High Energy QR Code [ Myanmar translation ]

Chapter 24 _ စန္ဒရား

(Unicode)

လူတချို့မှာ ပုံမှန်အားဖြင့်တော့သူတော်ကောင်းယောင်ဆောင်တတ်ကြသည်။ သို့သော် ကိုယ်ကျင့်တရားနှင့် ဉပဒေဆိုသည့် ချည်နှောင်ထားသော ကြိုးများ လွတ်ထွက်သွားသည့် အချိန်မှာတော့ ထိုသူများက မထင်မှတ်ထားသည့် အရာများကို လုပ်တတ်ကြလေ၏။ ဉပမာဆိုလျှင် ဝူယွီပင်ဖြစ်သည်။

သူ့မှာ အထူးစွမ်းရည်များရှိတာကြောင့် ဒီကမ္ဘာပေါ်မှ အချိန်မရွေး ထွက်ခွာသွားနိုင်သည်။ သူ့ကိုယ်သူ သာမန်လူများထက် သာလွန်သော တည်ရှိမှုတစ်ခုအဖြစ် မှတ်ယူထားပြီး၊ ဒီလိုကမ္ဘာတွေထဲမှာ သူလုပ်ချင်တာ လုပ်လို့ရသည်ဟု ထင်မှတ်ထားသည်။

ရှင်ယဲ့ သူကိုယ်တိုင်၏ ကိုယ်ကျင့်တရားစံသတ်မှတ်ချက်များဖြင့် အခြားသူများကို အတင်းဓမ္မ ခိုင်းနှိုင်း၍ မရဘူးဆိုတာ သိသည်။ သို့သော်လည်း ဒီလို အခြေအနေမျိုးဖြင့် ကြုံတွေရသည့်အခါမှာတော့ သေချာပေါက် ဒေါသထွက်မိမှာပင်။

ကံကောင်းထောက်မစွာဖြင့် အတန်းပိုင်အင်္ဂလိပ်စာဆရာမကို တစ်ခုခု ထိခိုက်အောင် မလုပ်ရသေးခင်မှာ တားဆီးလိုက်နိုင်သည်။ ရှင်ယဲ့ ထိုတားလိုက်နိုင်သည့် ကျောင်းသားအား ငွေအချို့ထပ်ပေးလိုက်ပြီး၊ ဝူယွီအား စောင့်ကြည့်ရန်အတွက် သူ့သူငယ်ချင်းများကိုပါ စည်းရုံးခိုင်းလိုက်၏။ ဝူယွီ မဟုတ်တာတစ်ခုခု လုပ်တော့မည်ဆိုလျှင် ရဲကိုပါ ခေါ်လို့ရသည်ဟု ပြောလိုက်သည်။ ကျောင်းသားများကလည်း ဝမ်းပန်းတသာ လက်ခံကြလေ၏။

ပိုက်ဆံ၏ စွမ်းအားဖြင့် ဆင့်ခေါ်ထားသည့် သတင်းပေးညီလေးတစ်ယောက်က ဝူယွီနှင့် ဆက်သွယ်နေသော စီနီယာကျောင်းသား၏ ပုံကို ပို့လာသည်။ ရိုက်သည့်သူက အဝေးကနေမသိအောင် ချောင်းရိုက်ထားတာဖြစ်တာကြောင့် ဝူယွီက ထိုလူနားမှာ တီးတိုးပြောနေသည်ကိုသာ တွေ့နိုင်လေ၏။ ထိုစီနီယာကျောင်းသား၏ မျက်နှာနှင့် ပုံသဏ္ဌာန်ကို သေချာမမြင်ရပေ။

ကံကောင်းသည်က ထိုညီလေးက အလွန်ပင် ပါးနပ်သူဖြစ်နေတာပင်။ သူ၏အသိ တတိယနှစ်ကျောင်းသားများအား ထိုစီနီယာကျောင်းသား၏ နာမည်ကို မေးလိုက်ပြီးနောက်၊ သူ၏ ကိုယ်တစ်ပိုင်းပုံကိုပါ ရှင်ယဲ့အား ပို့ပေးလာသည်။