Unicode
ချစ်မိသူ .... အရှုံး
(အခန်း - ၂ )
မိုးသောက်ယံသည် ခြံထဲက ခုံလေးမှာ ထိုင်နေတာ အချိန်အတော်ကြာနေပြီဖြစ်သည်။ သည်နေ့ ဒယ်ဒီ ပြန်လာလျှင် သူ့အတွက် သူငယ်ချင်းတစ်ယောက်ခေါ်လာမည်ဟု ပြောသောကြောင့်ပင်။
သူ တွေ့ရမည့် သူငယ်ချင်းအကြောင်း တွေးရင်းနှင့် စိတ်လှုပ်ရှားနေမိသည်။ ထိုအချိန်တွင် ဒယ်ဒီ့ကားလေးက ခြံထဲသို့ ဖြေညင်းစွာ ဝင်လာလေသည်။ ဒယ်ဒီက ကားပေါ်မှ ဆင်းလာပြီး ကားအနောက်ခန်း တံခါးဖွင့်ပေးတော့ ကောင်လေးတစ်ယောက် ဆင်းလာလေသည်။
"ဒယ်ဒီ "
"ယံယံ ၊ ဒီမှာ သားအတွက် သူငယ်ချင်း ခေါ်လာတယ် ။ သူ့နာမည်က ရှိုင်း တဲ့ ။ ဒီနေ့ကစပြီး ဒယ်ဒီတို့နဲ့ တူတူနေတော့မှာ ။ သားလေးထက် သုံးနှစ်ကြီးတယ် ။ ကိုကိုလို့ ခေါ်နော် "
"ကိုကို "
မိုးသောက်ယံသည် ခပ်တိုးတိုးရေရွတ်ရင်း ဒယ်ဒီ့ဘေးက ကောင်လေးကိုကြည့်မိသည်။ ထိုကောင်လေးက သူ့ထက် အရပ်ရှည်သည် ။ ထို့ပြင် ခပ်နွမ်းနွမ်းအဝတ်အစားကို ဝတ်ဆင်ထားပြီး ညစ်ပတ်ပေရေနေသည်။ သည်လိုလူမျိုးက သူ့ သူငယ်ချင်းတဲ့လား ။
"ဒယ်ဒီ ၊ သား သူ့ကို မလိုချင်ဘူး ။ သူက ညစ်ပတ်တယ် "
ရှိုင်းသည် သူ့ကို ညစ်ပတ်သည်ဟု အော်ပြောနေသော ကောင်လေးကို မကျေမနပ်ကြည့်မိသည် ။ သည်နေရာမှာ သူ နေနိုင်ဖို့ဆိုလျှင် သည်ကောင်လေး ကြည်ဖြူမှသာ ဖြစ်မည် ။ ဒါကြောင့် စိတ်ဆိုးသည့်အမူအရာ မပေါ်စေအောင် ခေါင်းကိုသာ ငုံ့ထားမိသည်။
"ယံယံ သူက အဝေးကြီးက လာတာဆိုတော့ ရေမချိုးရသေးဘူးလေ ။ သားလေးက လိမ်မာပါတယ် ။ လာ...အိမ်ထဲ ဝင်ရအောင် "
မိုးသောက်ယံက နှုတ်ခမ်းကိုမဲ့ပြီး အိမ်ထဲကို ပြေးဝင်သွားသည်။
"လာ ရှိုင်း ၊ အိမ်ထဲ ဝင်ရအောင် "
"ဟုတ်ကဲ့ ဦး "
YOU ARE READING
ချစ်မိသူ အရှုံး ( Completed)
Romance📣( Season 1 + 2 ) Completed. Boy's Love Story . Own Creation . Thin Zar Moe Oo.