حبيتة شرقاوي💜🧸

103

روايـــة # حبيته شرقاوي💜🧸
ـ الحلقه المئه وثلاثه💜🧸
ـ منقول

نجوى : ايميل باعتلي تهديد وبعتلي الصور ،
محمد : ديري سكرين بسرعة وانسخي رابط الصفحة الشخصية ،
نجوى ترعش وخايفة : تمام ،
محمد : شنو صار ؟
نجوى : درت ،
محمد : تمام ، ديري بالك اتردي على الرسائل ، استقبلي بس . خلي نشوفوه لوين بيوصل ،
نجوى دموعها ينزلوا : علاش هكي به ،
محمد ما اتحملش دموعها واتكنطى : وراسك يا غالية حنعرف من ، يحسبوا فيها انهم كان داروا هكي بنخليك ، غالطين وغلطوا غلط كبير دام طقوا فيك ومسوك ، (ومقعمز على السرير وياكل في روحه و اعصابه)
نجوى تشبح تحت وتبكي وتمسح في دموعها : هاذم يبوا يفرقونا ، شوف اقرا السكرين ،
محمد يقرا قعد يفنص من الغضب : الكلب هظا كان نمسكه ، خلاص حبيبي معش تبكي وامسحي دموعك ، انا بندير تليفوناتي و راجعلك نشوفوا حل للمهزلة هذي ،
نجوى هزت راسها "به" وتشبحله ودموعها على خدها
*صكر محمد وقعد يحاول يتصل بفرج مقفل قاعد ،
محمد : خلي نشوف رقمه فايبر ،
وبالفعل مشي فتح فايبر وطلع رقمه لقاه "متصل بالانترنت"
محمد : السلااام يا بي تي وينك
فرج: اووو باش محمد ، شنو جوك ؟
محمد : الحمد لله تمام الامور . تي وين اتصلت بالشركة قالوا يهيج في تركيا ،
فرج: اهاا ، ورديت ليا ثلاثة ايام ،
محمد : والله ؟ في بنغازي توه ؟
فرج : لا والله ، في طرابلس ، عليش في حاجة ؟
محمد : والله نبيك في خدامة يا بي ،
فرج: من عيونا كل خدماتنا ليك يا محمد ،
محمد : بارك الله فيك ، فيه ايميل تقدر اطلع مكانه وين بالضبط ،
فرج : والله يا بي !! (وسكت) امتى تبيه ؟
محمد : مدابيك توه ، ضروري ،
فرج : تمام اهو حتى مبارة البرشا نفوتوها على خاطرك ، انا اهو مروح من القهوة نوصل للحوش ونكلمك شن صار ، دزلي الرابط ،
محمد : مشكور يا بي ، بارك الله فيك ،
*وصكر محمد وعلى ثقة ، انه حيعرف من او اقل شي يشد راس خيط ،
*في حوش انسام * في طرابلس ،
الثلاثي الخسيس ملتمين وساهرين على النت ، سارة انسام فاطمة
سارة متكية على المندار تقهقه وتضحك ،
ويمينها فاطمة متكية . وانسام يسارها ،
انسام : اكتبيلها اكتبيلها ، قوليلها ابعتي كرت خير ماننشروا الصور ،
فاطمة شبحت لانسام : مبردك يا انسام تافهة هلبا ،
سارة : حق اي خلي نفلسوا بيها ، اصلا هي عيلة فلاويس هههههه
فاطمة : الفكرة مش خاشة راسي من اساسا يا سارة كان نصيبك والله مايقدر حد يفرقك عليه ،
سارة شبحت بجنب لفاطمة باستهزاء وقلبت عيونها : بري مشناك تجيبي الكآبة ، محمد هذا كان ما خدانيش نبدا انا كلبة وبنت ستين كلب (حشا القاريين)
انسام : قوليلها ابعتيلي القفطان الاحمر ، عندي عرس الصراحة ههههه
سارة تضحك : هههههه لا هلبا هكي ههههه ، (وعدلت روحها) غر شوفوا شن بنكتبلها ،
نجوى متكية تخمم ،:* ( لو يطلع ولد اللي يهدد !! عاطياته سارة صوري معناها خلاص انتهى كل شي ، )
وفكرة ترفعها وفكرة تيجيبها :*(شن موقف اهلي قدام الناس لو انتشرت صوري ؟ ياربي ، عمتي تتشمت وامي وبوي وخوي مايقدروش يقيموا عيونهم في الناس ، )
كل ما تذكر محمد وكلامه وفزعته ليها ، ترتاح شوي ،
*سمعت صوت رسالة ماسنجر ،
نجوى مترددة تفتح المسج ولا لا ،
نجوى : خلي تنبح مش رادة عليها ، ..
بعدين فتحت النقال وقرت الرسالة انصدمت !!
نجوى : حي عليا حي ،هاذم بيستغلوني ، ياربي انتقملي منهم وسلكني من بين ايديهم !(ورجعت دارت الرسالة غير مقروء)
واتصلت بميسم ،
ميسم مقعمزة في دارها ومكسدة تاكل في السمينسة : الزفت لا رصيد لا نهارات باهيات ، يارب تتصلي يا نجوى يارب ،
وشافت نقالها ، لقتها تتصل .
خداته بسرعة : اهيا تتصل ، (و ردت )
نجوى : ايوه ميسم ، كيف خالك ،
ميسم : والله توا ندعي ونقول يارب تتصلي ، بنكلمك رصيدي تم في النت ، قعدت على نار ،
نجوى خشت في الموضوع طول : قالي محمد كل شي .
ميسم : ان شاء الله غر ما قلتيلاش قالتلي ميسم .
نجوى : لالا درت روحي ما نعرفش ، المهم وانا نكلم فيه توا فيديو جاني ايميل يهدد باسم بنت ،
ميسم : حي عليها هاذي حي ، غر اسمعي انا نبي نكلمك وما حصلتش بنقولك ان غدوة بنمشي لحوش جدي بنبات . ومش مبينة شي لين ناخد نقالها ،
نجوى : محمد توا قال بيدير مكالماته بيعرف الايميل لمني .
ميسم : ووووه يبيلك بش بيعرف ، احني عارفين ان سارة ، لكن لازم نشدوا دليل ، مانبيش كلام بس والعيلة تخش بعضها واللوم كله يحطوه فيا ،
نجوى : فهمتك ، به كيف الحل ؟
ميسم : احني مش حنستنوا محمد ، وصل هو قبلنا اللهم بارك وصلنا احني باهي ، خير وخير ،
نجوى : ايه بنقولك ، حصلته الكرت حقا متع الولد هذاكا ،
ميسم : كيف مش ماخديتيشي ؟
نجوى : حاطه في الكيسة لم فات من جنبي شورا ،
ميسم : غررر قووولي الحق ،
نجوى انفعلت : بلا برادة ميسم ، ماتخلينيش نصكر توا ،
ميسم : باهي امالا ابعتيلي رقم الكرت في رسالة ، واول مانحصل رصيد تو نكلمه نشوفه يفتح في الباسوورد ولالا ،
نجوى :به تو نبعتهولك امالا
صكرت نجوۍ

يتبع