High Energy QR Code [ Myanmar translation ]

Chapter 34 _ သီခွမ့်

(Unicode)

တတိယနှစ်ကျောင်းသားများ အဆင်ပြေသက်သာစေရန်အလို့ငှာ ကျောင်းက အဆောင်ပထမအလွှာနှင့် ဒုတိယအလွှာအား တတိယနှစ်အတွက် သီးသန့်ထားပေးထားသည်။ ပိုင်ရွှိ၏ အဆောင်ခန်းမှာ ပထမထပ်တွင် ဖြစ်၏။

ကျန်းကျင့်ရိုပြောခဲ့သည်မှာ လျှိုမုချင်းက လင်ကျင့်ရွှယ်ထက် အဆင့်၊ အားကစား၊ ပန်းချီစသည့် နေရာများတွင် ပို၍ သာလွန်သော်လည်း ဆင်းရဲချို့တဲ့သည့် မိသားစုကြောင့်သာ စန္ဒရားနှင့် အလှမ်းဝေးခဲ့ခြင်း ဖြစ်သည်ဟုပင်။ ထို့ကြောင့် ဂီတပိုင်းတွင် လင်ကျင့်ရွှယ်ထက် အနည်းငယ် ညံ့နေလေသည်။ တစ်နည်းပြောရလျှင်တော့ လျှိုမုချင််း၏ ပန်းချီစွမ်းရည်မှာ ပထမတန်းစားဟု ဆိုနိုင်ပေသည်။

လွန်ခဲ့သည့် ၂နှစ်၊ လျှိုမုချင်း အထက်တန်းပထမနှစ်တုန်းက၊ သူမ၏ အဆောင်ခန်းမှာ လေးလွှာတွင် ရှိခဲ့သည်။ သေဆုံးသွားခဲ့သည့်နေရာမှာ သုံးလွှာနှင့် လေးလွှာကြားတွင်ဖြစ်သည်။ အခြားတစ်ဖက်လောကထဲက ဦးခေါင်းမှာ သုံးလွှာတွင် နေနေခြင်း ဖြစ်ပြီး၊ ပထမအလွှာနှင့် ဒုတိယအလွှာအား မသွားနိုင်ချေ။ ထို့ကြောင့် ပထမအလွှာနှင့် ဒုတိယအလွှာက လုံခြုံသည်ဟု ယူဆနိုင်သည်။

သို့သော် ပထမထပ်တွင်ရှိသည့် အဆောင်စောင့် အန်တီကြီးမှာ ညအချိန်၌ အပြင်သို့ မထွက်ရဲပေ။ တာဝန်ကျရုံးခန်းတံခါးကိုလည်း လော့ခ်ချထားကာ၊ အပြင်ကအော်ခေါ်ရင်တောင်မှ ထွက်လာမှာ မဟုတ်ချေ။ ထိုအချင်းအရာမှာ ပထမအလွှာနှင့် ဒုတိယအလွှာက အလွန်အန္တရာယ်များကြောင်း ပြနေခြင်း ဖြစ်လေသည်။ အထဲ၌ တည်ရှိနေသည့်အရာမှာ လျှိုမုချင်းကို မထိန်းချုပ်နိုင်သော်လည်း အနည်းဆုံးတော့ အင်အားခြင်း ယှဉ်နိုင်လောက်လေသည်။ ထို့ကြောင့်သာ တစ်ယောက်၏ ပိုင်နက်ကို တစ်ယောက်က မကျူးကျော်နိုင်ခြင်းဖြစ်သည်။

လင်ကျင့်ရွှယ်နေရာက ကြည့်လျှင်၊ သူမက လျှိုမုချင်းအား ပြိုင်ဘက်တစ်ယောက်အနေနှင့် သဘောထားခဲ့ကာ၊ နေရာတိုင်းလိုလို၌ သူမ ခေါင်းပေါ်သို့ ဖိအားများစွာ ပုံကျစေသည့် လူဟု တွေးထင်ခဲ့လိမ့်မည်။ တခြားလူများနေရာက စဉ်းစားကြည့်လျှင်တော့၊ လျှိုမုချင်းကငွေကြေးချို့တဲ့သည်၊။ ထိုအချက်က အလွန်အရေးနိမ့်သည့် ကိစ္စဖြစ်နေသည်။ ဘေးလူများကတော့ လင်ကျင့်ရွှယ်က ပို၍ သာလွန်ကာ၊ ပိုပြီး အားကျစရာကောင်းသည်ဟု စဉ်းစားကြလိမ့်မည်။ အထူးသဖြင့် ထိုသန်းချီတန်သည့် လတ်ပတ်နာရီကို ပိုင်ဆိုင်ထားသည့် နေရာမျိုး၌ပင်။