Unicode
Season - 2
ချစ်မိသူ အရှုံး
အခန်း ( ၈ )
သူတို့သုံးယောက်လုံး မဒီ့ကို အပြေးအလွှား လိုက်ရှာကြသည် ။ အရင်ဆုံးတွေ့သူက ရှိုင်း ။ အိမ်အပေါ်ထပ်၌ သီးသန့်ထုတ်ထားသော ဝရံတာလက်တန်းပေါ်တွင် အပြင်ဘက်သို့ မျက်နှာမူ၍ ထိုင်နေသည် ။ ရှိုင်း၏ ရင်ထဲ ထိတ်ခနဲ ဖြစ်သွားသည် ။
"ယံယံ "
ကျောခိုင်းနေရာမှ ခေါင်းကို စောင်း၍ ကြည့်လာသည် ။ ထို့နောက် ခြောက်ကပ်ကပ် ရယ်သည် ။
"ဘာလို့ ဆက်ဟန်ဆောင်နေသေးတာလဲ ရှိုင်း ။ ငါ မိုးသောက်ယံ မဟုတ်တာ သိရဲ့သားနဲ့ "
အက်ရှရှလေသံဖြင့် မဒီက ပြောလာသည် ။
"အဲ့ဒီပေါ်က ဆင်းခဲ့ပါ မဒီ "
ရှိုင်းက ပြောရင်း အရှေ့ကို တစ်လှမ်း တိုးသည် ။
"ရှေ့မတိုးနဲ့ ရှိုင်း ။ ခြေတစ်လှမ်း ဆက်တိုးရင် ဒီပေါ်ကနေ ငါ ခုန်ချလိုက်မယ် ။ အဲ့ဒီအခါ မိုးသောက်ယံရဲ့ ဝိညာဉ်လည်း သူ့ခန္ဓာကိုယ်ထဲ ပြန်ဝင်နိုင်တော့မှာ မဟုတ်ဘူး ဟား.... ဟား ။ တွေးရုံနဲ့ ပျော်စရာကောင်းနေပြီ.... ဟား....ဟား "
မဒီက ခြောက်ကပ်ကပ် ရယ်နေသည် ။ ထိုစဉ် မိုးသောက်ယံ၏ ဝိညာဉ် နှင့် ခန့်မင်းနောင်တို့ ရှိုင်း၏ အနားကို ရောက်လာကြသည် ။
မဒီက မိုးသောက်ယံတို့ကို မြင်သော် မျက်နှာက တည်တင်းသွားပြီး အကြည့်တွေက စူးရဲသွား၏ ။
" နင့်ကိုယ်နင် သိပ်လည်လှပြီလို့ ထင်နေလား မိုးသောက်ယံ ။ နင်တို့ အကြံအစည်မှန်သမျှ ငါသိတယ် ဟွန့်...."
မဒီက မဲ့ပြုံးပြုံး၍ ဆိုသည် ။ ဟိုရက်က မိုးသောက်ယံ နှင့် ခန့်မင်းနောင်တို့ စကားပြောနေတာ သူ တွေ့ခဲ့သည် ။ ခန့်မင်းနောင်က မိုးသောက်ယံ၏ ဝိညာဉ်ကို မြင်နိုင်၍ သူ အံ့သြခဲ့ရသော်လည်း မသိယောင်ဆောင်ခဲ့သည် ။ ရှိုင်းက ခန့်မင်းနောင် နှင့် တွေ့ဖို့ အချိန်အတော်ကြာ ပျောက်သွားပြန်တော့ အားလုံးသိလောက်ပြီဟု သူ ဆက်စပ်တွေးကြည့်ခဲ့ပြီးသား ။ သူ သတိကြီးစွာ ထားခဲ့သည် ။ ထို့ကြောင့်ပဲ ရှိုင်းတို့ ဆင်ခဲ့သည့် ထောင်ချောက်ထဲသို့ မသက်ဆင်းခဲ့ခြင်းဖြစ်သည် ။
YOU ARE READING
ချစ်မိသူ အရှုံး ( Completed)
Romance📣( Season 1 + 2 ) Completed. Boy's Love Story . Own Creation . Thin Zar Moe Oo.