina room an come back out wid two big Megamart shopping bag an wah other big cloth bag to. She slip on har crocs and step outta door.

"Poochie no mek nobody come in a di yaad mi soon come."

"Mum weh yah go mi a come?" A dung a Sista Patt yaad she a go but mi wah go to.

We uncle send four barrel fi di entire family a Patt yaad just cause him used to love har off an a mek excuse bout space. Him feel seh if a family member fi get di barrel dem an share it den problem ago staat. Di real problem him no know bout now a seh Sista Patt nah gi weh nothing much outta di barrel dem. Woman mean essi. She well ave dem dung a har yaad fi a whole two week an no tell nobody. All man will hear bout it when mummy dem reach dung deh.

"Mi seh tan in di yaad gyal! Mi soon cya some wol heap a tings come fi you an Mark. Tan deh deh." She run off out di lane.

Bout five minutes afta she gone mi lock up dis house an run out ina di hot sun fi go round a Patt yaad. Mi affi reach dung deh fi see wah ago gwan.

"Poochie weh yah go?" Mi look roun an see Michael a walk fast back a mi.

"No weh, gwan back up di road dis no concern you." Mi staat walk fast an him run come grab on pan mi hand.

"How yah gwan so. Look from when mi no see you." Brandon an Two Cola stan up a laugh an a look pan we.

"Lata mi come outta road yer?" Him let go offa mi han an kiss him teet.

"Galang bout yuh business man a so yuh gwan an style out man ting. Yuh tek mi fi ediat?" Michael walk off an mi run off fi go out a Patt.

Him damn lucky a dan mi. Mi know weh dat mean an him no ready fi dis.