حبيتة شرقاوي💜🧸

69

روايـــة # حبيته شرقاوي💜🧸
ـ الحلقه التاسـعه والـ๛ـتون💜🧸
ـ منقول

نجوى : بنت خالته صحبتي ..
جمال : انتي صاحبة وحدة عندك اللي هي ميسم صح ؟
نجوى : صح ..

خشت ريمة بعدما كانت تتصنت في الدوة : ياااا عيني صااار ميسم هي اللي مدبرة عليك ؟
نجوى ساكتة ووجهها متغير ..
جمال شبح لمرته شبحة قوية : اطلعي انتي !! انا نتكلم مع البنت انتي اطلعي منه الموضوع ..
ريمة : والله ؟
جمال : اطلعييي
طلعت ريمة متكنطية من الدار ..

قام عينه جمال ع اللابتوب ناض خداه وسكره ..
جمال : بنتي صحبتك هاذي بتفسد عليك وجايبتلك ولد خالتها تبي تفسدك .. وانا ماعنديش بنات يديروا علاقات .. اللي يبيهم يجي من الباب الدوة الفاضية ماعندناش ..
نجوى وجعها كلام بوها في وسط قلبها وحست نفسها انها حصلت الهزايب بالادب وهاذي اللي تقتل .. احرف حتى من التعنيف والضرب ..
جمال كيف جاي بيطلع من الدار : النقال والنت انسيه لين يجي نصيبك وتتوكلي على حالك .. وهو كان ولد عيلة وولد ناس تو يوصلك يوصلك و يجيب اماليه ..
وكيف بيطلع من الباب ...
نجوى : بابا !!
جمال : نعم !!
نجوى : كان جي بالله عليك ما ترداش !!

جمال موقف عيونه في بنته وطلع وسكر الباب وما تكلمش ولا كلمة
جمال في داخله *(البنت واثقة حتى بيجي بيخطبها !! ) وقعد يتذكر في أيام علاقته بريمة وكيف كان يقوللها بنجيب اماليا وبنخطبك وكيف رفع امه تخطبها .. وقعد يحكي في نفسه *( يطلع زيي ؟ مرااات .. لكن مفرخ توا يلعبوا وماعندهمش كلمة )
ودس اللابتوب في الكاصة ..

ونجوى مقعمزة ولابسة بدلة الصلاة تخمم وتفكر في كلام بوها اللي قعد زي السم في نفسها وتقول في داخلها :*( انا خسرت ثقة نزار وبعدين امي .. والاهم ثقة بوي وخذلته .. يا خسارة .. مشناه الشعور .. توا بنقع دمعاهم في الحوش ويقعدوا مخونيني وحتى الحرية اللي كانوا عاطينهالي خلاص .. بيبدا التقييد وبيحاولوا يحاصروني . واهي اول حاجة النقال والنت )
فاتوا أيام ونجوى عندها شفرة اللي بعتهالها محمد وتخمم تبي تكلمه واطمنه ماتبيشي ينشغل عليها ..
وادور بالك في نقال حتى بيلة عادي وتتصل بيه وتتطمن !! ما لقتش ..
*عند محمد قعد مشغول ويدور هني وهني ومرة بالسيارة ومرة بالموطو وبين محل الإطارات اللي يشتغل فيه وبين القهوة مع الشباب وكل وقته تخميم في تخميم ..
محمد : كنها ما فتحت ولا اتصلت ..زعما شنو صاير معاها (وفتح النقال ويتفقد كل شوية في الماسنجر بالك فتحت ايميلها بالك اونلاين )
واحد من الشاب : هووو محمد ..
محمد : نعم ..
الشاب : كنك ؟ سارح في شنو تخمم ؟
محمد : شي بس نخمم في سفرة بكرا ..
الشاب : امورك ماشية تمامم ..والجو تمام .. عليش تخمم أخرى ؟
محمد تنهد : .....ااااه
الشاب : كنك احكي شنو فيه ؟
محمد مايحبش يفصح على الجانب العاطفي اللي فيه او يحكي لحد من الشباب يحب يكون اكثر قوة .. لكن ملامحه الكئيبة خلاته يفشل في انه يداري هذا كله من تخميم وتفكير ..
محمد في داخله : *(ياربي صبرني زعما شنو صاير معاها مرايف عليها واااجد .. ياربي ماتحرمنيش منها وتقعد في اقرب وقت مراتي وام عيالي ..
(
وتفكر ميسم :هي خلي نتصلوا بميسم بالك تعرف اخبارها !! واطمني !!
واتصل بميسم ..
ميسم تكلم في نزار وقتها ..
ميسم : كيف يعني ؟ قصدك امك وافقت على موضوع نجوى وولد عمتك ؟
نزار : ايه لكن بوي رافض ميلاد دام نجوى رافضاته !! قال الكلمة الأولى والأخيرة للبنت
ميسم : زعما ما تقلبلاش راسه عمتي ريمة وتقنعه ..
نزار : انا معاها شن اندير !!
ميسم: امممم باهي وكان اقنعوك حتى انت على صابرين يا خوفي وخلاص تسيبني
نزار : ما يكتبهاش التاريخ نسيب حب عمري ونمشي لبنت عمتي اللي مافيش ولا مرة جي بيني وبينها كلام ..ولا هدرزة ..
ميسم : بكللل بكلل
نزار : أي نحكي لم كبرنا كل حد في حاله ..
ميسم شافت مكالمة الانتظار من محمد : حبيبي مكالمة في الانتظار نشوفها ونرجعلك ..
نزار : مني ؟
ميسم تلكمست : ااااا خالتي ..
نزار : باه ..
ميسم : أي حقا خيرها معش فتحت النت نجوى ؟
نزار : مش عارف !! بالك خدوه حتى هو ..
ميسم : اااااا ان شاء الله خير وخلاص ..
نزار : ان شاء الله ..

يتبع...