ثبت على يديه🌱مكتملة🌱

🌱الجزء 83🌱

🌓تبت على يديه🌓
💎بقلم : ايمان العماري💎
✨الجزء : 83✨
نجاة وسعات عينيها ومشاات عندها كتجري جلسات حداها كتشوف فيها بخوف ونطقات ...

نجاة : نور بنتي مالكي علاش كتبكي

نور  طاحت على صدر نجاة كتشهق بالبكا وكاملة كترعد ونجاة كتمسح على شعرها باقا مصدومة معرفاش اشنو طرا معها وشنو وصلها لهاد الحالة !!!

نجاة : نور مالكي كاتبكي واش شي واحد قلقك ربيعة قالت ليك شي حاجة هضري متسكتيش

نور بصوت باكي : نهار لي كنت طول حياتي كنحلم بيه بحالي بحال اي بنت باغا تزوج وتستقر ودير ولادها ها هو وصل ولكن ماما ( شهقات بجهد ) مشااات قبل ماتشوفني عروسة

نجاة تنهدات : ستغفري الله ابنتي .. ودعي معها برحمة  ماماك ربي بغاها .... وداها لعندو ترحمي عليها .. وهدا راه نهارك ابنتي ... خاصكي تكوني ... فرحانة ماشي تبكي و ديري فراسك هاد الحالة

نور : ماما مشاات وخلاتني وكوون غييير مت انا ومتموووتش هي 

نجاة : اعود بالله آش هاد الهضرة كتقولي

نور : بغيييت نموووت اخالتي المووت هي لي غتريحني اللهم نموووت ولا هاد لعداااب

نجاة كتمسح على شعرها وضهرها : الموت حق علينا كاملين وكل واحد امتى ما كتب ليه ربي غيموت ولكن متقوليش باغا تموتي واليوم نهارك ... اليوم زواجك من ولدي وغتولي عروسة ولدي ( بعداتها عليها )  ... نسيتي بلي اليوم ضريب صداق ديالك

نور سرطات الغصة : منسيتش

نجاة : وعلاش كتبكي وااش غير حيت تفكرتي ماماك ولا  كاينة  شي حاجة خرة مخبياها عليا ؟

نور نزلات راسها بين يديها كتبكي

نجاة : متخبيش عليا ابنتي قولي ليا  مالكي واش عندك شي مشكيل ... شي حد قاليك شي حاجة معجباتكش

نور  :  انا براسي معرفاش شنو واقع ليا وعلاش كنبكي واش حيت ماما ماتت قبل متحضر ليا لزواجي ولا حيت كاينة شي حاجة خرى .... انا ومبقيتش فاهمة راسي اخالتي ومعرفاش شنو لي ضارني فخاطري وبكاني

نجاة : عاودي ليا ياك انا بحال ماماك ولي ضراتك ضراتني حتى انا هضري وقولي ليا شنو ضرك فخاطرك ابنتي

نور شافت فيها وعينيها حمرين بالبكا : خايفة خايفة من هاد زواج .. خايفة بزاف .. معرفاش كيفاش غتولي حياتي من بعد هاد زواج .... انا اخالتي   كنشوف راسي بعيدة بزاف على ولدك تاحاجة مكنتشابهو فيها ... بجوج بينا مختالفين وكل واحد فينا كيفاش عايش حياتو ... انا كنشوف راسي ماشي البنت لي يستحقها ولدك ... ولدك رجل متدين وشاد طريق الله وعارف بزاف دالحوايج فالدين ... اما انا اخالتي مكنعرف والو حتى صلاة مكنصليهاش .. مبغيتش نظلم ولدك معيا 

نجاة  كدوز بيديها على شعرها :  وشنوو ناقصك نتي  باش متديش طريق الله وتولي تصلي وتحجبي .. شنو ناقصك ا نور باش مديريش حتى نتي هادشي

نور كتبكي بحرقة : منقصني والو .. ولكن كنشوف راسي مزال ممقتانعة بهدشي ... ممقتانعة لا بحجاب ولا حتى بهاد المسؤولية 

نجاة : نور سمعيني ابنتي ... ولدي بدر راه مافرض عليك حتى حاجة .. وحتى الحجاب لاكنتي مزال ممقتنعاش بيه مديريهش خليك فدارك وداكشي لي تلبسيه فزنقة لبسيه فدارك لراجلك .... راه تاحاجة مغتنقص لي كنتي كاديريه من قبل تقدري ديريه حتى دبا بغيتي تماكي وتقادي شعرك وتصبغي ضفارك ديري هادشي فدارك و قدام راجلك والصلاة خاصكي تصلي ضروري ابنتي تصلي راها مفروضة علينا  خاصك تأدي هاد الفرص للي عليك والحجاب تاهو راه مفروض على اي مرأة مسلمة ..