His Dirty Game

Chapter 26

REESE' POV

Natapos na ang dalawang araw na camp tour namin sa Batangas at sa loob ng dalawang araw na iyon ay maraming mga nangyari at nabago sa akin. Gusto ko na sanang kalimutan ang lahat ng iyon pero nandito ako sa reyalidad at kahit anong limot at iwas ko na hindi maalala iyon ay kusa pa rin iyong tatatak sa isipan ko.

Nandito si Ryu sa bahay namin at ngayon nga ay sasabihin ko na sa pamilya ko ang relasyon naming dalawa. Alam kong sa oras na malaman ito nina Kuya Red at Kuya Reevo ay sigurado akong magagalit at magtatampo sila sa akin.

Hindi nila gusto si Ryu para sa akin noon pa man. Ang dahilan kasi nila ay hindi raw mabuting tao si Ryu. Ako naman ay hindi naniniwala sa kanila sa kabila ng mga ipinakitang kabutihan ni Ryu sa akin.

Overprotective lang talaga ang mga kuya ko dahil nga nag-iisa nila akong kapatid na babae at lalake naman si Ryu kaya hindi palagay ang loob nila dito.

Pero ngayon, simula nang maging kami pati ako ay hindi na rin mapalagay ang loob ko sa kanya. Nakadepende na siya sa akin at palagi pa itong nagseselos o nagiging possessive sa isang maliit na bagay.

Ganon ba talaga ang isang lalake kapag nagkakaroon siya ng girlfriend? Siguro nga ay ganon iyon kaya iintindihin ko na lang muna ang mga pagbabago ni Ryu. Mahal naman raw niya ako kaya alam kong hinding-hindi niya ako sasaktan.

Magkahawak kami ng kamay ni Ryu habang nakaupo at nasa sala. Hinihintay namin sila Mom, Dad at ang mga kuya ko para sa sasabihin namin. Pinagpapawisan at kinakabahan na ako ngayon sa magiging reaksyon nila.

"Hey girlfie, kumalma ka lang. Matatanggap naman ako nina Tita Aiko at Tito Ramon para sa'yo, e." Sabi ni Ryu at hinagod-hagod niya ang balikat ko.

Napatingin naman ako sa kanya. "Pero sina kuya, sigurado akong hindi nila matatanggap ang relasyon natin." malungkot kong sabi. Ngumiti lang siya at hinalikan ang isang kamay ko.

"Don't mind them. Wala naman silang magagawa kung naging tayo na and besides, kung mahal ka nila ay tatanggapin nila ako para sa'yo." he said. Tumango na lang ako do'n at hindi na muling nagsalita pa.

Si Kuya Reevo ay alam kong matatanggap pa rin niya ang relasyon namin ni Ryu pero si Kuya Red? Talagang matigas siya kaya alam ko nang tututol siya sa relasyon namin ni Ryu.

Ilang sandali lang ay dumating na rin sina Mom at Dad na kakagaling lang mula sa mga trabaho nila ganon rin sina Kuya Reevo at Kuya Red.

Nang makita nila kami ay lumapit sina Mom at Dad kay Ryu nang nakangiti at bineso nila kami. Sina Kuya Reevo at Kuya Red naman ay natahimik na lang pagkakita nila kay Ryu.

"Hijo, it's nice to see you again. You're really handsome and tall na, ha? Dati, noong mga bata pa lang kayo ni Reese ay hanggang baywang ko lang kayo." Natatawang sabi ni Mom kay Ryu.

Tumawa lang rin si Ryu at nagmano ito kay Mom. "Salamat po, tita." he thanked.

Si Dad naman ang lumapit kay Ryu kaya nagmano rin ito sa kanya.

"Kailan pala uuwi ang papa mong si Ryuko dito sa Pilipinas? Hindi ba't 3 months na siyang nasa Japan?" Tanong ni Dad kay Ryu.

"Uuwi na po si Papa within two weeks. Talagang busy lang po siya sa Plantation business namin doon." Nakangiting sagot ni Ryu.

Tumango si Dad at ngumiti rin. "Miss na miss ko na kayang kainuman ang papa mo." At nag-usap na sila ng kung anu-ano.

Pagkatapos ay nagyaya nang kumain ng dinner sina Mom at Dad kaya lahat kami ay nasa dining table na.

Kapansin-pansin pa rin ang pananahimik ng dalawang kuya ko dahil kasama namin si Ryu. Sanay na sina Mom at Dad sa kanila kaya hindi na nila ito pinapansin.