Unicode
ချစ်မိသူ .... အရှုံး
(အခန်း - ၃ )
" သား...ရှိုင်း"
" ဗျာ...အန်တီ "
" ဒီမှာ မင်းအတွက် အဝတ်အစားတွေ အန်တီ စျေးက ဝယ်လာခဲ့တယ် "
ရှိုင်းသည် အဝတ်အစားအိတ်လေးကို လှမ်းယူရင်း ရင်ထဲမှာ ကြည်နူးမိသည် ။ ထို့နောက် ကျေးဇူးတင်စကား ဆိုမိသည် ။
"ကျေးဇူးတင်ပါတယ် အန်တီ "
"ကျေးဇူးတင်ဖို့ မလိုပါဘူးကွယ် ။ သားက အန်တီတို့ရဲ့ မိသားစုဝင်ဖြစ်သွားပြီပဲ "
ထိုအချိန်တွင် မိုးသောက်ယံသည် ရောက်လာပြီး ဒေါ်ခင်နွယ် နှင့် ရှိုင်းကို ကြည့်ကာ မျက်နှာစူပုတ်သွားလေသည်။
"မာမီ သားအတွက် ဝယ်လာတာလားဟင် "
"မဟုတ်ဘူး ယံယံ။ ရှိုင်းအတွက် အဝတ်အစားတွေ ဝယ်လာပေးတာ "
မိုးသောက်ယံ၏ မျက်နှာက ပို၍ မဲ့သွားသည် ။
"မာမီ ၊ သူ့ကို ဒယ်ဒီက သားအတွက် ကစားဖို့ အဖော်ခေါ်လာပေးတာလေ ။ မာမီက ဘာလို့ သူ့ကို ဂရုစိုက်နေရတာလဲ "
"ဘယ်လိုပြောလိုက်တာလဲ ယံယံ ။ ရှိုင်းက သားရဲ့အစ်ကို ဖြစ်သွားပြီလေ ။ ယဉ်ယဉ်ကျေးကျေးပြောရမယ်နော် "
"မပြောဘူး ။ သူက သားရဲ့ အစ်ကို မဟုတ်ဘူး ။ သားနဲ့ ကစားဖို့ ဒယ်ဒီက ဝယ်လာပေးထားတဲ့ သူ အဟင့်..ဟင့် "
မိုးသောက်ယံက ငိုပြီး ထွက်ပြေးသွားလေသည်။ ဒေါ်ခင်နွယ်သည် ခေါင်းမာသော သားလေးကြောင့် စိတ်ရှုပ်စွာ ခေါင်းခါမိသည်။ ထို့နောက် ဘေးမှာ မျက်နှာငယ်လေးနှင့် ထိုင်နေသော ရှိုင်းကို ကြည့်ရင်း နူးညံ့စွာ ပြုံးပြလိုက်သည် ။
"ယံယံက နည်းနည်းဆိုးတယ်။ ဒါကလည်း အန်တီတို့ အလိုလိုက်ခဲ့လို့ပါကွယ် ။ သားက အကြီးဆိုတော့ နားလည်ပေးလိုက်ပါနော် "
"ဟုတ်ကဲ့ပါ အန်တီ ။ ကျွန်တော် ယံယံ့ကို နားလည်ပါတယ် "
YOU ARE READING
ချစ်မိသူ အရှုံး ( Completed)
Romance📣( Season 1 + 2 ) Completed. Boy's Love Story . Own Creation . Thin Zar Moe Oo.
