Bad Gyal Poochie

Chapter:19 Fun Times

Night update today for you guys. I hope you all didn't think I was just gonna end the book at the last chapter lolll. It's too soon for that. Anyways Vote, comment and share. Thanks to ya. 

_______________________________________________________________________________

Two weeks until di end of summer an we a have di time a we life. A swear mi neva have so much fun yet. Even though mi take on summer job a di boutique, mi enjoy mi self on weekends, an mi really wah go back a school. Afta today, mi ago enjoy mi self because the boutique ago close fi one week fi do a likkle bit a renovation. All a we as friend wid family come together an decide seh we wah enjoy di last a di summer sun. So tomorrow, everybody a go a Suzette dat a Ashley mada house. Well technically is har husband first wife dead lef house, but as mi hear, it deh pan a hillside a Ochi an it nice bad. We ago have a likkle in house barbeque or wat eva di fancy name dem call it. 

"Poochie yuh no need fi bring no whole heap a clothes, is just a two night sleep ova." Mummy stand up a mi bedroom door a watch mi pack a suitcase. 

"Mi know but wat if mi really need someting? It betta mi just carry everyting." Mum go ina mi closet an tek out mi third form Jansports bag. 

"Here, wol dis." She fling di bag afta mi. "Pack it wid di two draws an wat eva yuh need fi two day. Mi no ave no intentions fi reach a Sangster International Airport yuh hear?" 

Mi laugh an just pack di bag wid mi essentials an put up di suitcase. Eva since we move up a daddy yaad enuh, mum just barge in a mi room an she neva knock. My lady just always affi find a reason fi come in yah. Sometimes wen mi deh pan di phone wid Michael an a feel pan mi self she just buss in so. No knock, no call or no likkle signal fi seh somebody a come ina mi room. 

Riiiing

Riiiing

Mi realize seh a mi friend dem a video call mi. 

"Hey bitches." Mi seh an everybody a scream an chat loud.

"Gyal yuh no ready fi tomorrow?" Jada seh. 

"Yes of course mi ready weh yuh mean? Unu house ave pool Ashley?" Mi ask cause mi buy a red two piece.

"Yeah but no bring no swim suit cause dat deh pool no drain an clean since forever." Ashley laugh. 

"D*mn, an yuh know seh mi already pack mi new one piece," Abby seh an a laugh an chat bout how much fun we ago ave. After a long three hours of showing weh who ago wear, wat look good from wat no fi wear, di call done. 

"Mi feel fi a suck suck," Mi mumble to mi self. 

Mi grab one a di red suck suck an a cheese chips fi go back ina mi room. As mi reach a mummy dem door mi hear arguing but it come in like seh dem a try cuss low. No matta how much mi press up mi ears to di door mi cya hear much.

"So a dat yuh run go ina church fah? Look yah enuh woman." Mi hear daddy voice pan tap now.

"Mi wah fi know a who. Dean mi nah play get up off a mi." Mi hear mummy sound like she a strain or someting.

 "Mi neva married yuh fi noting enuh Tara." 

Fi di next five minute mi stand up a try hear but it just get quiet den mi hear di bed head a knock softly against di wall. Yuh know wah mek mi tek up mi likkle self go ina mi room an mind mi business. 

_____________________

Di bus load up an everybody sit dung beside who dem know dem can chat wid fi di whole ride. Mi sit dung a di window ina di coaster cause mi catastrophic. Mi mean claustrophobic or wat eva mi hear dem say. Jada sit dung beside mi an Kelly deh a di end. Ashley she decide fi sit dung beside James a di back a di bus like dem nah go see each other fi di whole time. Is a couple a we well a go that is: Me, Jada, Ashely, Jody, Mummy, Daddy, Mark, Marva, Kelly, Taty, Abby, Suzette, Tim(Ashley stepfather), Michael, James, Rick and Martin(Kelly bredda). As di coaster bus ago drive out we si Brandon pan di road a run towards di bus.