ثبت على يديه🌱مكتملة🌱

🌱الجزء 109🌱

🌓تبت على يديه🌓
💎بقلم : ايمان العماري💎
✨الجزء : 109✨
نور : ملي كنت  باقا عايشة مع ماما عمرني سافرت ولا خرجت برا كازا ماما كانت كتقوليا دوك الفلوس لي تخسري فالسفر خبيهم ماتعرفي تحتاجيهم ولكن مكنتش كندير بهدرتها فلوسي كاملة كانت كتمشي فحوايج و المكياج ( تبسمات بحرقة ) فلخر دارنا شعلات فيها العافية كلشي تحرق ماما ( عينيها دمعو ) دارنا تاهي تحرقات ( وسكتات ملي حسات براسها غتنهار )  ...

بدر الدين : الله يرحمها .. 

نور بصعوبة خرجاتها : امين

بدر الدين : تادابا البلاصة لي بغتي تسافري ليها  قوليها ليا انا نديك ليها

نور : نمشيو لشمال كيعجبني بزاف خصوصا طنجة وتطوان

بدر الدين تبسم ليها : نسافرو ليهم .. نتي غير آمري وانا نفد

نور حدرات راسها بخجل : واش ممقلقش مني

بدر الدين : مناش غنتقلق ؟

نور علات عينيها فيه : من داكشي لي طرا قبيلة

بدر الدين : بحال هاد الامور ماعندي علاش غنتقلق منهم اهم حاجة عندي هي تكوني مرتاحة .. راه قلت ليك كون قلتي ليا مغتقدريش ... مكنتش انقرب ليك

نور : تا انا معرفتش  كيفاش حتى وقع ليا  هاكا ...

بدر الدين :  هادشي علاش  كنت باغي نسولك .. فلول كنتي بيخير شنو خلاك توصلي لديك الحالة

نور حشمات تقولها ليه : والو غير كنت خايفة شوية هدا ماكان

بدر الدين ميل راسو فيها : متأكدة غير الخوف لي دار ليه هاكا !

نور حركات راسها باه بثقااالة

بدر الدين تبسم ليها : مرة خرة متعوديش ديريها الى كنتي مقدراش قوليها ليا متخلنيش نبقا ندوش كل مرة بالما بارد

نور  عضات على شفتها  وحناكها تزنگو ، بدر الدين دور وجهو لجنب الحركة لي دارت حركات فيه بزاف دالمشاعر شوية  هوما يسمعو الفجر كيودن 

بدر الدين : انا نوض نمشي الجامع نصلي .. ونتي صلي ورجعي لفراشك ترتاحي متسناينيش نقدر نتعطل شوية

نور : فين غادي ياك جامع قريب

بدر الدين : ملي كنخرج من الجامع كنتحرك شوية عاد كنرجع لدار نتي غير نعسي راك مانعستي والو هاد الليلة

نور بدون شعور : متعطلش عليا

بدر الدين مسح على شعرها : مغنتعطلش عليك

بدر هز صلايتو ناض خرج لجامع و نور ناضت صلات لفجر وجلسات كتدعي الله يعاونها على هاد المسؤولية ودعات الله يبدل ساعتها بما حسن ويهديها ترجع لطريق المستقيم جمعات صلايتها وناضت حيدات العباية وشال بقات بشورط وديباردور كحل تخشات فراشها ونعسات وبالها مع بدر الدين امتى يرجع لدار