ثبت على يديه🌱مكتملة🌱

🌱الجزء 96🌱

🌓تبت على يديه🌓
💎بقلم : ايمان العماري💎
✨الجزء : 96✨
علاو يديهم كيقراو الفاتحة  وبداو ايباركو ليهم وفرحانين بيهم  بدر الدين ضار عند  نور شاف فيها لقها حادرة رسها و كتسمع لعدول كيباركو ليهم وينصحو فيهم ويدعيو معهم  وجنبها بدر دين كيقول امين وهاز كفوفو لسما تاسالاو وقفو لعدول طلعو لدار لفوق فين كينين رجال  مع بدر الدين لي مشا اوصلهم  هو وصحابو لي شهدو على زواجو غير خرجو هوما يتسمعو صوت زغاريت فدار    

نحاة خرجات دغيا تبعات ولدها شداتو فالباب

نجاة : بدر ولدي

بدر الدين وقف و طلب من يونس اطلع مع لعدول لفوق تما اتعشاو وعاد رجع عند مو

بدر الدين :نعم ا مي

نجاة : ملي توصل لعدول رجع تلبس لنور الخاتم

بدر الدين : الواليدة خلي هداشي حتال منبعد وخا ! .. دابا انطلع لفوق حيت  غيتحط لعشا لناس نقومو بالواجب معهم و نشوفو شي لاخور ( باس على راسها وطلع لفوق  وهو فرحان كيتلقا تهاني من صحابو )

رجعات نجاة لعند نور لي كانت باقا على وضعيتها جالسة ومهبطة راسها كتفرك فيديها كتخفف من توتر للي فيها تاحسات بشي وحدة جلسات حداها ضارت جنبها هي تلقا نجاة جنبها جالسة

نجاة : مبروك عليك ابنتي .. الله يكمل عليكم بالخير

نور بصوت خافت  : امين

نجاة : جيتي زوينة طاح عليك السر

نور تبسمات بعفوية : شكرا اخالتي

نجاة عنقتها عندها : ولدي بدر الدين مقداتو فرحة

نور سرطات ريقها ملتازمة بصمت

نجاة : ياك حتى نتي ابنتي فرحانة بزواجكم

نور سكتات مدة : اه ا خالتي

نجاة : هاهو شوية غينزل بدر باش تركبو لخواتم

نور حركات راسها بآه

#عند بدر الدين

كان جالس معهم وعقلو كامل مع  نور  بداو احطو لعشا  تعشاو رجال  وحتا لعيلات نفس شي وبداو رجال اخرجو  حتا بقاو غير العائلة  جلسو مجمعين لفوق وبدر الدين نزل لتحت تلاقاتو مو وهي دخل معاه لصالة فين كانت نور جالسة  والعيلات ضايرين بيها كلهم من العائلة  مشا حداها وجلس وهي غير شمات ريحتو عرفاتو هو لي جلس حداها زيرات بيديها على قفطانها تاسمعات زغارت دنجاة وشي عيالات خرين من العائلة علات عينيها هي تبان ليها نهيلة داخلة بصينية  فيها تمر والحليب وخواتم دزواجهم لي غيركبو لبعضياتهم

نور هبطات راسها و نهيلة قربات لعندهم   ....

نهيلة : مبروك عليكم اخويا

بدر الدين : الله يبارك فيك

نجاة : الله يرضي عليك اولدي انت ومرتك نور ويسعدكم فحياتكم ياربي ويرزقكم الذرية الصالحة

بدر الدين : امين