خلف جُدران الأزِقة (مكتمله )

البـارت الـ 23

ـ خلف جدران الأزقــــــة

ـ ريـام السـاعـدي …

ـ البـارت الــ 23

… تهت ريشة بگطن نداف شابع طگ "

♡•♡

غيـــــد …

الأنسان الخبيث شڪد متلون و بوجهين گدامك
يبين هو خوش شخص وڪلامه معسول بس
بالحقيقة ثعبان سام بهيئة بشر نواياهم شيء
وڪلامهم شي وافعالهم شيء ثاني هذوله شلون
يگدرون يسون هيج ومنيلهم هالقابليه بالڪذب
والتمثيل رهيب عدهم صدك البشر متعرفه زين
اذا متعاشره عن قرب تعجبت معقوله هذوله
بيت جيرانه الي نعرفهم وابنهم عايش ويانه
اڪثر معقوله هيثم يدري بأهله هيج وساڪت
اريد احد يضربني ؏ راسي ويگول غيد انتي
بحلم اصحي منه تجرأت وسألتهه اذا يعرف
بيه لولا جان جوابه هوو..

… ههههه خلي اسولفج قصه بعدج صغيره
؏ گدج بعدين نفوت بالشغلات الچبيره مادام
متحضرتلي عيب مااردج لغايه تعرفيها هسه..

ـ أرتبڪت وبلعت ريگي والف سالفه خطرت بالي
لزمت الفرشه وڪورته بيدي أهدي بنفسي لويات
بطني وجعتني اڪثر وگلبي ينبض بقووه خايفه
منه ومن الي راح يصير والي راح أسمعه..

ـ ڪان يا مڪان في قديم الزمان بيت بالأعظميه
جان اڪو عائله ساڪنه هناك الأب الجبير اسمه
رحمن الي هو جدي أبو أمي جان الله ميجرعـة
طاغي وظالم وصارم عده ڪومه ولد وبنات ومن
ضمنهم أمي واختها الأصغر منها بسنه جدي جان
عسڪري مسربت مثل الوالد الله يسلمه شرب
ونسوان بس ربك ڪفخه بأصغر بناته دعمتها
سياره وماتت اللهم لااا شماته عيب خالتي مهما
ڪان..

ـ من هاي اللحظه قرر يتوب ويڪفر عن سيـئاته
مو يڪلج ڪل قووي للزمان يلين لاان بعد الحادث
عاف منطقته واجه لهنا بس بعديش توبة اخر وكت
ولده ڪلهم ورثهم طيحان الحظ صح شهادات بس
اخلاق سزز شغلهم ڪله دفن عاد هو بيه حال يصلح
تأخر اذا الراعي فاسد الرعيه شتطلع؟ من بين ذولة
طلعت عنده ابنيه اخر العنگود ماي مام.. اهااا نسيت
اگول بيبي عدها بطولات بڪسر خشوم النسوان
ماضلت وحده عرفها جدي الا وانڪسر خشمها منها
وعاده ثانيه تگطم الأصبع بمگراضه عدها حس اجرامي سابق … اي نڪمل ف الوالده الله يسلمها
جانت متعوده اي شيء ترديده او يدخل بالها لازم
يجيها متحب الرفض وتحب الأهتمام يڪون بس
الها اتعرفين لاڤينيا عدوه سالي نفس الشي بس
فرع العراق شافت ابويه ونعجبت بيه بعد كيد
نسوان هو جان يبيع ثگل لان شغله خارج حدود
المنطقه وهي بطريقه غير مباشره تلفت انتباهه
نگول صادته لشباڪها وجاب امه يخطب بس
شصار؟

.. بيبي حذرتها وگالت ؏ الحلال والحرام أبني
ملعب وابو نسوان مااگدرله انتن رفضن من يمجن
مااريد أوگع بخطيتج ولأن امي وامها وخواتها
عدهن سوابق وهذا الشيء زلاطة مااهتمن لحجيها
وأزوجوا بالله بالخير وخلفونا خلفه الگشره ومن
وصل السره اليه جنت بعمر تسع سنين امي تتجج
بيه ؏ أساس مريض وتاخذني للدڪتور ونطلع
بس جذب نوگف ؏ صفحة بسيارتها نراقب وره
مايطلع تلحگه والحلوو خالتي الجبيره ويانه تجي
نوگف شوف يم مطعم بيت شقه اشوف الوالد
شلون يتمعشق ويحب وراهه نسوي هجوم مباغت
وره ميروح نشوف بيش نأذيها للمگروده وتنسحب
من حياته واحنه نرجع أكعد بنصهم اسمع ڪل
نقاشات ونصايح بيبي وهي تكلها عفيه بنتي اني
هيج جنت اسوي ويه الي يلزگن بأبوج نسوان
ضاله مشمره يلتافن من يشوفن جيب ثگيل وعادي
الرجال يحب ينوع يرضي نزواته ومرجعه المرته
هذا الڪلام جان يطخ بعقلي دائما..