ရိပေါ်အိမ်သို့ ကိုကိုက ကိုယ်တိုင်လိုက်ပို့ပေး၏။ ဆေးကိုလဲ သူကိုယ်တိုင်သွားဝယ်ထားပုံရကာ ရိပေါ် အိပ်ယာနိုးသည်နှင့် တန်းခနဲ မုန့်နဲ့ဆေးနဲ့ တိုက်ပေး၏။ ရိပေါ်က ဆေးကြောက်သူမို့ ငြင်းချင်ပေမယ့် မျက်နှာတည်ဖြင့်ကြည့်ကာ နေနေသော ကိုကို့ကြောင့် ကြိတ်မှိတ်ကာ သောက်လိုက်ရသည်။
ရိပေါ် အနည်းငယ် သက်သာပြီဆိုမှ အိမ်လိုက်ပို့ပေးခြင်းပင်။ ရိပေါ်က ငြင်းချင်ပေမယ့် ကိုကိုက အပိုစကားမဆိုပဲ လိုက်ပို့မယ်ဟု ယတိပြတ်ပြောတာကြောင့် ငြင်းခွင့်မရလိုက်ပေ။
*ဆင်း ရိပေါ်...ညကျရင် အစာမာတွေစားဖို့ အဆင်မပြေလောက်ဘူး။ ရိပေါ် စားချင်တာလေးတွေ ဝယ်ခဲ့လိုက်*
*ရ..ရပါတယ် ကိုကိုရဲ့*
ကိုကိုက ခေါင်းခါကာ ရိပေါ်လက်ကိုဆွဲပြီး မောလ်ထဲ ဝင်ခဲ့၏။ အထဲရောက်မှပင် လက်ကိုလွှတ်ကာ ရိပေါ်ကြိုက်တာကို ရွေးယူစေသည်။ ရိပေါ်က အားနာ၍ ဘာမှမယူချင်ပေမယ့် ခြင်းထဲသို့ တွေ့သမျှကို ကောက်ထည့်နေသော ကိုကိုပင်။
*ကိုကို များနေပြီလေ..ဒီလောက်ဆို ရပါပြီ*
*မရပါဘူးကွာ..ဖယ် ကိုယ့်ဘာသာပဲ ဝယ်ထည့်တော့မယ်။ အိမ်ရောက်မှ ကြိုက်တာရွေးစားလိုက်*
ကိုကိုသည် ရိပေါ်လက်ထဲမှ ခြင်းကိုယူကာ ရှေ့ကနေ သူကချည့်ပဲ ဝယ်သွား၏။ ရိပေါ် ကိုကို့ပုံစံကို သဘောကျလွန်းစွာ အနောက်ကနေ ဓာတ်ပုံရိုက်ယူထားလိုက်သည်။ ရိပေါ်အတွတ် ဈေးဝယ်ပေးနေသော ကိုကိုက ဒီလောက်ထိ ခန့်ညားနေတာကြီးကျ လွန်လွန်းပါ၏။
*ရပြီ..ပိုက်ဆံရှင်းခဲ့မယ်။ ကားထဲက သွားစောင့်နေလိုက်နော်*
ရိပေါ် နဖူးပေါ်မှ တစွန်းတစ်စ ကျနေသော ဆံပင်လေးတွေကို လက်ဖြင့်ဖယ်ရှားကာ ပြောလာသော ကိုကိုပင်။ ရိပေါ် ပြုံးကာ လက်ခံလိုက်ပြီး ကားပါကင်ဆီ ပြန်လာခဲ့သည်။ ကြည့်ရတာ လမ်းလျှောက်ရတာ အဆင်မပြေသည့် ရိပေါ်ကို ကိုကိုက သတိထားမိပုံရပါ၏။
*သုံးသိန်းခွဲ ကျပါတယ်ရှင့်*
ဆိုင်ဝန်ထမ်း ကောင်မလေးက ဘေလ်စာရွက်အား ရှောင်းကျန့်ဆီ လှမ်းပေးကာ ဆိုလာခြင်း။ ရှောင်းကျန့် သု့အိတ်ထဲမှ ကဒ်ကိုထုတ်ကာ ကောင်မလေးကိုပေးလိုက်ပြီး ငွေချေလိုက်သည်။ ပြီးနောက် အထုပ်တွေဆွဲပြီး ရိပေါ်ရှိရာဆီသို့။