Unicode
ချစ်မိသူ.... အရှုံး
(အခန်း - ၈ )
ရှိုင်းသည် ဝေယံတို့ ခြံတံခါးဘဲလ်တီးသော် ဝေယံ့အမေက ထွက်လာ၍ တံခါးဖွင့်ပေးသည် ။ အရင်က မိုးသောက်ယံသည် ဝေယံ့အိမ်သို့ မကြာခဏ အလည်သွားလေ့ရှိပြီး ရှိုင်းက အကြို ၊ အပို့ လုပ်ပေးရသည် ။ မိုးသောက်ယံနှင့်အတူ မကြာခဏ လိုက်လာ၍ ဝေယံ့အမေနှင့် သူ ရင်းနှီးကြသည် ။
"ရှိုင်းပါလား ။ လာလည်တာလား သား "
"မဟုတ်ဘူး အန်တီ ။ မိုးသောက်ယံ ဒီကို ရောက်နေလားလို့ ၊ လာကြည့်တာပါ "
"ဪ ၊ ဟုတ်တယ် သားရဲ့။ ဝေယံက သူ့အသိတစ်ယောက် ဘားအသစ်ဖွင့်တာ သွားဦးမယ်ဆိုပြီး နှစ်ယောက်သား ထွက်သွားကြတာပဲ ။ မိုးသောက်ယံ အိမ်ကို ပြောခဲ့တယ်လို့ အန်တီက ထင်နေတာ "
"ဟုတ်ကဲ့ ။ ကျွန်တော် လိုက်သွားလိုက်ပါ့မယ် "
"ဝေယံတို့ကို စောစောပြန်ခဲ့ဖို့ အန်တီမှာထားပါတယ် ။ မိုးသောက်ယံကိုလည်း အိမ်ကကားနဲ့ပဲ ပြန်ပို့ပေးမှာပါ သားရဲ့ "
"ဟုတ်ကဲ့ အန်တီ ။ ကျေးဇူးတင်ပါတယ် ။ ဒါပေမယ့် ယံယံက အိမ်ကို မပြောခဲ့တော့ စိတ်ပူနေကြတယ် ။ ကျွန်တော်ကိုယ်တိုင်ပဲ သွားခေါ်လိုက်ပါ့မယ် "
"အေး..အေး သား ။ သူတို့ ခုနမှ သွားကြတာ "
"ဟုတ်ကဲ့ ၊ ကျွန်တော့်ကို ခွင့်ပြုပါဦး အန်တီ "
"အေးပါ သား "
ရှိုင်းသည် ဝေယံ့ဖုန်းကို ခေါ်လိုက်ပြီး နေရာကို မေးလိုက်သည် ။ ထို့နောက် ဆိုင်ကယ်စက်နှိုး၍ ကလပ်ဆီသို့ မောင်းလာခဲ့သည် ။ ကလပ်ထဲသို့ ရောက်သော် လိုက်ရှာနေရင်း တွေ့လိုက်ရသည်က မိုးသောက်ယံ နှင့်အတူ သူစိမ်း ယောကျာ်းတစ်ယောက်ကို တွေ့လိုက်ရသည် ။ ထိုသူက မိုးသောက်ယံ၏ လက်နှစ်ဖက်ကို ကိုင်ထားသည် ။ မိုးသောက်ယံ ဝတ်စားထားသည်မှာလည်း အနက်ရောင် တီရှပ်ကို အပေါ်က ဂျင်းလက်ရှည်တစ်ထည် ထပ်ဝတ်ထားသည် ။ ထို့ပြင် ဂျင်းဘောင်းဘီတို ဝတ်ဆင်ထားပြီး ဖြူဖွေးသော ခြေတံလေးက ပေါ်လွင်နေသည် ။ မိုးသောက်ယံတစ်ယောက် ဝေယံ့၏ အဝတ်အစားတွေ ယူဝတ်ထားပြန်ပြီ ။ ရှိုင်း မျက်မှောင်ကြုတ်ပြီး လှမ်းခေါ်လိုက်သည် ။
YOU ARE READING
ချစ်မိသူ အရှုံး ( Completed)
Romance📣( Season 1 + 2 ) Completed. Boy's Love Story . Own Creation . Thin Zar Moe Oo.