حبيتة شرقاوي💜🧸

155

روايـــة # حبيته شرقاوي💜🧸
ـ الحلقه المئه والخامسة الخمــ๛ـون💜🧸
ـ منقول.

نجوى تشوف لمحمد مش على بعضه استغربت ،
محمد لنجوى : مداومينلها على دواها في موعده ؟
نجوى : ايه اكيد ،
محمد سكت سكت ، وجبد شكارة الدواء ،
وخدي حكة الدواء ، صوره بنقاله
نجوى : شن ادير ؟
محمد : عندنا جارنا مريض بالجلطة حتى هو ، صورتهوله بنبعته لولده ،
نجوى مشت خشت للحمام ،
محمد طلع بيرو من جيبه ، فتح المغطة متع الدواء ، وخربشها من داخل ، وردها سكر الحكة وحط الكيسة في مكانها !!
رقدت ريمة وخذاها النوم !!
نجوى طلعت من الحمام ، اشرت لمحمد ، " هيا نطلعوا ، وقف محمد : هي ،
، وجبدت نجوى الستار على امها ،
طلعت وسكروا الباب ،
نجوى : نطلعوا لجردينة الخلفية ؟
محمد : ااا ؟
نجوى : شن اهاا ؟ حبيبي خيرك اليوم ، مش على بعضك ؟
محمد رخي ابتسامته : لا شي !!
نجوى :هيا باهي ( وشدت ايده )
طلع محمد هو ونجوى ، وفاتوا من الريسبشن تلفت يسار ، لقي الممرض والممرضة واقفين ويهدرزوا ، شبحلهم بنظرة غريبة ، وهما مش مركزين !
* في الجردينة ، نجوى تشرب في العصير ،
نجوى : كله ليه طعم تاني معاك ،
محمد شبحلها وابتسم : والله ؟
نجوى شادة المصاص وتحرك في الطاسة : رغم الوضع الصعب اللي مريت بيه ، انت عاطيني الامل ، (وردت تشرب وتشبح في عيونه)
محمد يشبح فيها ومبتسم : دخلي شعرك !!
نجوى فلتت عيونها : الله طالع ؟؟ ( حطت الطاسة جنبها ، وقعدت تتحسس الوشاح بايديها)
محمد حط ايديه على وشاحها وقعد يساوي فيه ، وجبده قدام ،
نجوى سرحانة في عيونه وذابت زي الزبدة !!
ابتسم محمد : مانعرفش نساويه لكن المهم شعرك معش يبان !!
نجوى تنحي في الدبوس : اهو تو نساويه ..
محمد شبح فيها : مش هنا قدام الناس !!
نجوى : به خلي نخش للحمام (حشا القاريين)
محمد : تمام ، اهوا حدا الكافي هظا !

مشت نجوى ،
محمد مقعمز ولع دخانه وقعد سرحان ،
جت نجوى وقفت عليه ،
نجوى : هكي باهي ؟
محمد ضحك : كويس ، دام شعرك مش برا !
نجوى : غيور ، نوض نتمشوا ،
محمد : هي ،
اتصل جمال بنجوى ، ارتبكت لم رت اتصاله ،
وردت
جمال : بنتي شن امك حالها توا ؟
نجوى : الحمد لله ، كيف رقدت !! وين انت ؟
جمال : في القهوة اللي جنب المستشفى !!
نجوى : محمد جي ويدور فيك ،
جمال : به قوليله يجي
نجوى : حتى انا خاطري نطلع ، شن نجي نعكس معاكم في القهوة
جمال ضحك : هههه تعالوا هي !
*صكرت ،
طلعت هي ومحمد ، وجمال كان يستنى قدام القهوة واقف ،
جمال : شن تاخد قهوة ،
محمد : لا بارك الله فيك ، خديت امبدري !!
جمال : اه به ، وانتي نجوى تبي حاجة ؟
نجوى : مانبي شي ، غير نتمشى !!
جمال : هي امالا !!
مشوا لجهة الكرنيش
وقعدوا يتمشوا محمد وجمال ويهدرزوا ،
ونجوى قدامهم طالقة رجليها وتتفرج على منظر البحر ، وتشم في النسمة ، حست بالانشراح !!
محمد : توه حتى هي طلعوها ، تطلق كرعيها ، الحركة كويسة ليها !!
جمال : لا هي من النوع الحركية ، مانخافش عليها ، غير في ماكلتها بس !!
محمد : الوكال بالذات ضروري الحرص !!
وقف محمد وخدي "سميط"
مد لجمال ونجوى ،
جمال : يبارك فيك !!
وخدوا شاهي تركي من اللي يبيعوا وقعمزوا جنب بعضهم على الكرسي قدام البحر ،
نجوى مبتسمة ، وتسمع في هدرزة بوها وخطيبها وكيف منسجمين وياخدوا ويعطوا
ناضت نجوى خدت نقالها ، ودارت سيلفي مبتسمة ومحمد وجمال جنب بعض ويهدرزوا لاهيين !!
جمال : انا بنشوفةالماكينة اللي غادي بنسحب فلوس !!
محمد : هي اهو جاي معاك (ووقف)
جمال : لالا خليك ، شوية وجاي مش معطل !!
مشي جمال قص الشارع ، ووقف بحدا الماكينة !!
نجوى واقفة تتفرج على منظر البحر ، تلفتت لمحمد : وين بابا ؟
محمد ايديه في بعض ويشبحلها مبتسم : مشي بيسحب فلوس ،
نجوى جت خطوات وقعمزت جنب محمد ،
محمد تلفتلها : شن ارتحتي ..
نجوى : هلبااا (تشبح سرحانة والشمس على وجهها وعيونها يبرقوا خضر في العسلي من ضو الشمس )
محمد سرحان فيها : كويس هظاةاللي نبيه !!
نجوى : كان تصح امي انا مانبي شي !
محمد : ماتبينيش يعني !
نجوى : انت كل شي

جي جمال
تلفتله محمد : شنو صار ؟
جمال : سحبت !!
محمد : به .. (ووقف) هيا شنو، نعدوا نكملوا طريقنا ،
*كملوا طريقهم ، ولفوا ، وولوا للمستشفى !
خش جمال ونجوى ومحمد ،
لقي الممرض كيف خاش بيعطي الدواء لريمة !!
محمد كلمه بالتركي : شكرا لك نحن سوف نعطيها الدواء !( وبابتسامة خدي من ايده مغطة فيها جرعة الحبوب )
طلع الممرض ،
خداهم محمد في ايده ورماهم في السطل بدون ماتلاحظ نجوى او جمال ، وطلع الحكة اللي في الكيسة وشاف المغطة ، تخربيشته قاعدة ، طلع حبوب تاني من الحكة، ومدهم لنجوى !!
طلع جمال من الحمام متوضي ، وكيف بيصلي الظهر " الله اكبر"
محمد : امسكي اعطيها !!
عطت نجوى الدواء لامها وشربتها مية !!

يتبع...