Chained to the Past (Imperfect Girls Series #2)

Chapter 1

Chapter 1

Beginning

"MAIA, hindi ka na ba sasama sa amin?" tanong ko kay Maia na nakaupo sa kaniyang swivel chair, seryosong nakatitig sa monitor na nasa kaniyang unahan.

"Sasama ako," sagot nito at agad nagsimulang ligpitin ang kaniyang mga gamit.

Pinag-isipan din muna namin kung dadaan din ba kami sa condo ni Maia. Balak kasi naming mag-bar ngayon dahil matagal-tagal na rin noong huli kaming nag-bar. Kailangan din namin ng pang-stress reliever 'no! Hindi puro stress sa trabaho at... well, love life?

Napagdesisyunan din naming tatlo sa huli na dumaan muna nang sandali sa condo ni Maia. Magpapalit na lang din kami ng damit namin dahil ayaw rin naman naming pumunta ng bar ng haggard at pang-opisina pa ang damit. Baka pagtinginan lang kami ng kung sino-sino doon!

Tatlong babaeng lasing, sasayaw-sayaw sa gitna ng bar ng nakasuot ng unipormeng pang-opisina? Mukhang tanga.

Habang abala sa paghahanap ng mga damit sina Nica at Maia ay nakatayo lamang ako sa isang gilid ng kaniyang kuwarto habang tahimik na nakatitig sa screen ng aking cellphone. Unti-unting sumikip ang aking dibdib nang mabasa ang text ni Jake, and aking boyfriend.

From: Babe

pahinga muna tayo jade. nakakapagod na itong relasyon natin

Hindi ko na lamang namalayan ay unti-unti na palang sumisikip ang aking pagkakahawak sa aking telepono. Napakagat ako sa aking pang-ibabang labi habang paulit-ulit na binabasa ang text ni Jake.

Pahinga? Bakit magpapahinga na naman? Parang kailan lang ay kaka-cool off lang din naming dalawa.

Nakakapagod? Siya pa ang malakas ang loob na magsabi ng nakakapagod ang aming relasyon? Eh, paano naman ako? Wala na nga akong ginawa kung hindi sumunod sa lahat ng kaniyang gusto.

Gusto niyang mag-iba ako ng damit kapag lalabas kami? Magpapalit agad ako. Gusto niyang magpahinga muna at huminga mula sa aming relasyon? Binibigyan ko naman siya ng space at pagkatapos ay susubukan ko ulit ayusin ang aming relasyon. Gusto niyang layuan ko ang isa sa mga kaibigan kong lalaki? Lalayo ako, wala nang tanong-tanong pa.

I swallowed the big lump inside my throat as I typed in a reply to his text. It was only sent a minute ago. Alam kong makikita niya agad itong reply ko.

To: Babe

cool off ulit? ano namang ginawa ko ngayon? i'm sorry. can we meet? pick us up at maia's condo please. i love youu

Napaigtad ako mula sa pagkakatayo sa gilid nang biglaan kong marinig ang tawag sa akin ni Nica. Inilipat ko ang aking tingin sa kaniya kasabay ng pagpatay ko sa aking telepono. "Dress up already, Jade," utos nito. Agad naman akong tumango at ngumiti nang kaunti sa kaniya.

Tapos nang magbihis ang dalawa ay saka lamang ako nagsimula. Naghalungkat ako ng bagong pang-itaas mula sa kabinet ni Maia. Buti na lamang ay maraming damit si Maia. Siguro isa na rin sa advantages ng anak ng isang sikat na designer. Halos mag-umapaw na ang kaniyang kabinet sa dinami-dami ng damit.

I settled for the black top with some glimmering jewels as designs on top. Nagpalit din ako ng pantalon na kulay itim at hinayaan na lamang ang aking itim na heels. Inayos ko lamang nang kaunti ang aking buhok gamit ang pangkulot ni Maia at agad na rin silang inaya.

Thankfully, mabilis lamang nakita ni Jake ang aking text. Ilang minuto lamang ay nakatanggap na rin ako pabalik ng text na nasa baba na siya.

Sabay-sabay kaming tatlong bumaba ng condo ni Maia at dumiretso sa harapan ng building. Agad kong nasilayan ang isang lalaking nakasandal sa kaniyang kotse habang humihithit mula sa kaniyang vape. Nakatingin lamang ito sa kawalan habang prenteng-prente na naghihintay.