High Energy QR Code [ Myanmar translation ]

Chapter 7 _ အဝတ်များ ဝယ်ခြင်း

(Unicode)

နန်းတော်ဆီသို့ သွားသည့် မြေပုံက မှန်မျက်နှာပြင်ပေါ်တွင် တဖြည်းဖြည်းချင်း ပေါ်လာခဲ့ပြီးနောက်၊ နောက်ခံဇာတ်ကြောင်းပြောသူက အချိန်ကိုက်ပင် ရှင်းပြလာလေသည်:

"ဘုရင်မဟာ မှန်ရဲ့တည်ရှိမှုကို သူ့ရဲ့ မှော်စွမ်းအားတွေကနေတစ်ဆင့် သိသွားခဲ့တယ်။ မှန်ရှာတွေ့တဲ့ လူရဲ့ လက်ထဲမှာ မှန်ရှိသေးသည်ဖြစ်စေ မရှိတော့သည်ဖြစ်စေ၊ သူ့ရဲ့ အမိန့်အာဏာကို ဖီဆန်တဲ့ ဘယ်သူ့ကို မဆို သတ်ပစ်မှာဖြစ်တယ်"

"နောက်ခံဇာတ်ကြောင်းပြောသူက ငါမင်းကို ထပ်လွှင့်ပစ်လိုက်ပြီး ဇာတ်ကြောင်းဆက်မသွားနိုင်တော့မှာကို ကြောက်နေတာဖြစ်မယ်။ အဲ့ဒါကြောင့် အခုလို သေချာရှင်းပြနေတာ" ရှင်ယဲ့မှန်ကို လက်ဆွဲ နှုတ်ဆက်လိုက်သည်။ "အဲ့လိုဆိုရင် မင်းက ဒီထက်ပိုပြီး အသုံးမဝင်တော့ဘူးပဲ"

မှန်မှာ မတုံ့ပြန်လာပေ။ ပုံမှန် မှန်တစ်ချပ်ကဲ့သို့သာ မြေပုံကို ဆိတ်ငြိမ်စွာ ဖော်ပြပေးနေလေသည်။

သူ၏ IQမှာ မနိမ့်ပေ။ အထူးသဖြင့် သူ့ရဲ့ သရုပ်မှန်ကို ဖုံးကွယ်ရာတွင် အလွန်သတိထားလေသည်။ ရှင်ယဲ့ မှန်၏ သရုပ်မှန်ကို ဖော်ထုတ်ဖို့ ကြိုးစားတဲ့ အခါတိုင်း၊ စကားထဲက ထောက်ချောက်များကို ရှာတွေ့ပြီး ချက်ချင်းပင် တိတ်ဆိတ်သွားတတ်လေသည်။

ရှင်ယဲ့ မှန်ကို ပြောလိုက်သည်: "ငါ မင်းအကြောင်း နည်းနည်းလေးပဲ သိသေးတယ်။ အခုအချိန်မှာ မင်းနဲ့ ပတ်သက်ပြီး ငါဆုံးဖြတ်လို့ ရနိုင်တာ နှစ်ခုရှိတယ်။ ပထမတစ်ခုက မင်းက ကြိုးကိုင်ခြယ်လှယ်သူ သုံးယောက်ထဲက မဟုတ်ဘူး။ ပြီးတော့ သူတို့က မင်းကို ပုံမှန် နာခံတတ်တဲ့ ပစ္စည်းတစ်ခုလို့ပဲ မြင်ကြတယ်။ ဒုတိယတစ်ခုက မင်းက နောက်ခံဇာတ်ကြောင်းပြောသူရဲ့ အစီအစဉ်တွေကို မဆန့်ကျင်နိုင်ဘူး။ ဒါပေမဲ့ မင်းက မင်းရဲ့ မင်းမကျေနပ်တဲ့ ခံစားချက်လေးတွေကို ဖော်ပြနေတယ်။ ငါ မင်းကို တစ်ခုပဲ မေးစရာရှိတယ်။ မင်း ငါ့ကို 'ရုပ်ဆိုးတယ်' လို့ပြောတာက တကယ်ထင်လို့လား၊ ဒါမှမဟုတ် ဒီအတိုင်း စိတ်ကောက်လို့ ပြောတာလား"