Bad Gyal Poochie

Chapter 15: Burn the bridge?

Here is the next chapter as promised. Enjoy the rest of your weekend.

________________________________________________________________________________Di sun hot fi so late in a di evenin though, my God man. Mi feel di sweat trickle down from unda mi breast an run down mi belly. Mi cya believe a me just bathe an feel so. 

"Yuh know seh mi no rate weh yuh do to Ryan though Poochie," Michael a trail mi go down a Jada yaad.

"Michael mi just come from church no bada mi piece." Mi walk likkle fast but him run come hold on pan mi hand. "A so you program. You tun informa now? B mi no like dat enuh."

"So mi an you a talk an you believe you friend ova me? You not even ask mi if a true yuh just tek it as you get it. Micheal move yah!" Just as mi drag weh mi hand an fi step off ina di road a red car zoom so fast pass by mi dats it nearly run ova mi foot. Di car turn down ina Jada lane an is like me shock so till mi stuck.

"See how you mek vehicle almost lick you. Mi no rate weh you do Ryan God know. Ryan a mad bwoy but him would neva do dat to a girl. Me know dat cause we chat an grow ina di same back yaad." Michael turn an go back out di road weh him did a come from.

As mi reach near Jada gate mi see wen she step outa di red car an it reverse in a di yaad fi turn. Wen mi realize to Rasta Jack, no Ryan a drive di car. As him a drive out now him slow dung a mi foot.

"Yah come?" A who him a talk to like seh mi an him a fren? Mi no want no fren from nobody weh a spread lie pan mi name.

"No, but it look like you really want mi fi go dung a station dis time fi go report you fi wounding with intent. Suppose you did run ova mi foot? Weh yuh dah tell mi seh? Which lie yuh dah go tell pan mi now?" Mi stan up a cuss an him just laugh afta mi an speed off like him mad. Di amount a dust weh get up mi affi use mi shirt cover mi nose. Mi turn roun an look pan Jada.

"Seriously Jada?"  

"Poochie no bada wid it." She look like she go spend di night.

"Mi not even ago bada talk bout dat cause it no concern mi no more. Weh mi come fi ask bout, a why yuh post up di tings dem from di nights weh we sneak out go a party? Wi neva agree seh we nah post none?"

"Which part you see mi post noting?"

"Jada no bada wid di f**kery cause mi have a mind fi fight yuh right bl**dcl**t here right now. Yuh delete di tings dem but not before mummy an daddy dem see it an gwan di most yesterday. Now mi not even ago get one more weekend to mi self again."

"Well sorry bout dat but people did a ask bout it so mi post it up fi couple day. How mi did ago know seh yuh mada ago see it so quick. Poochie is not my fault. Ryan seh mi no fi mek because a fren me no show people seh mi hot to." Wah irritate mi is di fact dat she not even a gwan like she care seh she get mi ina trouble, she just a fix har hair weh just cream.

"You know seh yuh change though? Ever since you an dat likkle Johncrow staat talk. You." Mi point pan har.

"Don't talk bout mi man so Poochie don't dweet!" Jada step up to mi.

"Try no feel too ups cause it look like you a lose memory bout who mi really be." Afta me seh dat she affi step back an lower har chest cause it come in like she did ready fi fight mi. 

"Well hush but Ryan just come out an dem no charge him cause mi mek it clear seh no abuse neva di deh. Look, Ryan gimmie $25,000 fi go shop fi di day rave party weh Two Cola ago keep. Him seh wen mi go mi betta post all a di picture dem, cause him nah spend money fi mi look good an hide." Ohhh so Ryan control mi bestie life now, okay.