حبيتة شرقاوي💜🧸

102👌🏻🥀

روايـــة # حبيته شرقاوي💜🧸
ـ الحلقه المئه واثنان💜🧸
ـ منقول

{صعبة لم تجي كل الادلة ضدك وانت مظلوم ، الشي اللي يخليك ادير اي شيء بش تتثبث برائتك ، وترجع صورتك زي قبل زي تالي }
جمال : هي نكملوها نحطكم ونجيبلكم غذي واتي ؟
ريمة : لالا خاطري في حاجة مسقية نفسي صاخفة
جمال قطع افكار نجوى : نجوى بنتي !!
نجوى : نعم ،
جمال : شن رايك واتي ولا مسقي ؟
نجوى : مسقي وتوا الساعة 2 بيوتى متاخر ،
ريمة : ديروا رايكم امالا ، اللي تبوه ماشي ، عطوني نمد رجليا بعد ندوش مانبي شي ،
جمال : ربي يعطيك الصحة ،
روحت نجوى واتكت في سريرها وخذها النوم

محمد مقعمز في المحل وزبون وراء التاني ، ويخدم وباله في الموضوع ،
فتح محمد ايميل تاني وبحث على الاسم ، ما لقاشي ،
محمد : كيف هكي ؟ شكله سكره الجبان ، السافل ، كان نعرف من هو نشرب من دمه ،
وقام نقاله اتصل بصديقه دماغه حربي في البرمجة والاختراق وفني اكواد
(الرقم المطلوب مقفل )
محمد : كنه مقفل مش عوايده !! خلي نتصل بشركة اللي يشتغل فيها !!
وقعد يتصل ، وردوا
محمد : الووو السلااام عليكم
الشاب : وعليكم السلام تفضل ،
محمد : شركة ال...
الشاب : اها تفضل ،
محمد : شنو يا " فلان " ماعرفتنيش كيف هكي ؟
الشاب : لا والله من معاي ؟
محمد : تي محمد ال... صاحب الباش مهندس فرج ،
الشاب : او هوووو محمد شن الجو ؟
محمد : تمام ، ت وينه فرج هظا نرن عليه مقفل ؟
الشاب : مسافر لتركيا ليه قريب شهر ..
محمد يزفر : افففف عليك حظ !! (ويطقطق بالمفتاح على الطاولة )
الشاب : خير فيه شي مهم ؟
محمد : لا بس كنت نبيه في موضوع . بس مش مشكلة ،
الشاب : اي شي تفضل
محمد : مشكور
الشاب : وانت طيب ،

في الليل نجوى مقعمزة في مكان الصلاة وتستغفر
مهاب: نجوى قالك بابا تعالي تعشي ،
نجوى : تعشوا انتم انا ما خاطريش
مهاب : به ، (وصكر وراه الباب ، )
سمعت نجوى رنة النقال ناضت لقاته محمد يتصل
ردت : ايوه ..
محمد : حبيبي افتحي النت كنك مصكرة ايميلك ؟
نجوى : تو نفتح هي ،
محمد : تمام
وصكرت نجوى طول
محمد : كنها جوها هكي تغيرت ؟ ياريتني ما قلتلها ، التوترات بدت ،
( ونحى جيبوطيه علقه ) ومشي وقف جنب الروشن وولع دخانه يخمم ، فتح الروشن ، حس بنسمة مصقعة . فتحتله انفاسه وغمض عيونه وتنهد ،
جت في باله صورة نجوى لابسة قفطان ابيض تبكي وضامة ركابها وتبكي وخايفة ، فوق غصن الشجرة والكلاب تنبح (حشا القاريين ) تحتها وتنقز قريب توصلها ،
فتح عيونه فجأة ، *( هظا هو تفسير الحلم ، البنت نظيفة لكن فيه كلاب يبوا يوصلوا ليها ، ويشوهوها ، البنت زي ما واثق فيها هي هي مستحيل تتشوه ) ومشي حط دخانه في الطبلة طفاه
وقعمز خدي القيثارة وبدي يلحن بدون مايغني
لحن metallica - nothing els matters
فتح النقال لقي رسالة من نجوى ،
محمد : نكلمك فيديو مرايف على شوفتك !!
نجوى متكية في سريرها ولابسة بدلة الصلاة ،
نجوى : تمام اوكي ،
*اتصل محمد ، و ردت نجوى فتحت الكاميرا ،
محمد شافها ببدلة الصلاة البيضاء ، ضحك من عيونه ،
محمد قعد سرحان فيها ومبتسم ،
اما نجوى تبادل فيه بنظرات فيها الم وانكسار ،
نجوى ابتسمت : كيف حالك ؟
محمد : تمام كنك لابسة طرحة الصلاة ؟
نجوى : ماهو كنت نصلي ،
محمد : توا الساعة 10 متأخرة على صلاة العشاء ،
نجوى : لا من امبكري غر قعدت بيها في مكان الصلاة ونذكر ،
محمد : نجك ليا يا سمحتي
نجوى : سلمك ان شاء الله ،
محمد : كنك قاعدة زعلانة ؟
نجوى : لا عادي ،
محمد : العادي هذي وراها حاجات مش عادية ،
نجوى لاحظت رسالة ماسنجر ،
نجوى : لحظة شوية فيه رسالة على ماسنجر نشوفها ،
وفتحتها نجوى ، من ايميل بنت ، بدون صورة ،
فتحتها ،
لقتها باعتتلها صورها ، لاحظت نجوى انهم الصور نفسهم اللي عند ميسم
الرسالة [ الخطوة الاولى تمت ، واعتبريها تحدير ليك ، المرة هاذي بجديات لو نسمع بيك مزال تكلمي في محمد . صورك اعتبريهم في الصفحات كلها ، ]
نجوى تقرا والكاميرا مفتوحة في نفس الوقت ووجهها تغير . ومحمد يراقب في ملامحها كيف تغيرت ،
محمد : كنك ؟ من ؟
نجوى : ايميل باعتلي تهديد وبعتلي الصور ،
محمد : ديري سكرين بسرعة وانسخي رابط الصفحة الشخصية ،
نجوى ترعش وخايفة : تمام ،
محمد : شنو صار ؟
نجوى : ..

يتبع..