وتيرة الاعرج

الوتيرة الثامنة والثلاثون

وتيرة_ الاعرج
بقلم: حوراء السعيدي

حبايبي لاتنسون التصويت من النجمه+التعليق
بين الفقرات + ومتابعة لحسابي .." 🍂hawraalsaidi

-غرام: اباوع الايدي الي لازمه كتفي بيها صارت بس دم رفعني من الكاع كُميل وهَوُ بنص صدمته من الوضع طلعنه من المطبخ وارسلان لازم ناز شافتنه مليكة لطمت على خدها ..

-مليكة: ولك يمه شمالها مرتك

-كُميل: بعدين يمه بس جيبيلي عبايتها بسرعة فدوه لعينج

عضيت شفتي كاتمه وجعي نزلت دموعي
من الالم جابت العباية وكفني يلبسنياها وطلعنه للمستشفى وصينه مليكة تبقى يم سراج كُميل يسوق وكل شويه ملتفتلي والخوف بعيونه ضرب على الستيرن مال السيارة بقوه ..

- بسسس لو اعرف شبيهاا ليش رجعت حالتهاا .. شلون صار هيج غرام

رديت وانه احس ايدي انشلت شل ..

- من كتلك رايحه استغربت دخولها وحدها لان كلنه ندري بحالة ناز مجرد دخلت للمطبخ خطيت كم خطوة واحس بشي انغرس بكتفي

ضل يستغفر بعصبية ويتأفأف بين ماوصلنه للمستشفى نزلني لازمني دخلتني الممرضة واجت دكتورة تشوف جرحي كشفت عليه وبدأت تداوي خيطو الي بقيت متمدده بمكاني دخل الي كعد قريب عليه ..

- شلون صرتي

ابتسمت وروحي منتهيه ..

- احسن

- وين احسن وعيونج حمر بكثر ماباجيه

نزلت دموعي ماتحملت ..

- مو ايدي اتأذيني

لزم ايدي باسها ويباوعلي بقهر ..

- بيه ولا بيج ياروحي ..كافي بجي هسه تصيرين زينه

مسحت دموعي بايدي الثانية ..

- خلي نرجع هسه سراج يتنحس لو يجوع

- خلي اشوف الدكتورة واجيج ابقي هنا

طلع بقيت وحدي كاعدة افكر بوضع ناز والله البنيه جانت شحلاتهه مابيها شي وحتى جلسات العلاج ملتزمين بيهن مامفوتين ولا جلسه رغم كلشي صار ويانه باخر فترة

رجع كُميل وكال نرجع للبيت ساعدني البس عبايتي وايدي اقل حركة اتاذيني ..

-كُميل: هاا غرام نطلع

-غرام: اي

رجعنه للبيت اول مادخلنه صار بوجهنه ارسلان خطيه مبين مقهور اجه علينه ..

-ارسلان: الحمدلله على سلامتج علوية

- الله يسلمك

اعتذر بأحراج ..

- اتمنى تعذرينه على الي صار صدكيني مثلج مصدوم من الي صار

- مايحتاج الاعتذار خويه