High Energy QR Code [ Myanmar translation ]

Chapter 39 _ ရှင်ယဲ့၏ အတိတ်

               

           
(Unicode)

ရှင်ယဲ့ တက္ကသိုလ် တတိယနှစ်သာ ရှိသေးသည့်အချိန်၊ မိဘနှစ်ပါးစလုံးမှာ မတော်တဆမှုဖြင့် ဆုံးပါးသွားခဲ့ကြသည်။ ထိုအချိန်၌ ရှင်ယဲ့မှာ အသက် ၂၀သာ ရှိသေးခဲ့သည်။ ညီလေး ရှင်ရှော့မှာလည်း ၁၅နှစ်သာ ရှိသေးကာ အထက်တန်းကျောင်းတက်စသာ ရှိသေးလေ၏။ ညီအစ်ကိုနှစ်ယောက်စလုံးမှာ စာကို တစိုက်မတ်မတ်ကြိုးစားသူများ ဖြစ်ခဲ့ကြသည်။ မှီခိုအားထားရာတစ်ခု ဆုံးရှုံးလိုက်ရသည့်အခါ၊ ကောင်းကင်ကြီး ပြိုကျသွားသကဲ့သို့ပင် ဖြစ်ခဲ့ရတော့သည်။

အခြေအနေတွေသာ ပေးခဲ့မည်ဆိုလျှင်၊ ရှင်ယဲ့မှာ အရုပ်ကြိုးပျက်ဖြစ်လျက်၊ အချိန်တစ်ခုလောက်အထိ စိတ်ဓာတ်ကျနေမိမှာဖြစ်သည်။ သို့သော်လည်း ထိုသို့ လုပ်ခွင့်မရှိခဲ့ချေ။ မိဘများ ဆုံးပါးသွားလျှင်တောင်မှ၊ ဘဝက ဆက်လက်ရှင်သန် နေရဦးမှာဖြစ်သည်။ ကုမ္ပဏီိကိုလည်း စီမံခန့်ခွဲရဦးမှာဖြစ်ပြီး၊ အသက်မပြည့်သေးသည့် ညီလေးကိုလည်း တာဝန်ယူရဦးမှာ ဖြစ်သည့်အတွက်ပင်။ ဒါရိုက်တာ ဘုတ်အဖွဲ့ဝင်များကလည်း သူ့လို လူငယ်လေးတစ််ယောက်က အမှားလုပ်မည့်အချိန်ကို စောင့်မျှော်နေခဲ့ကြသည်။ စီးပွါးပြိုင်ဘက်များကလည်း မျက်စိဒေါက်ထောက် ကြည့်နေခဲ့ကြသည်။ ဘယ်သူကမှ သူ့ကို အသက်ငယ်သည်ဟုဆိုကာ ညှာတာပေးလိမ့်မည် မဟုတ်ချေ။ သူဆီက ဂုတ်သွေးဘယ်လို စုပ်ရမလဲဆိုသော အတွေးများဖြင့် ပြည့်နေသည့် လူများသာ ပိုမိုများလာခဲ့သည်။

ထိုအချိန်ကာလအတွင်း၌၊ ရှင်ယဲ့မှာ သစ်ပင်ပြိုခိုက် မျောက်များကွဲသည်ဆိုသော အဓိပ္ပာယ်ကို ထဲထဲဝင်ဝင် နားလည် သဘောပေါက်ခဲ့ရလေသည်။

လူအများအရှေ့မှာတော့၊ အရာအာလုံးကို လုပ်နိုင်စွမ်းရှိဟန်ဆောင်ကာ၊ နောက်ကွယ်မှာတော့ စာအုပ်ပေါင်းများစွာအား အသည်းအသန်ဖတ်၍ ကျက်မှတ်ခဲ့ရသည်။ ရှိသမျှ အင်အားကုန် သုံးကာ၊ ကုမ္ပဏီကို ထိန်းသိမ်းခဲ့ရပြီး၊ မိဘများ ချန်ထားခဲ့သည့် စီမံကိန်းကိုလည်း မပျောက်မပျက်အောင် လုပ်ဆောင်ခဲ့ရသည်။

ထို စီမံကိန်းကျဆုံးသွားသည်နှင့်၊ ကုမ္ပဏီတစ်ခုလုံးမှာ အကျပ်အတည်းထဲ ကျရောက်သွားနိုင်သည့် အခြေအနေဖြစ်နေခဲ့သည်။