Unicode
ချစ်မိသူ .... အရှုံး
(အခန်း - ၆ )
မိုးသောက်ယံသည် အသိမလွတ်မီ နောက်ဆုံးမြင်လိုက်ရသည်က သူရှိရာသို့ ကူးခတ်လာသော ပုံရိပ်တစ်ခု ။ ထို့နောက် အရာအားလုံး အမှောင်ကျသွားတော့သည်။
××××××××××××××××
ရှိုင်းသည် မဒီ့ကို ကူညီပြီး ပြန်ရောက်ချိန်တွင် မိုးသောက်ယံသည် ပါတီကျင်းပသည့် နေရာတွင် မရှိတော့ချေ ။
"မိုးသောက်ယံ ဘယ်ရောက်သွားတာလဲ "
"သူ ဒီမှာ နေရတာ ပျင်းလို့ ပြန်သွားတာများလား "
"မဟုတ်လောက်ဘူး မဒီ ။ ကျွန်တော် လိုက်ရှာလိုက်ဦးမယ် "
မဒီက မကျေနပ်ပေမယ့် ဟန်ဆောင်ရင်း ခေါင်းညိတ်လိုက်သည် ။
"မဒီပါ ကူရှာပေးမယ်လေ "
"အင်း "
ရှိုင်းနှင့် မဒီတို့ လိုက်ရှာနေရင်း ခြံအနောက်ဘက်က ရေကန်ကြီးအနားသို့ ရောက်လာခဲ့သည် ။ ရေကန်နားမှာ မိုးသောက်ယံ၏ ဖိနပ်လေးတစ်ဖက်က ရေကန်စပ်တွင် ကျနေသည် ။ ရှိုင်း အလန့်တကြားဖြစ်သွားပြီး ရေကန်ဆီ အကြည့်အရောက် ပုံမှန်အတိုင်း ငြိမ်သက်နေရမည့် ရေကန်က တစ်ခုခုပြုတ်ကျထားခဲ့သလို မငြိမ်မသက်ဖြစ်နေသည်။
ရှိုင်းသည် စိုးရိမ်စိတ်နှင့်အတူ ပူထူသွားပြီး ရေကန်ထဲသို့ ခုန်ဆင်းလိုက်သည် ။ ထို့နောက် ရေငုပ်ကာ မိုးသောက်ယံ၏ ပုံရိပ်လေးကို အသည်းအသန် ရှာနေမိသည်။ ရေထဲမှာ ငြိမ်သက်နေသည့် မိုးသောက်ယံ၏ ပိန်ပါးပါး ခန္ဓာကိုယ်လေးကို မြင်တော့ လျှင်မြန်စွာ ကူးခတ်သွားပြီး လက်တစ်ဖက်နှင့် တင်းကျပ်စွာ ဖက်တွယ်လိုက်သည် ။ ထို့နောက် ရေပြင်ပေါ်သို့ တက်ကာ အားထည့်ကူးခတ်၍ မြေပြင်ပေါ်သို့ရောက်သော် အသာအယာ ချလိုက်သည် ။
ရှိုင်းသည် မိုးသောက်ယံကို လှုပ်နှိုး၍ မရတော့ ရင်ဘတ်နားကို ကပ်၍ နှလုံးခုန်သံကို နားစွင့်မိသည် ။ နှလုံးခုန်နှုန်းသည် နှေးကွေးလွန်းနေပြီး စိုးရိမ်ရသော အခြေအနေရှိတာကြောင့် ရှိုင်းသည် လက်ဖဝါးနှစ်ဖက်ကို ထပ်၍ မိုးသောက်ယံ၏ ရင်ဘတ်အလယ်တည့်တည့်မှာ တင်ပြီး ဖိချလိုက်သည် ။ ထို့သို့ ဖိချလိုက် ပြန်ကြွလိုက်နှင့် အကြိမ်များစွာ ကြိုးစားသော်လည်း သတိမရသေးတာကြောင့် မိုးသောက်ယံ၏ နှာခေါင်းကို အသာပိတ်၍ ပါးစပ်တွင်းသို့ လေမှုတ်သွင်းလိုက်သည် ။
YOU ARE READING
ချစ်မိသူ အရှုံး ( Completed)
Romance📣( Season 1 + 2 ) Completed. Boy's Love Story . Own Creation . Thin Zar Moe Oo.