Unicode
Season - 2
ချစ်မိသူ အရှုံး
အခန်း ( ၄ )
ကျေးငှက်အော်သံ တကျီကျီနှင့် အတူ နေမင်း၏ အလင်းရောင်က ကမ္ဘာမြေတခွင် ဖြန့်ကျက်လာသည် ။
ရှိုင်းသည် အိပ်ရာနိုးလာသည်နှင့် မျက်လုံးမဖွင့်ခင် လက်တစ်ဖက်ဖြင့် ဘေးကို စမ်းလိုက်သည် ။ အေးစက်စက် မွေ့ယာကိုသာ ထိမိ၏ ။ ရှိုင်း ချက်ချင်းပင် မျက်လုံးဖွင့်၍ ကြည့်မိသည် ။ အိပ်ရာထက်မှာ မိုးသောက်ယံ ရှိမနေခဲ့ချေ ။ သူ မျက်ခုံးတွန့်သွားပြီး အိပ်ချင်စိတ်ကလည်း ပျောက်သွားသည် ။ မိုးသောက်ယံ ဘယ်အချိန်တည်းက နိုးနေခဲ့တာလဲ ။ သူ တွေးရင်း ကုတင်ပေါ်မှ ဆင်း၍ ရေချိုးခန်းထဲ ဝင်လိုက်သည် ။
ထို့နောက် မျက်နှာသစ် ၊ ရေမိုးချိုး၍ အောက်ထပ်သို့ ဆင်းလာခဲ့သည် ။
အိမ်တံခါးမကြီးက ပွင့်နေ၍ အောက်ထပ်မှာလည်း မိုးသောက်ယံကို မတွေ့ချေ ။ ခြံထဲရောက်တော့မှ ကံကော်ပင်အောက်တွင် ရှာနေသော ပုံရိပ်လေးကို တွေ့၏ ။
ကံကော်ပန်းပွင့်ကို ကောက်ယူ၍ နမ်းရှိုက်နေသော မိုးသောက်ယံ ။ နေရောင်ခြည်နှင့်အတူ ရင်ထဲ နွေးထွေးသွားစေ၏ ။ ရှိုင်း၏ နှုတ်ခမ်းတို့ အလိုလို ပြုံးမိသွားသည် ။
"ယံယံ "
ခေါ်သံကြား၍ လှည့်ကြည့်လာသော မိုးသောက်ယံ၏ မျက်ဝန်းတွေက စိမ်းညို့စွာ ။ အရယ်အပြုံး ကင်းမဲ့၍ မျက်နှာက တည်တည်တင်းတင်း ။
"ဘယ်အချိန်ထဲက နိုးနေတာလဲ "
ရှိုင်းသည် မိုးသောက်ယံ၏ အနားသို့ သွား၍ နူးနူးညံ့ညံ့ လေသံဖြင့် မေးလိုက်သည် ။
နီးကပ်တော့မှ တွေ့လိုက်ရသည့် နဖူးစပ်နားမှ သွေးစတချို့ ။"ဘာဖြစ်တာလဲ ယံယံ "
ရှိုင်း စိုးရိမ်တကြီး မေးရင်း နဖူးနားကို ဖွဖွ ထိလိုက်တော့ သွေးတွေက စိမ့်ကျလာသည် ။ ဦးခေါင်းစပ်အနားမှာ ဒဏ်ရာတစ်ခု ။ ထိုမှ စီးကျလာခြင်းပင် ။
"ချော်လဲကျတာ "
မိုးသောက်ယံက အရေးမကြီးသလို ခပ်ပြတ်ပြတ်ပြောပြီး သွေးတွေကို ညာလက်ဖဝါးဖြင့် သုတ်သည် ။ ရှိုင်း ဒေါသတို့ဖြင့် မိုးသောက်ယံ၏ လက်ကို ဆောင့်ဆွဲကာ အိမ်ပေါ်သို့ ခေါ်လာခဲ့သည် ။
YOU ARE READING
ချစ်မိသူ အရှုံး ( Completed)
Romance📣( Season 1 + 2 ) Completed. Boy's Love Story . Own Creation . Thin Zar Moe Oo.