Unicode
ချစ်မိသူ အရှုံး
(အခန်း - ၁၇ )
"ဒါ ဘယ်လိုဖြစ်နေကြတာလဲ "
ယောကျ်ားလေးနှစ်ယောက်၏ ခန္ဓာကိုယ်က ပူးကပ်နေသည့်အပြင် နှုတ်ခမ်းချင်းပါ ဂဟေဆက်နေတာကို မြင်လိုက်ရချိန် မဒီက ဒေါသတကြီး အော်သည် ။ ဒေါ်ခင်နွယ်ကတော့ အံ့သြမှင်သက်နေလေသည် ။ မဒီ့ အော်သံကြားတော့ ရှိုင်းနှင့် မိုးသောက်ယံတို့ သတိဝင်ပြီး အလျင်အမြန် လူချင်းခွာလိုက်သည်။
"ဒါ ဘာလုပ်နေကြတာလဲ ရှိုင်း ။ ဒီနေ့က မဒီတို့ စေ့စပ်မယ့်နေ့ဆိုတာရော မှတ်မိသေးရဲ့လား "
မဒီက အံကြိတ်ပြီး ဒေါသကို မနည်းထိန်းချုပ်နေရသည့် ပုံစံဖြင့် မေးသည် ။
"ဆောရီး မဒီ "
ရှိုင်းသည် ယခုအခြေအနေကို သူ ကိုယ်တိုင် နားမလည်သော်လည်း မဒီ စိတ်ကျေနပ်စေရန် တောင်းပန်လိုက်သည် ။ သို့သော် မဒီက ခြောက်ကပ်ကပ် ရယ်လေသည် ။
"ဘာကိစ္စ တောင်းပန်နေရတာလဲ ရှိုင်း "
မဒီက ရှိုင်းကို ပြောပြီး မိုးသောက်ယံကို မီးဝင်းဝင်းတောက်နေသည့် မျက်လုံးဖြင့် စိုက်ကြည့်ကာ တဆက်တည်း ပြောသည် ။
"ဒါ နင့် လက်ချက်မဟုတ်လား မိုးသောက်ယံ ။ ရှိုင်းက ငါနဲ့ စေ့စပ်တော့မှာ သိရက်နဲ့ မြူဆွယ်တယ် ။ နင် တော်တော်အောက်တန်းကျတာပဲ "
မဒီက မိုးသောက်ယံကို အထင်သေးစက်ဆုပ်သလို အကြည့်နှင့် ပြောသည် ။ ဒေါ်ခင်နွယ်သည် မျက်နှာနီ၍ ဒေါသထွက်သွားသော်လည်း သားဖြစ်သူ၏ အမှားကြောင့် စိတ်ကို လျော့၍ သည်းခံနေလိုက်သည် ။
"မင်း ထင်သလို မဟုတ်ဘူး မဒီ ။ အထင်လွဲနေတာ "
မိုးသောက်ယံက ကုတင်ပေါ်မှ ဆင်းလိုက်ပြီး မဒီ့ကို ရှင်းပြသည် ။
"ဘာပြောတယ် ။ ငါ အထင်လွဲတယ်ဟုတ်လား ။ နင်တို့နှစ်ယောက် ဖြစ်ပျက်နေတာ ငါ့ မျက်စိနဲ့ တွေ့တာတောင် အထင်လွဲနေတာတဲ့လား ။ ငါ ထင်တော့ထင်သားပဲ မိုးသောက်ယံ ။ ငါနဲ့ ရှိုင်း စေ့စပ်မှာကို နင် ဒီတိုင်းတော့ ငြိမ်မနေလောက်ဘူးလို့ ။ ခု ဒီလို အရှက်မရှိတဲ့ လုပ်ရပ်မျိုးလုပ်တယ်ပေါ့ ။ ရွံစရာကောင်းတဲ့ အခြောက် "
YOU ARE READING
ချစ်မိသူ အရှုံး ( Completed)
Romance📣( Season 1 + 2 ) Completed. Boy's Love Story . Own Creation . Thin Zar Moe Oo.