High Energy QR Code [ Myanmar translation ]

Chapter 22 _ အပေးအယူ

(Unicode)

ရှင်ယဲ့ ‘ကောင်းပြီ’ ဟု အဖြေမပေးခင် အရင်ဆုံး ချင့်ချိန်ကာ မေးကြည့်လိုက်သည်: “အဲ့ဒါ မင်းရဲ့ခေါင်း ဖြစ်မှရမှာလား? မင်းက ငါ့ရဲ့ခေါင်းကိုတောင် ယူလို့ရတယ်လို့ ပြောတယ်ဆိုတော့၊ တကယ်လို့ သုံးရက်အတွင်း မင်းခေါင်းကို မရှာနိုင်ခဲ့ရင်၊ တခြားလူတစ်ယောက်ရဲ့ ခေါင်းကို မင်းဆီယူလာပေးရင်ကော အဆင်ပြေလား?”

ချောင်ချန့်နှင့် ဝူယွီမှာ missionက ပေါ်ထွက်လာပြီဟု တွေးထင်မိခဲ့ကြသည်။ သူတို့ ရှာဖွေရမည့်အရာမှာ သရဲမ၏ ဦးခေါင်းဖြစ်ပြီး၊ mission NPC မှာလည်း ထိုသရဲမသာ ဖြစ်သည်ဟုပင်။ သို့သော် ရှင်ယဲ့က ဒီလိုမေးခွန်းမျိုး မေးလာလိမ့်မည်ဟု မည်သူက ထင်ထားခဲ့မည်နည်း?

ဦးခေါင်းမှာ ရှင်ယဲ့ကြောင့် ခေါင်းရှုပ်သွားသည့်ပုံပေါ်သည်။ သူမ၏ ခေါင်းကို အထက်အောက်မြှောက်လျက်၊ ကြမ်းပြင်ပေါ်ထိ တဒုန်းဒုန်း အသံမြည်အောင် ခုန်ပေါက်နေလေတော့၏။ သူမ၏ မျက်လုံးများထံမှလည်း သွေးများ ထွက်ကျလာလေသည်။ ထို့နောက် ဆိုလိုက်လေ၏: “အခုလေးတင် ငါ့ခေါင်းထဲကို သွေးတွေဝင်လာလို့ နားမလည်ဖြစ်သွားတာ။ အခုအဆင်ပြေသွားပြီ။ မဟုတ်ဘူး.. နင် ငါ့ကို ကတိပေးခဲ့တယ်။ အဲ့ဒါကြောင့် ငါ နင့်ခေါင်းကို ယူရမယ်”

ရှင်ယဲ့ တုန်တက်နေသော ကျောင်းသား A C ကို ဆွဲထူလိုက်ပြီးနောက် လူဦးခေါင်းနှင့် ဆက်လက် ညှိနှိုင်းလိုက်သည်:

“အဲ့လိုဆိုရင်၊ မင်းကြည့်လိုက်။ မင်းမှာ အခု ဦးခေါင်းတစ်လုံးရှိနှင့်ပြီးပြီ။ ဒါပေမဲ့ အဲ့ဒါက မင်းရဲ့ ကိုယ်ပိုင်ခေါင်းဟုတ်ပုံမရဘူး။ တစ်နည်းပြောရရင် မင်းရဲ့ ခေါင်းမဟုတ်ရင်တောင်မှ အဆင်ပြေနေတယ်။ အဲ့လိုဆို မင်းက ငါ့ခေါင်းကို ယူလိုက်ရင်တောင်မှ သိပ်အကျိုးရှိမှာမဟုတ်ဘူး။ အဲ့တော့ ငါတို့ တွက်ကြည့်လိုက်ရအောင်။ အကယ်၍ ငါက သုံးရက်ကြာပြီးလို့မှ မင်းရဲ့ ခေါင်းကိုရှာမတွေ့ဘူးဆိုရင်၊ နောက်သုံးရက်အတွက် တခြားတစ်ယောက်ရဲ့ခေါင်းကို ယူလာပေးမယ်။ အခုအချိန်ကစပြီး မင်းရဲ့နဂိုခေါင်းကို ရှာမတွေ့ခင်အချိန်အထိ သုံးရက်ပြည့်တိုင်း မင်းဆီ ခေါင်းတစ်လုံး ယူလာပေးမယ်”