چان گاعد گباله يراقب وضعه بين ما الممرضه تبدله الضماده، وبنبره منفعله خاطبه "عود شمعناها خليت الطبيب يكتبلك خروجيه بوضعك التعبان هذا؟"
بتعب واضح ابتسم اله ورد "اكره ريحة المستشفيات، وهياتها الممرضه ما مقصره بعد المن باقي؟"
"هسه لو نازل ببيت اهلك على الاقل، يطبخولك، يهتمون بيك اكثر" عاتبه انتقام بعد ما فك عقدة ذراعاته عن صدره
عقچ جياد ملامح وجهه وبأنزعاج برر "من شوكت گلبهم علي، دخيلك، ماريد نفسي تلوع اكثر"
جر الثاني نفس طويل وتدنه يمه بعد ما خلصت الممرضه شغلها وتركتهم لوحدهم، هو گعد على طرف الچربايه وخاطبه بنبره يجتاحه طابع الامتنان وتخللتها مشاعر الذنب والأسف "المفروض انا بمكانك هسه، حتى ماعرف شون اردها الك"
"لك أنتَ لا رفيق مصلحه ولا صاحب دنيا، اخوي الصغير انتَ، بحياتي ماحسيتك غريب عني، والله شاهد علي معزتگ بگلبي من معزة هزيم، افديك بروحي مو مره ولا مرتين، بكل حس خطر ممكن يلوحك" رد عليه جياد وكل كلمه نطقها چانت تحمل محبه وتقدير چبير للگاعد گباله
مباشرة شبگه انتقام وهمسله "الله لا يگولها، عساني اموت ولا اشوفك بمثل هالمنظر مره ثانيه"
ضحك جياد وطبطب على ظهره تالي نطق "خنگتني لك گواد"
ابتسامه باهته رسمها على شفايفه، هو تبعد عنه وگام على حيله ثم تكلم "يلا انا ضروري ارجع للمقر، الدنيا محترگه بدونه"
همهم اله جياد وقبل ما يشيل جنطته سأله "شو ماحسك على بعضك؟ صاير وياك شي؟"
