High Energy QR Code [ Myanmar translation ]

Chapter 16 _ ​ဖြားယောင်းသိမ်းသွင်းခြင်း

(Unicode)

“မင်း ဘာမဟုတ်တာတွေ ပြောနေတာလဲ?” နယ်စားမင်း ဂါဆီယာက လုံးဝ မယုံကြည်နိုင်ပေ။ ထိုသို့ မယုံကြည်သည်ကိုကပင် သူ၏ စိတ်အခြေအနေက ပုံမှန်ဖြစ်သည်ဆိုတာကို သက်သေပြနေသည်။

ရှင်ယဲ့ကလည်း ရှင်းပြဖို့ ရည်ရွယ်ချက်မရှိဘဲ၊ စကားကိုသာ ဆက်လိုက်၏: “အရှင် နယ်စားမင်း ယုံကြည်သည်ဖြစ်စေ၊ မယုံကြည်သည်ဖြစ်စေ၊ ကျွန်တော်ကတော့ နန်းတော်ကိုသွားပြီး ဘုရင်မကို  လုပ်ကြံရမှာပါပဲ။ ဒီနည်းလမ်းတစ်ခုတည်းကပဲ အချိန်နဲ့ ဒီရေကို တဖန်ပြန်ပြီး စီးဆင်းနိုင်စေမှာပါ”

ထိုသို့ ဆိုလိုက်ပြီးနောက်၊ သတိလစ်နေသည့် ဘုရင်မအချစ်တော်အား ဆွဲမလိုက်ပြီး ထွက်သွားမလို့ပြင်လိုက်လေသည်။ ဂါဆီယာက ချက်ချင်းပဲ သူ့အား တားလိုက်တော့သည်: “မင်း ရပ်လိုက်!”

သူ့မှာ ကိုက်ခဲနေသည့် သူ၏ နားထင်များကို နှိပ်လျက် သူ့ ရှေ့တွင် ရှိနေသော အမျိုးသမီးကို ဘာလုပ်လို့လုပ်ရမှန်းမသိဖြစ်နေလေသည်။

ရှင်ယဲ့လည်း ထိုအခြေအနေကို မြင်မြင်ချင်းပင် ရပ်တန့်လိုက်ပြီး။ ခေါင်းကိုငုံ့ကာ ဆိုလေ၏: “ကျွန်တော် နားလည်ပါပြီ။ အရှင်နယ်စားမင်း ကျွန်တော့်ကို အဆုံးစီရင်တော်မူပါ”

“ဟမ်?” နယ်စားမင်း ဂါဆီယာမှာ ရှင်ယဲ့၏ အတွေးများကို လိုက်မမှီနိုင်တော့ချေ။

“အရှင် နယ်စားမင်းက ကျွန်တော့်ကို မယုံကြည်ပေမဲ့ ကျွန်တော်က ဘုရင်မကို လုပ်ကြံဖို့ ကြိုးစားနေဦးမှာပဲ။ အဲ့လိုဆိုသာရင် နယ်စားမင်း စံအိမ်အတွက် ပြဿနာဖြစ်လာလိမ့်မယ်။ ကျွန်တော့်ကို တားနိုင်မယ့် တစ်ခုတည်းသောနည်းလမ်းက ကျွန်တော့်ကို သတ်ပစ်လိုက်တာပဲ။ အကယ်၍ အရှင် နယ်စားမင်းက ကျွန်တော့်ကို ယုံကြည်တယ်၊ ဒါပေမဲ့ ဘုရင်မအပေါ်သစ္စာရှိတယ်ဆိုရင် ကျွန်တော့်ကို ဒီကမ္ဘာပေါ်မှာ ရှင်သန်ခွင့်ပေးဖို့ မဖြစ်နိုင်တဲ့အတွက်ကြောင့် ရှင်းပစ်ရလိမ့်မယ်။ နောက်ဆုံး အရှင် နယ်စားမင်းက ကျွန်တော့်ကိုလည်း ယုံကြည်တယ်၊ နတ်ဆိုးဘုရင်မကိုလည်း သုတ်သင်ချင်တယ်ဆိုရင်တော့ ကျွန်တော့်ရဲ့ သွေးကိုယူပြီး ဘုရင်မကို သတ်ပစ်ရလိမ့်မယ်”