Unicode
ချစ်မိသူ .... အရှုံး
(အခန်း - ၅ )
မိုးသောက်ယံသည် ရုတ်တရက်မို့ လန့်သွားတာကြောင့် ရှိုင်းကို ဖက်လိုက်မိခြင်းဖြစ်သည် ။ သို့သော် ခဏအကြာ နွေးထွေးသည့် အထိအတွေ့က သူ့ကို ဆက်ပြီးဖက်ထားချင်အောင် ဆွဲဆောင်နေလေသည် ။ တဒိတ်ဒိတ် အခုန်မြန်နေသော ရင်ခုန်သံကြောင့် သူကိုယ်တိုင် အံ့သြမှင်သက်သွားရသည်။
ဒါပေမဲ့ အရာအားလုံးကို ခဏမေ့ထားကာ မိုးသောက်ယံသည် မျက်စိမှိတ်ထားပြီး ရှိုင်း၏ ခါးကို ပို၍ တင်းကျပ်စွာ ဖက်တွယ်ရင်း ခေါင်းလေးပါ မှီလိုက်သည်။ရှိုင်းမှာတော့ အတင်းဖက်တွယ်ထားသော မိုးသောက်ယံကြောင့် မျက်ခုံးတို့ တွန့်ချိုးသွားသည် ။ ယောကျာ်းလေးအချင်းချင်း ပူးကပ်နေတာက ကိစ္စကြီးတစ်ရပ် မဟုတ်သော်လည်း သူ့အနားတွင်ရှိနေသည့် သူမှာ မိုးသောက်ယံ ဖြစ်နေတာကြောင့် စိတ်ညစ်ညူးသွားရသည် ။ သူ မောင်းတာ မြန်တာကြောင့် မိုးသောက်ယံ လန့်ပြီး ဖက်ထားတာများလား ဟု တွေးမိတော့ ဆိုင်ကယ်ကို အရှိန်လျော့လိုက်သော်လည်း ရှိုင်း ထင်သလို ဖြစ်မလာဘဲ သူ့လက်တွေက ပိုပြီးတော့ပင် တင်းကျပ်စွာ ဖက်တွယ်လာသေးသည် ။ ရှိုင်း သက်ပြင်းချကာ ဆိုင်ကယ်ကို အရှိန်မြှင့်ပြီး အိမ်မြန်မြန်ရောက်အောင်သာ မောင်းခဲ့တော့သည်။
⚡⚡⚡⚡⚡⚡⚡⚡⚡
"ယံယံ ၊ ဒီနေ့ သူငယ်ချင်းနဲ့ ပြန်ရတာ အဆင်ပြေရဲ့လား "
ဒယ်ဒီက ညစာစားနေစဥ် မေးတော့ မိုးသောက်ယံသည် ထမင်းစားနေရာမှ ရပ်တန့်သွားပြီး ရှိုင်းကို လှမ်းကြည့်မိသည် ။ ရှိုင်းက သူ့ကို မကျေမနပ်ကြည့်နေသည်နှင့် ထိပ်တိုက်တိုးသည် ။
"ဒယ်ဒီ ၊ သား သူငယ်ချင်း ဝေယံက သွားစရာရှိတယ်ဆိုလို့ ။ သား ၊ ကိုကိုနဲ့ပဲ အတူပြန်လာခဲ့တာ "
"ဘယ်လို ၊ ယံယံက ဆိုင်ကယ်စီးရဲလို့လား "
ဒယ်ဒီက မျက်လုံးပြူးပြီး အံ့သြသွားဟန်ဖြင့် မေးသည် ။ မိုးသောက်ယံက ပြုံးပြီး ခေါင်းညိတ်လိုက်သည် ။
YOU ARE READING
ချစ်မိသူ အရှုံး ( Completed)
Romance📣( Season 1 + 2 ) Completed. Boy's Love Story . Own Creation . Thin Zar Moe Oo.