أسيرة الشيطان الجزء الأول + الجزء الثاني+ الثالث

الفصل الخامس عشر الجزء الأول

للقلب سلطان آخر
الجزء الثالث
       من
أسيرة الشيطان
الفصل الخامس عشر
الجزء الأول
¤¤¤¤¤¤¤
بناء على رغبة القراء هنحط في بداية كل فصل كل عيلة بولادها عشان الناس اللي لسه بتتلغبط
جاسر ورؤي أبطال الأجزاء اللي فاتت عندهم 6 أولاد رعد وجوري أول تؤام
يوسف ومريم تاني تؤام
سليم وياسين آخر تؤام
-----------------
نرمين أخت جاسر اللي جاسر كان بينتقم من صبري وبنته شاهندا عشانها
نرمين وياسر جوزها عندهم 2
( جاسر الكبير 29 سنة دكتور نفسي
اريج في 2 كلية طب )
ياسر كان ليه بنت من مراته اللي ماتت قبل ما يتجوز نرمين اسمها سما جوزها اسمه مصطفى
______________
عاصم أخو رؤي خال العيال اللي كان بيحب تهاني واتجوز حلم في الجزء التاني عنده ولدين
حسين الكبير مهندس ، مراد الصغير في ثانوية عامة ساقط سنة
_____________
رؤى كان ليها جيران أخ وأخت ساكنين سوا اللي هما عمرو وايمان
ايمان اتجوزت علي صاحب جاسر وعندها شريف الكبير ظابط شرطة ، وليان الصغيرة المدلوقة على الجاموسة جواد
_________
أما عمرو فاتجوز روان بنت صاحب الشركة اللي كان شغال فيها وخلف ولد وبنت
جواد جاموسة متنقلة مهندس ديكور
ومرام دلوعة ماما 22 سنة في كلية إعلام ومخطوبة لشريف ابن عمتها
________
فاضل طرب وملاك ، ومليكة وتوحة وكل الناس دي هنعرف اصلهم وفصلهم فيما بعد
لما تتلغبط اطلع بص هنا وكمل الفصل عادي
نبدأ الفصل ❤
____________
- ما تاخدوش مني يا رعد ، عشان خاطري اوعى تاخده مني
لم يفهم ما بها ولكنه ظل يحضتنها يحاول أن يهدئها وبمجرد ما هدأت هي ، علا صوت صرخات ترج البيت ذعرا تأتي من الخارج ، انتفضت ذعرا حين سمعت صوت شقيقتها تصرخ لتهب تركض لخارج الغرفة وهو يحاول اللحاق بها ، هرعت طرب إلى حيث الغرفة التي مكثت بها شقيقتها بالأمس رأت ملاك هناك تجلس على الفراش تصرخ مذعورة لتهرع طرب إليها تنتشلها بين أحضانها تعانقها بقوة تمسح على رأسها تحاول أن تهدئها :
- اهدي يا ملاك ، اهدي يا حبيبتي ما تخافيش أنا جنبك أهو
احتاجت ملاك بضع دقائق حتى توقفت عن الارتجاف في تلك اللحظة نظرت طرب حولها لترى رعد وشقيقته مريم ووالدته وطفلين صغيران يقفان خلف قدمي والدة رعد ينظران لما يحدث بدهشة ، نظر رعد صوب مريم يسألها :
- حصل ايه يا مريم ، ليه ملاك صرخت كدة
حركت مريم رأسها للجانبين سريعا تغمغم :
- ما اعرفش والله أنا كنت في الحمام ، خرجت لقيتها صحيت لسه بقولها صباح الخير راحت مصرخة ، هي مجنونة ؟
نظرت طرب صوب مريم سريعا تحدجها بنظرة حادة قبل أن تردف منفعلة :
- لو سمحتي أنا أختي مش مجنونة ، ملاك بتترعب لما بتصحى تلاقي نفسها في مكان غريب
حمحمت مريم محرجة تنظر أرضا ، ليبادر رعد يوجه حديثه لطرب متضايقا :
- اهدي يا طرب مش كدة ، مريم مش قصدها حاجة هي اتخضت هي كمان لما أختك صرخت
اشاحت بوجهها بعيدا عنهم تحتضن شقيقتها تبتسم متألمة ، هنا تدخلت رؤى اقتربت منهم تربط على كتف طرب ، نظرت طرب لها مرتبكة لتدمع عينيها رغما عنها ، جلست رؤى جوار طرب تجذب ملاك برفق من بين أحضانها مسحت على رأسها بحنو تحادثها :
- ما تخافيش يا بنتي ، دا بيتك واعذري مريم على كلامها ما كنتش تقصد ، بصي يا حبيبتي طرب أختك اتجوزت ابني
واشارت صوب رعد تكمل :
- ما اعرفش أنتي عرفاه ولا لاء
نظرت ملاك إليه مدهوشة ومن ثم لشقيقتها لتومأ طرب برأسها بالإيجاب تهمس لها :
- ايوة يا ملاك ، هحكيلك كل حاجة بعدين ، اللي عيزاكي تعرفيه دلوقتي أننا خلصنا منها ومن قرفها ومش هتضربك ولا هتهددني بيكِ تاني
لم تفهم ملاك ما يحدث كيف تزوجت شقيقتها في أقل من يوم ولما تشعر بأنها كانت في غيبوبة طويلة المدى ليست نائمة فقط ، نظرت للجمع حولها مرتبكة لتربط رؤى على كتفها برفق تردف :
- دا خلاص بقى بيتك يا بنتي ، وأنا زي ماما ودي مريم قد في 3 ثانوي أكيد هتذاكروا مع بعض ، ودا رعد ابني الكبير جوز أختك ، في چوري أخته التؤام بس دي مسافرة ، أما المقاريض دول فيوسف وسليم آخر العنقود. ، وفي يوسف تؤام مريم ، بس دا عايش في ملكوت لوحده ، ما تخافيش من حاجة ونضفنالك أوضة تقعدي فيها ، وأختك هتنزل مع رعد تشتريلك اللي أنتِ عيزاه ، يلا يا أولاد الفطار جاهز ، رعد شيل ملاك وديها الأوضة الثالثة اللي على أيدك الشمال ، وسيب أختها معاها تحكيلها زي ما كانت بتقول
اومأ رعد لوالدته ليتحرك صوب ملاك حملها بين ذراعيه خرج بها من الغرفة وطرب خلفه تسرع خطاها وقف أمام باب غرفة مغلقة لتسرع طرب في فتح الباب ، دخل رعد إلى الغرفة يضع ملاك على فراشها يحادثها مبتسما:
- اتمنى الأوضة تعجبك ، لو عوزتي أي حاجة أنا دلوقتي أخوكِ الكبير زيك زي مريم بالظبط ، ماشي يا حبيبتي
اومأت ملاك له مرتبكة ليستأذن ويخرج من الغرفة ، اقتربت طرب من فراش شقيقتها لتمسك ملاك بيدها تغمغم متلهفة :
- مين دول يا طرب ، وازاي اتجوزتي بالسرعة دي ، وإزاي أنا جيت هنا من غير ما أحس ، أنا حاسة اني كنت في غيبوبة مش نايمة