حبيتة شرقاوي💜🧸

190

روايـــة # حبيته شرقاوي💜🧸
ـ الحلقه المئه والٺسـ؏ــــون💜🧸
ـ منقول

محمد : شيلي الملاية مافيه حد حتى رمزي مش هنا !!
نجوى : مش زي في حوشي واخدة راحتي !! ، نحطلك غذاك ؟
محمد : اها شنو مطيبة ؟ ( وهو وراها لاحقها للمطبخ )
نجوى تعول وتحط في الصونية ع السفرة : رز ابيض وفصوليا ، ومبطن !!
محمد يا سلااام ( وقررب جنبها ، وخدي راسها بدراعه ضمها ليه ) والله ربي يحميكي ليا ( وبوس راسها )
نجوى زاهيتلها وتضحك ،
على نوضة خميسة من الفراش كيف بتخش الحمام ، تلفتت للمطبخ لقت محمد ضام نجوى ويضحكوا ويوشوشوا !!
ابتسمت خميسة وولت لمكانها منغير ما يلاحظوا ،
وفي نفسها ( يارب تهنيهم. وتحميهم من شر الحساد )
نجوى شادة السفرة : هي تعالا لصالة غادي !!
محمد خداها منها : انتي تعبانة بين فوق وتحت ، وضمان وعوالة ، !!
نجوى فرحانة بمحمد وهذاكا حدها !! قريب اطير !!
طلعت خميسة من الدار : حميدا جيت !!
محمد ياكل ومقعمزة جنبه نجوى قام عينه : امدللة ، يا غالية كيف حالك اليوم ؟ ( وناض من مكانه ومشي سلم عليها وبوس راسها)
خميسة : ربي يهنيكم ويرزقكم بالذرية الصالحة يارب !!
محمد : ان شاء الله ان شاء الله !!
رجع مكانه وخشت خميسة للحمام * حشا القاريين*
محمد : توا الاسبوعين الجايين بنعدي انا وهي للحج ، تبي نشيلك لهلك ولا تقعدي هنا ؟
نجوى : عادي ارفعني لطرابلس !!
محمد : ان شاء الله باه !!
.
.
تسريع للوقت ، وتاني يوم !!

* في طرابلس * مع المغرب *
خشت ريمة لحوش عزوزتها العمارة اللي كانت تسكن فيها وتسترجع في ذكرياتها ، وتشبح في الدروج يمينها اللي يركب لشقتها الاولى !!
وتتتخيل في طيحة نزار " الله يرحمه" من الدرج لم كان عمره ثلاثة سنين ، ودوشة نجوى وخوها في الجنان يلعبوا بالشاكليط ، وتسمع في وذانها ضحكتهم وعياطهم ،
ريمة : الله على هاذيكا اليامات !!
قطعت افكارها صابرين مكبهة من الشقة " متع ريمة وجمال قبل "
صابرين : تفضلي مرت خالي خيرك واقفة !!
ريمة : هي انا جاية . وين امك لوطا ولا فوق ؟
صابرين : كلهم فوق تعالي اركبي !!
خشت ريمة وهي تشوف لكل زاوية كيف تغيرت ، كيف ولت عادية جدا وبدون دوق نازك وراقي كيف ما كانت قبل !!
سلمت على جميلة وهنتها وخيرية ، وكلهم ملتمين !!
خيرية : خيرها نجوى ماجتش ؟
ريمة : كلمتني قالت قعدت مع عزوزتي مانقدرش نخليها بروحها !!
خيرية : اخسااارة !! بتمشي معانا لصالة ؟ عازمينا ، قالوا تعالوا دامكم مش دايرين شي !!
ريمة : لالا كان مش قاعد حد في الحوش . وقت طلعتكم تو ناخد وجهي لحوشي ،
تفكرت خيرية ان نزار ماسكرش العام وقالت : ايه صح عندك الحق جميلة بتقعد و حتى انا مش ماشية قلتلهم بروا ، اقعدي معانا كنهذا !!
ريمة : كان هكي باهي !!
* في الصالة عند امالي سارة *
طلعت سارة يدرجوا فيها ، وميسم مقعمزة هي وريماس وزينب وعلى خشة صابرين هي وبنات عمتها جو سلموا وقعمزوا !
ميسم ادردش على نجوى : كيف درجوها توا ، كان تشوفيها كيف طلعت ،
نجوى مقعمزة جنب محمد متكي ويتفرج على التلفزيون
وعزوزتها حتى هي ،
نجوى : كيف ؟
ميسم : المكياج حلو لكن التسريحة ووووك ادره الكبد !! تقول حشو الصوف متع المخاد ههههه
نجوى تضحك وتكتب : ههههههه ، ربي يتبتها في مكانها ،
ميسم : ان شاء الله تهني روحها !!
محمد خدي المفاتيح وناض : بنعدي نجيب بيتزا عشاء ، شن رايكم ؟
نجوى : على راحتك عادي !!
محمد : امي في شنو خاطرك ؟
خميسة : اللي يجي منك عادي !!
محمد : باهي !!
* وطلع *
* في طرابلس * في الصالة *
خش ميلاد لابس بدلة رسمية رصاصي وقرواطة حمراء طويلة ومرخية ، خاش يلهد في هذاكا الممر والجاكة مفتوحة تفر من سرعة المشي هههههه
سارة تشبحله ومش عاجبها ، وهو عيونه يضحكوا ، ويفرفش عليها !!
خداها من ايدها يشح فيها شحان لا رومانسية لا بطاطا ، هههه
سارة قريب عثرت : هااا خيرك قريب طيحتني !!
ميلاد : به هيا
وهي تساوي في الفيلو ، وطلعوا !!
وخداها للحوش وزغرطولهم وطول ركب بيها لشقة الثالثة " شقة نزار اللي كان بيتزوج فيها ميسم "
سكر الباب قربعه من فرحته ،
مشت سارة قعمزت قالبة وجهها !!
ميلاد : ماشفتيش دار النوم ، تعالي نوضي وانتي قعمزتي طول ، !!
سارة بابتسامة مجاملة : خليني نتفرج على وسط الحوش
ميلاد : باهي على راحتك !! ( وخش للمطبخ وفتح الثلاجة وعيط منه غادي ) تبي عصير !!
سارة اتمتم : نبي سممم !!
ميلاد : اها ؟
سارة : مية بس !!
ميلاد : به ( وصب عصير في الطاسة جغمها في مرة وحطها بغجرية على الطاولة طااااف)
وطلع من المطبخ !! بطاسة المية
قعمز جنبها ومدهالها ويشبحلها !!
سارة شربت المية وناضت : بنمشي نبدل ، تعبت من الكعب ،
وميلاد وراها تلفتتله : ماتلحقنيش !!
ميلاد : تتوحمي عليا شكلك ، به بري هي !!
وقعمز محبط ، وهي سكرت الباب وراها !!
* في بنغازي *
بعد العشي وكملت نجوى الحوسة !!
خشت خميسة واتكت في فراشها !! واطمنت عليها نجوى وغطتها وسكرت الضي !!

يتبع...