مال غيم بوجهه وهمس بصوت خافت "شتريدني احچي يعني؟"
جر انتقام نفس طويل وجاوب "مادري، من يوم ما رحنه المستشفى أنتَ محتقن ومالك خلگي، وزاد الموضوع بعد ما_____"
بعصبيه مفرطه بتر كلامه وقاطعه "لا تجيب طاري ذيج السالفة، ترا والله بعد ما تشوف رگعة وجهي"
هدده بنهاية كلامه ومباشرة طمنه انتقام بذات الانفعال "هذا هو لصمت حلگي، بس لا تگب علينا"
عم الصمت بينهم لفتره چان خلالها غيم منزل راسه ودايره للجهه الثانيه يحاول بشتى الطرق يگظم دموعه وما يخلي يشوفهن، لكنه بسبب اهتزاز جسمه ايقن من وضعه وحالته! هو حط چفه على ايده وبنبره كلها حنيه وقلق كلمه "حبيبي، لا تظل بس تبچي، دير وجهك علي وبس گلي شنو ببالك؟ خلينا نتفاهم ونلگى حل سويه لهل الوضع"
ما أن نطق كلمته الاخيره حتى دار غيم وجهه ومن بين دموعه انفجر "أنتَ ما جاي ترحمني، وهواي تضغط علي، وتخنگني وحتى نفسي ما جاي تخليني اجره، كلشي صعب علي، الي صار والي سويته انتَ، ليش ما تفهمني؟ ليش ما تقدر وضعي؟ وتعرف انه هالشي مو سهل أحد يتقبله ويتعايش ويااه ، كرامتي ورجولتي، ونفسيتي، كلها نسحگت وعلموديش؟ علمود مشاعر ماتعرف شون راح تخلص، هاي اذا طولت اصلا، اذا ما چانت مجرد نزوه ورغبه، تنتهي وتنسي برمشة عين"
"هيج تشوفنه؟ مجرد رغبه ونزوه؟" سأله انتقام بنبره كلها عتب بين ما يباوعله بعيون حاده
سحب غيم كلينكس وظل يمسح بوجهه وجاوبه بسؤال ثاني "لعد شنو تسمي الخرا الي سوينااه؟"
