Bad Gyal Poochie

Chapter 7: Yaad Brawl

WHO READY FOR SCHOOL? GUESS IM NOT.
VOTE AND COMMENT
_________________________________________

"Big forehead gyal wol yuh head no cho." Every second mi affi a cuss Ashley fi wol har big head. We just come back from Town cause we go buy clothes fi di party. Right now mi a cane row har hair go straight back ina blue dung to har batty jaw dem.

"Ouch lawd Poochie memba seh mi ave feelings to enuh." Well mi know mi do hair tight but di tighter di neater.

"It soon ketch." One likkle more patch.

"Ahhhhh!" Ashley scream out.

"Ashley no, NO!" Mi leggo offa di hair an wol mi ears.

"Yuh know wah lef mi head front. Lef di likkle black pepa grain dem ina mi head front. Mi will use edge control fix it up." Ashley tek up di mirror an pat har head.

Jada a laugh an mi just roll mi yeye an continue do di hair.

"Mummy a go a hotel wid di ugly man tomorrow." Ashley seh. "So dat mean mi ave di house to mi self. Unu can come afta di party." Ashley nave no remembrance enuh. Look like she no memba seh mi affi reach back in by early mawnin before mummy reach dung yah wid Mark.

"A Jada you a talk to don't?" Jada look up cause mi do fi har hair already but ina red. She a practice fi do contouring an some oda makeup someting.

"No a di two a unu." Ashley seh.

"Yuh figat seh mi affi reach ina di house before mummy come Sunday mawnin?" Mi affi ask har cause mi no know how she fi figat dat an a bout one year now we a sneak out go a party.

"Oh. Right. Mi figat." She laugh out.

Couple more minutes an mi done Ashley hair. Mine do so to but ina blonde mix wid likkle bit a pink. We ago ave on kinda similar outfits tonight.

Vrooom!

Vroom!

Vroom!

"A which a foreigner come look fi Faas Mavis?" Mi seh just as dis BMW X1 roll up a dem gate. One a mi fren fada drive har come a school ina a it actually every day.

Di three a we pile up a di verandah grill a look only fi si Faas Mavis ex husband step out.

"Ka ka faat." Jada seh. Mi look pan har annoyed cuz she a blow up har bret ina mi ears an look back pan di man.

"Mi rahtid. No George dat deh?" Mi seh.

"Yes. Him look like him a get care man look how him fat." Ashley seh.

We walk out pan di grass an seeJunior walk out. But see yah. Junior well bright fi cya him pupa come a Mavis yaad tho. An him know how di last time neva end good. George walk go round a di neda side a di car an guess wat?...Him help tek out dis woman. An a no just any woman to. A di saaaame woman him dis Mavis fah four years nung. An yuh won't believe a who di woman related to. Guess no?

Yuh no guess yet?

Gueeess.

...

....

Mi a wait.

.....

....

Sista Patt sista. She name...

"Suzy baby watch yuh step." Baby? Woooie a weh Mavis deh? George help di woman outta di car.

"Let we jus get dis over wid. I don't got time fa di stupidest." Wat a mix of English though. She just deh a Merica fi one year an a twang so? She well wah sound like dem but it no sound good.