حبيتة شرقاوي💜🧸

89

روايـــة # حبيته شرقاوي💜🧸
ـ الحلقه التاسعه والثمانون💜🧸
ـ منقول

..
نجوى تلفتت للباب : خشي .
ريمة : تي الباب مصكر افتحي فيسع ،
مشت نجوى فتحت الباب ،
نجوى : شني خيرك ؟
ريمة داهشة وتمروح بايدها : زودي شكلها حناك كتبت الحوش لعمتك ، اوني كلمة بكلمة هما وبوك ،
نجوى : لا حول ولا قوة الا بالله ، علاش الجو هذا ،
*طلعت نجوى من الدار على خشة جمال وجهه مستصفر وحالته حاله ،
نجوى : خيرك بابا ؟
جمال : كلت حقي من رزق بوي وكتباته لبنتها ،
ريمة : حسبي الله و نعم الوكيل تلقااه وتتلقاه ان شاء الله ،
جمال : عاطيينا لغدوة بس كنهذا بيطلعونا بالقوه ومركز وشرطة وبلي على روسهم ،
نجوى : لا حول ولا قوة الا بالله ، ربي ياخد الحق ان شاء الله ،
جمال : غدوة تو نجيبوا عمال يرفعوا الاثاث ،
ريمة قعمزت مصدومة وتبكي : يا ربي ، ياربي الصبر ،
نجوى : ماما ماترعشيش روحك انتي عندك السكر ، (وتلفتت لبوها) والاثاث وين بنحطوه ؟
جمال : توا نشوف مخزن ولا مستودع صغير نأجره ، ثلاثة ايام اسبوع لين نحصلوا حوش للايجار ، وننقلوا الاثاث ،
ريمة : وحني وين بنقعدووا في الشارع ؟؟؟
جمال : نرفعك عند امك انتي والصغار وانا تو ندبر نقعد مع واحد من جماعتي ،
ريمة : لالا ماتقعدش بعيد علينا ، اقعد في حوش خوي فوق ،
جمال : تي رزينة يقولوا لازينه اماليه وقاعد عندنا ،
ريمة : عادي زي ولدهم انت
جمال : لالا
نجوى لامها : خليه على راحته ،
* ودار جمال تليفوناته وما خلا من كلم وفي الاخير حصل مخزن للايجار ،
نجوى رن النقال في جيبها ، مشت لدار لقتها ميسم تتصل ،
نجوى صوتها متغير : ايوه ميسم
ميسم : ايوه نجوى ، خيرك منكدة ؟
نجوى : ااه ياربي كان نحكيلك ،
ميسم : شني احكي !!
نجوى : حناي كتبت الحوش كله باسم عمتي !!
ميسم : كييييف ، نهار حرش .، خيرها حناك هاذي ؟
نجوى : والله هذا اللي صاير يا ميسم ، المشكلة الواحد ماعنداش وين يقعد ، بابا قال بروا حوش جدكم لين نحصل حوش ايجار ،
ميسم : لا حول ولا قوة الا بالله ، ادوروا في حوش انتم توا ؟
نجوى : اي بوي تليفونات ليه ليه ،
ميسم : به اسمعي في عمارة جنب حوش جدي فيها شقق كويسات ونظاف فيه منهم مش مأجرات ، شوفوهم !!
نجوى : والله ان شاء الله خير ، تو نشوف !!
ميسم : اقل شي حتى نجي لحوش جدي ندير سبلة ونجيك نغيروا جو ،
نجوى متغششة ضحكت : ههههه ان شاء الله خير ،
ميسم : باهي مش عنده بوك قطعة ارض بيعوها وخودوا حوش ،
نجوى : قداااش بتجيب بالله يا ميسم !! ماتجيبش حق حوش ،
ميسم : اممممم، ان شاء الله ربي يكون في عونكم وخلاص ، لازم يوم هكي الواحد مايتمش عليه بالفرح ، يا نكدة اوله يا اخره ،
نجوى : الله غالب !!
* عند محمد مقعمز بروحه في الجنان ، وسارح يفكر ،
طلعت سارة : كيف حالك محمد ؟
محمد تلفت لقاها سارة : الحمد لله شنو حالك انتي وحال خالي ومرات خالي
سارة : تماام بخير ، (وجت قعمزت على الدرجات وبينهم مسافة ) قالوا مشيت تخطب !!
محمد فاتح فيس وعيونه في النقال : اهاا ، الفال ليك
سارة : لا انا هههه ما صارش ،
محمد في داخله *( شنو تخرف هذي ، شنو تبي تقول ؟ .. وانا شنو هامني فيها ، ..) ناض محمد
محمد : نستاذن منك ،
سارة عيونها فيه ، ومشي محمد وهي محروقة تاكل في روحها ماكلة.. محمد مش مدورها ولا معدل عليها ولا عاطيها اي اهتمام .
سارة تشبح فيه كيف طلع وسكر باب الجنان : ماشي يا محمد انت هكي اديرلي ؟ ( وحطت ايدها على خدها مبتسمة ) تو نشوفوا شن بيصير فيك يا محمد حتجيك صاعقة باهية ( وفتحت نقالها وقعدت تشوف في صور نجوى )

*عند ميسم *
ميسم *( ترا شن بعتت قالت تبي صور اكلات ، ) لقت السجل ممسوح بكللل ،
ميسم قلبها قبضها : علاش ماسحة سجل الارسال ؟!!
عند سارة في حوشهم خشت الدار وارتمت على السرير وهي تقرقر وتضحك ،
سارة : مش انا اللي تجروا بيا بكلمة وتفوتوني مش عيل نرضع في صبعي .. اهو تو نعرف شن ندير ،
وقامت نقالها تتصل ،
سارة : مراد ، شن الجو ؟
مراد : الحمد لله ، كيف حالك انتي ؟ ويييينك معش تبيني لا فيس لا انستا ،
سارة : والله مشاغل وامتحانات ،
مراد :ااااا ، ربي يعاونك ،
سارة : اسمع ، نطلب منك طلب ؟
مراد : شني ؟
سارة : ماعندكش ايميل فيس قديم ؟
مراد : عندي هلبا ، لكن علاش تبيه ؟
سارة : نبيه وخلاص ، تعطيني ؟
مراد : تمام به ،
سارة : اوكي تبعتهولي توا ؟
مراد : تمام ،
* تاني يوم الصبح بكري نجوى وريمة والشغالات يلموا في الحاجات في اكياس وصناديق ،
ريمة دمعتها على خدها ، و نجوى واجعتها دارها اللي تحس فيها بالسكون والهدوه وجعها كل ركن في الحوش ،
نجوى متوترة وحايسة خدت النقالات الزوز دارتهم مقفل !!
محمد مايندري على شي في الليل كان ساهر مع خاله وصحاب خاله وماكلمش نجوى بكل !!
تاني يوم مع الضحا يتصل بيها مقفل ، قلق قعد كل شوي ويتصل بيها ،
محمد :...

يتبع..