حبيتة شرقاوي💜🧸

39

روايـــة # حبيته شرقاوي💜🧸
ـ الحلقه الــتْـاسـعه والثلاثون💜🧸
ـ منقول

ومشت طلعت نجوى هي وميسم ، للخيمة برا ، وسارة قاعدة مدفونة في الحوش ، ومعندهاش نية تطلع ، قاعدة بالبيجامة وشعرها لاماته فوق والوجه مستصفر من صدمة الصبح ،

خميسة خشت بتفتح الدولاب بتاخد ساكوها ، تلفتت لقت سارة متكية ،
خميسة : سارة كنك ما لبستيش لتوه ،
سارة : ماعنديش نية ،
خميسة : صبي و البسي ، مش خير منك ، اللي لبسن كلهن وقعمزن في الخيمة ،
سارة ناضت من مكانها وما بتش تعدل على كلام عمتها ،
ومشت لبست وشاحها ، وعبايتها ، وطلعت من الخيمة سيبتهم ولفت وراء الحوش ، وخشت مع المدخل ، ( حوشهم الدور الثاني و مهند عمها الثالث)
وهي راكبة مع الدرج لقت محمد نازل ،
محمد شافها بنت ، واطى عيونه ونزل يجري ،
خشت سارة للحوش ، وخدت بطانيتها واتكت في فراشها تخمم ،
سارة : شن اللي درته في عمري ، ياريتني ماعرفته ، هو من الاساس امه ماتحبش عيلتنا ، كيف كلمته بس ، بعد هالفضيحة !!! ياريت نعرف محمد من قبله ، خير من هذا العيل ، مخلي امه تفتشله حتى في النقال ، (وغمت راسها واتكت)

*في الخيمة ، النسون بدوا يزيدوا ، واللي جاية صدارة واللي لابسة الثراث ، واللي تخليلة ردي مفتوح واللي بدلة صغيرة ، وشرقاوي ،
خدوا الصدارات الصف الاول ، من الكراسي ،
وطلعت ريماس منفخة مع بعضها مسكينة من الحمل ، ولابسة البدلة الكبيرة ،
وحدة من النسون تلقح من الجيران وتضحك : ريمااس غر من لايم عليك تلبسي صدرة ، شكلك زي الدبة فيها ،
ريماس : وانتي شنو واجعك ؟ جت النية فيها ولبستها ، (تكنطت ريماس وتحسست من كلامها)
المرا : غر خيرك تكشخي نبصر عليك ،
ريماس سكتت وقعدتت متكنطية ،
جت نجوى وميسم جابوا كراسيهم وقعمزوا ،
ميسم : رمووسة خيرك ؟
ريماس : هاذيكايا مرت "فلان" تنكت عليا وتضحك ،
ميسم : خيرها شن قالتلك ،
ريماس : قالتلي من لايم عليك طالعة زي الدبة في البدلة ،
نجوى : ماتعدليش عليها ، خلي جوك حلو ، والمهم ماتقعدش في خاطرك ،
ريماس :اهاا والله و كان مالبستهاش ، مش عارفة شنو بيصيرلي ، تجيني زي الخنقة في رقبتي وبنبكي،
نجوى : هذا البيبي هو اللي يبيها مش انتي، وماتعدلي على حد ، الناس ماتحبش اللي معنوياته مرتفعة وواثق من نفسه ، ضروووري ينزلوله معنوياته ،
ريماس : عليك نوور ، هظا هو ، خديتها من فمي ،

وعلى قرب جية الكسوة ،
رندة قامت نقالها واتصلت بأحمد " خو ميسم "
رندة : تعالا خود رشاشة مية الزهر ، طلعوها معاكم ، بش ترشوا بيها لم تضرب النوبة ،
احمد متفاجيء : قصدك جايبين نوبة معاهم !!
رندة : امالا شن انقولك انا من امبكري ،

وصكرت رندة مكالمتها ،
وبعتت حد من الصغار ينادي ميسم ونجوى ،
البنية : ميسم . قالتلك رندة تعالي انتي ونجوى .
ناضت نجوى وميسم خشوا لرندة ،
ميسم : رنوود ، ناديتي !
رندة : اي تعالي انتي وانجوى نعطيك عبي البخاخات بالزهر ،

ومشوا وراها ، ونجوى تقيم في الساري على كتفها وتعاود ،
طالعة تهبل ، وميسم حتى هي ،
طلعت رندة ٧ رشاشات نحاس ،
رندة : هاك شدوهم ، وهاذي شيشة الزهر ،
شدت ميسم هي ونجوى الحاجات و طلعوا ،
لدار التانية وسكروها . وقعمزوا بدوا يعبوا فيهم ،
نجوى : محلاااااااااااه يهبللل ريحته قوية .
ميسم : هذا تعرفي طلعنا على خاطره بالتعني الاسبوع لفات انا ورندة ، جبناه من مرا تقطر فيه ،
نجوى : ريحته تغشي الحق .
عبوهم وكملوا ،
ميسم : هاتيهم اللي عندك نحطوهم في الدولاب ندرقوهم ،
نجوى : علاش ، اهي الكسوة على جيتها ،
ميسم : وين نندروا يصبولنا فيهم سخطة يقربعوا علينا العرس ،
نجوى : لا حول الا لله ، كيف معقولة في ناس هكي ادير ؟
ميسم : خيرك في عرس امي تحكيلي فيها ، قالت مرت عمهم لقوها جايبة مية معاها وتصب فيها في الرشاشات ،
نجوى : به شن صار ، ؟
ميسم : وحدة تكلمت بعد ما ختى بخوها ، وصارت تفركيسة ومشكلة بين التريس برا ،
نجوى : شن الناس هاذي اللي بلا ضمير معقولة توصل بيهم الدرجة انهم يخربوا عرس !!
ميسم : الباهي والمش باهي في كل مكان ،

* وجت الكسوة وكلاكسات ،
وطلعت ميسم نادت على احمد ،
احمد يفنص : خشي ومديهم لحد من الصغار يجيبهم .
مدتهم ميسم للولد الصغير ،
خدي احمد من الوليد الشيش النحاس هو و محمد ،

وكل واحد من الشباب شد وحدة ، ونزلوا النسون بالسوابيت و خشوا للخيمة ، والتريس اللي جايين مع الكسوة نزلوا يسلموا والنوبة تضرب والشباب محمد واحمد ومهند وغيرهم يرشوا في الزهر ،
ونجوى و ميسم يرشوا في الزهر حتى هما داخل ويزغرطوا
والصبايا بيهبلوا لم سمعوا النوبة ، ويرقصوا في الخيمة
رندة برداها البودري تتفرج على نوبة كسوتها من فوق السطح هههه (شعور محلاه)
و الصدارات يخشوا وحدة وراء التانية و النسون والصبايا لجايات مع الكسوة خاشات شادات السوابيت في ايديهم وزغاريط ، ودايرين سلة ذهبية كبيرة ، مليانة شكلاته واللي تخش تاخد . .. وخوات العروسة ..

يتبع..