حبيتة شرقاوي💜🧸

81

روايـــة # حبيته شرقاوي💜🧸
ـ الحلقه الواحده والثمانون💜🧸
ـ منقول

نجوى : ربي مايحرمني من وجودك ، غيرت نظرتي للحياة وبدي عندي امل !!
محمد : وشن هو الامل !!
نجوى : ان نعيش مع شخص حنون ويفهمني ويحميني تحت جناحه من الناس هاذي كلها !!
محمد : كلامك عيشني في اجواء اخرى شاعرية !! ههه
نجوى : ههههه تتسهوك ولا بجديات
محمد : اها والله بجديات ،نحب تعبيرك اللي باين هكي ،طالع من القلب !!
________________
نجوى : وانا نحبك انت
محمد : انا فتها درجة الحب ووصلت للعشق ويمكن اكثر !!

نجوى سكتت معش عرفت شن تقول !
محمد : مش كانك حدايا توه ، خير من الدنيا وما فيها !! ؟
نجوى تنهدت :ايييه والله !!
محمد : هانت هانت ، معش واجد !!
نجوى : ان شاء الله خير !!
محمد : توا خشي ارقدي حتى السهر مش كويس ليك !!
نجوى : حاضر ، حتى انت ارقد ماتسهرش وراك موعد طيارة !!
محمد : ان شاء الله ،
* تاني يوم الفجر*
ناضت نجوى ناشطة ومتفائلة خير صلت الفجر حاضر وقعدت تدعي ( يارب تسخرلنا الحال انا ومحمد ونتزوجوا على خير، يارب ماتحرمنيش منه يارب يارب ، يا مسخر سخر يا مسهل سهل علينا كل شي ، وتقتنع امي بيه وتعرف انه انسان كويس ،
* وهي تستغفر وستستغفر ، نزلت عليها راحة .خدت غفطة ساعة ،في مكان الصلاة ورقدت نوم عميق
* عند محمدفي تركيا ، ناض على الموعد خدي شنطته وطلع من الفندق بتاكسي ولحق على الطيارة ،
نجوى فاقت من غفطتها وشافت النقال ، لقت مسج من محمد ( حبيبي انا كيف وصلت المطار ، نوصل تو نكلمك) خشت للمطبخ خدت طاسة الشاهي وطرف بسكويت ، وبدت تغسل في خضرة العصبان وتعول ،
ناضت ريمة لقتها واصلة في الكبدة واللحم تقرض فيهم !!
ريمة : صباح الخير !
نجوى : صباح النور صحة النوم ،
ريمة : سلمك ، خلي نمشي نصلي ونجي نخش ندير معاك ،
نجوى : هي امالا ،
* نجوى تعول ايد بايد وقريب يكملوا ،
نجوى : زايد يا امي الكسكسي مش لازم ،
ريمة : بوك يحب العصبان مع الكسكسي المسقي عقله !

على خشة جمال مع ال11 كيف نايض من النوم : ربي يعاااون ،
الزوز : سلمك !!
نجوى : بابا نوتيلك الفطور !!
جمال : تمر ولبن بسس !! ماتزيديش عليهم !
نجوى : حاضر !
*وتي الغذي
جمال يبطم في سوريته ويلبس في الفرملة : نجوى كلمتي حناك البارح ؟
نجوى توتي في السفرة : كلمتها ماتبيش !!
جمال : شن قالت ؟
نجوى : قالت سلامتكم انتم والعصبان !! حرجانة ع خاطر بنتها !
جمال : ماتصدق بش تحصل حاجة تحرج على خاطرها
ريمة : اكيدة هاذيكا جميلة شاحنتها ،
جمال : شي اكيد ، امالا شن متوقعة منها ، اسمعي بنتي حوليلها منه الكسكسي وحطيلها معاه عصيبينات ونزليهملها !
نجوى : حاضر ،
جمال : وين خوتك ؟
نجوى : اليووم جمعة شن عارفهم ، بليستيشن !
جمال لولاده الزوز : هياااا بالك انت وياه زود معاي لصلاة الجمعة وبعدين كمل لعب
بدلوا الصغار بسرعة ومشوا مع بوهم للجامع !!
نجوى خدت الصونية ونزلتها لحناها وهي كيف بتخش لقت عمتها كيف واصلة وميلاد وصابرين كيف خشوا قعمزوا ،
نجوى : السلام عليكم !!
كلهم مابوش يردوا حتى العزوز ،
خشت نجوى : اهي حناي صونية كسكسي وعصبان حسبنا بحسابك ،
وطلعت نجوى .
جميلة حدفت الكلام : شوي عصبان ترطبوا في الجو زعميتك ؟
نجوى تلفتت : نعم شن تفضلتي ؟
جميلة : ارفعيها الصونية مانبوا منك شي
نجوى : هاذي لحناي !
جميلة : امي ماتبيش تعالي ارفعيها !
نجوى مابتش تعدل على عمتها وركبت ،
خش جمال لامه سلم عليها وسلم على اخته وكلهم سلموا سلام بالغشاش ، تلفت لصونية لقاها زي ماهي !
جمال : خيرك امي ماكليتيش غذاك !
خيرية : ارفعه مانبيشي !
جمال : وعلاش ؟
خيرية : تركبوا في مفرخكم علينا ، وتبيني ناكل منكم ؟ ارفعه
جمال : علاااش
خيرية بصبعها : لالا ارفعه ، والا ننكته لدجاج ،
جمال : بتعطيه اعطيه انا مش مركبه ، (ومشي طلع)
خيرية : لم دبشك انت ومرتك وصغارك ، دوروا وين تسكنوا الحوش الفوقي بنأجره ،
جمال تلفت وولى : كيييف؟
خيرية : معش نبيكم معاي دوروا وين تسكنوا ، برا دبر انت وهي !
جمال عيونه زغلو وشبح في اخته : انتي اللي قالبتيها ، لكن ادور الدنيا يا جميلة وماتلقيش الا في خوك وصغاره ،
جميلة تنفخ وتكوش ودايرة رجل على رجل مقعمزة على الكرسي وتهز في رجلها .
جميلة : راي امك مش رايي ، (وتشبح لتلفزيون)
جمال : تي والله انتي اللي وراه هذا كله ، (وركب متغشش وكامدها وعيونه محبوسات فيهم الدمعة ، امه اللي هي امه ماخلاهاش يرفع فيها للحجاج والعمرات ويدلل فيها هو مرته وقايم بيها هي واخته وصغارها ويصرف عليهم زي صغارها ، و يديروا فيه هكي ، توجع)
* ريمة شافت راجلها خاش قعمز على السفرة وجهه متغير ومتاثر لين خلاص
ريمة : خيرك شن فيه يا جمال ؟
جمال : امي ..
ريمة : خيرها ؟
*نجوى جاية بصواني السلاطة حطتهم وقعمزت
جمال قام عينه في بنته ومرته يهز في راسه متاثر : قالت نبيه الحوش بناجره
ريمة : كييف ؟ وحني وين بنقعدوا ،

يتبع...