التقينا فأشرق الفؤاد بقلم / إيمان سلطان

الفصل السادس عشر

انفرج الباب ليخرج النقيب مدحت وخلفه العسكرى التابع له وتوقفا للحديث مع جلال وحسام، وما أن انفرج الباب حتى هبت شمس واقفة واقتحمت الغرفة تتبعها فرح الغير واعية لنظرات مدحت حتى الأن، وخلفهما كانت تركض مقلتى مدحت المسلطتان على فرح بإعجاب واضح حتى أنه توقف عن الحديث لبرهة حتى اختفت فرح داخل الغرفة ثم تنحنح وسعل بقوة حتى يستعيد تركيزه ولا يلفت الأنظار له ثم انتبه مرة أخرى للحديث قائلاً

:- أنا أخدت أقوال الأستاذ يوسف وهنبدأ تحريتنا وبالطبع هناخد بالاعتبار اتهامك الموجه لعائلة السمرى يا باشمهندس

قطب جلال حاجبيه عابس الوجه يفكر بتركيز لبرهة أستغلها حسام ليقول موضحاً بنبرة قوية

:- يا سيادة النجيب مسألة التار ديه جديمة ... فوق الخمسة وعشرين سنة دلوك ... صُح بتحصل مشاكل ومناوشات بين العيلتين من وجت للتانى لكن الجتل محصلش

انتبه مدحت لحديث حسام واستفسر بهدوء

:- أفهم من كده أنك بتنفى التهمة عن عيلة السمرى ... طيب بتتهم حد تانى يا أستاذ حسام

هز جلال رأسه باعتراض قائلاً بشرود

:- لاء ... أحنا مالناش أعداء فى البلد ... والخلافات الوحيدة بينا وبين عيلة السمرى

حرك كتفيه بحيرة مردفاً :- مقدرش أقول غير كده ومش عارف الحقيقة فين!!

شارك حسام فى الحديث بتعقل وزارنة موجهاً الحديث لجلال

:- اللى أجصده مينفعش نتهم حد بدون دليل ... يمكن من خلال تحريات سيادة النجيب الحجيجة تبان ونوصل للچانى

أومأ مدحت مؤيداً بجدية

:- وده اللى هيحصل يا أستاذ حسام أنا مش هاخد أى خطوة نحو الاتهام ده قبل ما يكون معايا دليل

ضيق مدحت بين حاجبيه واسترجع فى مخيلته قضية قديمة

:- وعلى ما أتذكر حادثة حريق حظيرة الحيوانات بتاعتكم مقدرناش نوصل للجانى ... أقصد أن فعلاً فى مناوشات بتحصل والمرة السابقة حضرتك يا باشمهندس رفضت توجه الاتهام لأى شخص

أومأ جلال مطأطأ الرأس بحيرة، بدل مدحت نظراته بين الرجلين ثم قال متفهماً طبيعة القرية قائلاَ

:- أنا اتنقلت هنا من سنة تقريباً ... وفاهم طبيعية الأعراف والتقاليد اللى بتتبعوها وخصوصاً إنى كنت قبل كده بخدم فى الصعيد الجوانى ... وعاوز أقولكم أن الوضع مختلف تماماً هناك ولسه التار بيتنفذ بحذافيره زى زمان والتفاهم بالسلاح علطول ناظر جلال يشهد بحقيقة ملموسة قائلاً باقتناع

:- والحقيقة أنا شايف أن هنا فى البلد وبحكم قربها من المحافظة الأوضاع أفضل بكتير وبرغم التار اللى سمعت عنه من أول ما دخلت البلد بس الحقيقة أحمد وفاروق السمرى بيتعاملوا بمنتهى العقلانية فى كتير من الأمور ... دول تقريباً بيحلوا معظم مشاكل البلد قبل ما توصل للقسم ... عشان كده هنقوم بتحرياتنا الأول وبعدين نشوف الخطوة الجاية هتوصلنا لأية