حبيتة شرقاوي💜🧸

9

ـ روايـــة # حبيته شرقاوي💜🧸
ـ الحلقه الـتـاســـﻋـه 💜🧸
ـ منقول

نجوى خشت وماركزتش من في الخيمة بالضبط ،
الولد الصغير اللي يمد في اللامبات لمحمد جي يجري لنجوى قبل ما تخش
الولد : يا ابلة ...
تلفتت نجوى : نعم ،
الولد الصغير يشبحلها ومبتسم : هاك نقالك طاح منك ،
نجوى خداته منه وابتسمت : صحيت شكرا ، (وقامت عينها لقت شخص واقف على السلوم يشبحلها وموقف عيونه ، ابتسمت نجوى وخشت للحوش )
محمد قعد واقف يستنى في اللامبات ووقفته ونظرته لنجوى وضحت انه في شي غريب (عجباته )
محمد : هذينا محروقات ، عدي جيب اللي من غادي ،
مشي الولد وجاب الكيسة مليانة لامبات ،
محمد : من هذي اللي خشت توا ؟
الولد اشر على عزوز كبيرة بفراشيتها : هاااذي ؟
محمد : لا ،
الولد : اه اللي عيونها ملونات ؟
محمد : ما شاء الله تكحل واجد ،
الولد : ههه
محمد : تعرفها من ؟
الولد : لا

ميسم مقعمزة جنب خالتها رندة ويصوروا في سيلفيات ،
وجت عينها على نجوى خاشة بالشنطة ،
ميسم : حي نجوى جت ، (وناضت من مكانها ولحقتها رندة )
نجوى مبتسمة لم شبحت ميسم جايتها تجري حطت الحاجات ،
تغمروا بعضهم ،
ميسم : استاااحشتككك هلبا ،
نجوى : والله حتى انا يا غالية ، (وجت عينها على رندة جاية)
رندة ترحب: مرحبتين ليك وحشة (وتغمروا بعضهم )
نجوى : سلمك، كيف حالك شن اخبارك
رندة : الحمد لله كيف حالك وخيينك واميمتك واوبيك ؟
نجوى : سلمها الحمد لله ، مبروك عليك يا حنا و ان شاء الله ربي يهنيك ، ( وقامت الهدية مدتهالها ) تفضلي
رندة :سلمها علاش هذا ، نردوه في عرسك ان شاء الله انتي والشفشة ميسم ،
نجوى : ان شاء الله ،
رندة : تفضلي خشي لدار حطي دبشك ،
*خشت معاها لدار وحطت ساكوها نحت عبايتها ،
بحكم الجو صقع ، لابسة مالية صفراء مخدومة باليد ، بالطي ، وسروال اسود وبدي ابيض عليه خربشات بالاسود ، وشعرها لاماته لفوق ، ولابسة اكسسوار على الذهبي وساعة اسود في الذهبي ارضية العقارب برج باريس مرصع بالكريستال ،
وريحتها من غادي تفحفح ياسمين ،
ميسم : هيااا تعالي نقعمزوا جنب العالة ،
نجوى فتحت شنطتها الصغيرة : استنيني شوية نحط ايلاينر و مسكرا ، نزار عجلني و طلعت هكي
ميسم شافت وجهها في المرايا دارت طلة : شكله ما عنداش صبر بكل ،
نجوى تفتح في الايلاينر : والله ما نحكيلك ، مرات يقلق فيا باستعجاله ، (و تحط في الايلاينر )
ميسم تشبح لنجوى : ياريتني نعرف نديرها زيك الرسمة ،
نجوى مالت منها الرسمة : وووك يا ميسم عينك مقواها ، عيطتي تلبزت ،
ميسم تقرقر : هههههه خلاص معش نشبحلك كملي ،
نجوى : نبصر ره ، انا نرتبك وقت حد يركزلي ،
ميسم : لا عادي عارفة نيتك ، كان عكس ماتلقينيش نضحك
نجوى كملت ايلاينر وتحط في الماسكرا : شنو ميسوووم مافيش موضوع هكي ولا هكي ؟
ميسم : كيف هكي ولا هكي ، قصدك علاقة ولا خطوبة ؟
نجوى : ايييه بالضبط ،
ميسم : تو بعدين نقولك ، غر كملي هيا فيسع ،
* كملت نجوى وناضت ،
طلعت هي وميسم ،
جت رندة نادت على خواتها من العوالة وسلموا على نجوى ،
(طبعا رحبوا وتغمروا وهذاكا السلام الحار اللي يحسسك انك كأنك وحدة منهم ومن العيلة محلاهم ، )
نجوى خشت لصالة كلها منادير مقعمزين الاقارب وبنات العم وبنات العمة وكناينهم ،
اول ما بدت سلمت على ام رندة ( جدة محمد)
نجوى فيها ميزة اي عزوز كبيرة في العمر تسلم عليها وتبوس راسها ،
نجوى : اهلين حاجة كيف حالك ؟ مبروك على بنيتك وان شاء الله بالهني عليها يارب ،
ام رندة : مراحب بيك بنيتي، سلمك ، عقبال عندكم ،
نجوى بوست راس العزوز : سلمك خالتي بارك الله فيك ،
*العزوز فرحت ، ومعنويات وما نحكيلكمش ، وطبعا عيونها في نجوى انعجبت بيهاااا لين خلااااص، و سلمت سلمت سلمت ،
وقعمزت هي و ميسم ورندة ، وخودلك يا ضحك وقررررر ،
ناضت ميسم فرقت الشاهي بالكشكوشة ووراها بنية صغيرة من اقاربهن بالحلويات تفرق ،
نجوى : صحيتي يا حنا ،
*وجت البنية وخدت كعكة مالحة ،
البنية : زيدي خودي !
نجوى : لالا صحيتي ،
* وجت ميسم قعمزت جنب نجوى ،
نجوى تشرب في الشاهي : اييييه شن تبي تقوليلي امبكري ؟
رندة ناضت : شوية ونجيكم ،

نجوى تلفتت لميسم : اي شن بتقوليلي ؟
ميسم : يا حنا شن بنقولك توا ؟ مش عارفة كيف بنجيبهالك !
نجوى : ادوي عاد ، ماتخليهاش في الرقبة هههه
ميسم : انا الحق تعرفيني من حب الطفولة متع صف رابع شبحات من بعيد . .و ماعمريش درت علاقة ، ولتوا ، وتعرفيني ما ندس عليك في شي ،
نجوى : لا عارفاتك يا حنا ،
ميسم : بجديات ركزت في روحي لقيت قلبي مايل ل ،
* قاطعتها رندة ،
رندة : ميسم وين نقالي حطيتيه ؟
ميسم : فوق دولاب المطبخ ،
رندة : غاااادي مالقيتي وين تحطيه ؟ ( ومشت )
نجوى : اي مايل طايح لمني ؟ هيااا الفضول قاتلني ،
ميسم : ...

يتبع...