🌓تبت على يديه🌓
💎بقلم : ايمان العماري💎
✨الجزء : 59✨
داز هاد نهار وجا نهار جديد .....
فاقت نور بكري طلات على محجوبة منبعد ماطمنات عليها رجعات لبيتها خدات دوش ولبسات حوايج مستورين غير شعرها للي خلاتو مطلوق ...
نزلات لتحت كانت ربيعة وراجلها وبناتهم مزال ناعسين من غير نجاة ونهيلة وبدر الدين لي فاقو بكري ... نهيلة خدات فطورها ومشات لقرايتها .. بدر الدين خرج صباح بكري يصلي الفجر ومشا يدير سبور ... ونجاة فالكوزينة كتقاد فطور اخور ... على حساب هادو لي باقيين مافطرو ....
نور : صباح الخير
نجاة : صباح النور ابنتي ، نحط ليك تفطري دبا ؟
نور : خليك انا غانحطو راسي
نجاة : هزي لي بغيتي كولشي قدامك
نور بتاسمت ليها ومشات الثلاجة يالاه اتفتحها هي تسمع دقان فالباب ...
نجاة : انمشي نشوف شكون
نور : خليك انا انمشي نشوف شكون كيدق
خرجات من الكوزينة كتصاوب فشعرها وتقادو بيديها وهي تحل الباب هوما يتوسعو عينيها تسعييين درجة
عمر : واخيرا قدرت نلقاك
نور بغات تسد الباب فوجهو هو يشدها ....
عمر : صبري نهدر معك بعدا
نور بعصبية وبلغوات : شنو جاي دير عندي هنااا
عمر : جيت على قبلك .. على قبلك انا هنا .... عرفتي من امتى وانا كنقلب عليك ؟ ... .
نور : هاد الهدرة خليها عندك ... ودبا سسييير فحالك من هنا قبل مانعيك ليك البوليس
عمر : شحال وانا كنقلب عليك ماقلت حتى لقيتك ودبا كتجري عليا
نور : كيف درتي حتى عرفتي هنا شكون قاليك انا عايشة هنا
عمر : شفت بدر الدين فاش هزك معاه فطوموبيل لليلة لي كنتي معيا فالقهوة .. فاش مشيت لدار فين كارية مولات دار قالت ليا بلي جرات عليك ... وشكيت فبدر يكون جابك معاه .... بقيت كل نهار كنتبعو لدار .. باش نتأكد واش جابك معاه ... حتى شفتك البارح خارجة من دار وهو يوقف ليك بطوموبيل ... ملي شفتك دخلتي عرفتك غاتكوني ساكنة هنا
نور ولات كاترعد : بععد مني شنو بغتي عندي .. شنو درت حتى دخل ليا لحياتي
عمر قرب بغا يشد فيديها هي تبعد كتغوت حتى خرجات نجاة كتجري من الكوزينة
نجاة : مالك كتغوتي آش واقع ( شافت فعمر ) شكون هدا اش جابو عندنا ؟
عمر : انا عمر الباطرون دنور كانت خدامة عندي فالقهوة
نجاة شافت فنور : هادشي بصح !
نور بالغواات : سير فحالك من هنا متعااودش تحط رجليك فهاد الدار بعععد مني ... سير فحااالك ..سسيييير
سدات الباب فوجهو وتكات عليه كتبكي
نجاة : اويلي مالك هضري .... آش وقع ! ... يكما دار ليك شي حاجة هضضضري
YOU ARE READING
ثبت على يديه🌱مكتملة🌱
Romance💎مكتملة💎 #قصة_دينية بعنوان : #تُبْتُ على يديه ✍️ بقلم : ايمان العماري لا شك أننا أصبحنا في زمن مليء بالفتن والملهيات عن طريق الله ونحتاج جميعاً لتجديد التوبة وتجديد العهد مع الله -جل و علاه- فمهما عَظُم ذنبُك، ل...
