وتيرة الاعرج

الوتيرة الخامسة والعشرون

وتيرة_ الاعرج
بقلم: حوراء السعيدي

حبايبي لاتنسون التصويت من النجمه+التعليق
بين الفقرات + ومتابعة لحسابي .." 🍂hawraalsaidi

-حنين: عفت كلشي وركزت على ملامح ارسلان الي تغيرت مجرد سمع الخبر الي انطته الدكتورة مسح على كصته وهُوَ يرجع يسئل الدكتورة بعدم تصديق ..

-ارسلان: ما فهمت دكتورة شلون يعني حامل

-الدكتورة: زورجتك مو

- اي

- هاي تحاليلها اتفضل شوف

اخذ التحليل منها رفعه يقرأ بيه طبك حواجبه رفع عيونه للدكتورة موجه كلامه بنبره شبه عصبيه ..

- دكتورة زوجتي اسمها غياهب سلطان مو غياهب نور الدين

رجعت اخذته منه الدكتورة تقرأ بيه طلعت صاحت الممرضة وطلع تشابه اسماء ومخربطه التحاليل مالحكنا نفرح بالخبر حتى ضل يحجي ارسلان على الدكتورة لان صار هيج والدكتورة تتعذر منه ماسكت اله لمن صاح ابويه بيه يسكته ..

-سلطان: كافي ابني ايصير تشابه اسماء ماكو مشكلة

-الدكتورة: اتمنى تعذرونا وهاي تحاليل مريضتكم صاير عندها فقر دم حاد لا تخافون بس انتبهو الاكلها

-درغام: ليش الفقر الدم هم يوصل الانسان لدرجة الاغماء

-الدكتورة: اي استاذ لان حاد الجسم يصير مابيه
اي طاقه

طلعت بقينه احنه منتظرين غياهب ترجع لوعيها شويه وفتحت عيونها ارسلان كاعد يم راسها وجها شاحب الكانولا بايدها ..

-غياهب: شصايرلي

-حنين: خاب غير طلعتي حامل

صفنت بوجهي وطولت بصفنتها وجهه صار اصفر اكثر ..

- حامل ؟؟

ضربني درغام على راسي بخفه يخزرني ..

-درغام: تشابه صار بالاسماء بالاول كالولنه حامل بس طلعو غلطانين باسمج

غمضت عيونها ورجعت فتحتهن ..

- هبطتوني

-حنين: لج شبيج غياهب اريد اصير خاله

-سلطان: كافي بابا اختج تعبانه خلونه نرجع للبيت الي هناك منتظرين وبالهم يمها

راد يلزمها ارسلان بس استغربت من تصرف غياهب من غيرت مسارها الابويه ولزمت بيه عايفته بقى يباوع وراها طلعنه من المستشفى رجعو بسيارة ارسلان وانه ويا درغام ..

-حنين: درغام

عيونه بالطريق جاوبني ..

-درغام: ها بلائي

- احس غياهب ماتحب ارسلان

- شلون يعني

- مادري اذا احساسي صح اولا او يمكن همه كدام الناس هيج يتصرفون او من ينسئلون مايطلعون شي يخصهم