Unicode
ချစ်မိသူ အရှုံး
(အခန်း - ၂၄ )
အိမ်ကထွက်လာပြီးတည်းက အလုပ်ဝင်သည်အထိ ရှိုင်းသည် မည်သည့်အရာကိုမျှ အာရုံမစူးစိုက်နိုင်ပေ ။ သူ ပြောလိုက်သည့် စကားကြောင့် မျက်နှာလေး ညှိုးငယ်ပြီး မျက်ဝန်းထဲမှာ မျက်ရည်တွေ ဝေ့သွားသော မိုးသောက်ယံ၏ ပုံရိပ်လေးက သူ့အာရုံထဲမှာ ကပ်ညှိပါလာကာ ထပ်ခါထပ်ခါ မြင်ယောင်နေသည် ။
သူ မှားသွားပြီလား ။ ဟင့်အင်း ။ ဒါက အမှန်တရားပဲလေ ။
"ရှိုင်း ၊ ဧည့်သည် ရောက်နေတယ် "
ဧည့်ကြိုကောင်တာမှ စန္ဒာက လာပြောတော့ ရှိုင်း မျက်မှောင်ကြုတ်သွားသည် ။ အလုပ်ချိန်ကြီး သူ့ကို ဘယ်သူက လာတွေ့တာပါလိမ့် ဟု စဉ်းစားရင်း ထွက်ခဲ့သည် ။
"မဒီ "
ဧည့်သည်အခန်း၌ ခြေချိတ်၍ ထိုင်နေသူက မဒီ ။ အရင်ကလို သိမ်မွေ့သော အပြုံးနှင့် ရိုးသားသော ဟန်ပန်လေးက မဒီ့ဆီမှာ ပျောက်ဆုံးနေသလိုပင် ။ မထီတထီ အပြုံး နှင့် တဇွတ်ထိုး အမူအကျင့်ဟန်ပန်တွေက ဘယ်ကနေ ရောက်ရှိလာသည်မသိ ။ မဒီက သူ သိခါစနှင့် သိသိသာသာကို ခြားနားနေလေသည် ။
မဒီဆီသို့ လျှောက်သွားရင်း သူ မေးလိုက်သည် ။
"ဘာကိစ္စလဲ မဒီ "
"ရှိုင်းကို ပြောစရာရှိလို့ "
"အရေးကြီးလို့လား ။ ခုက အလုပ်ချိန်ကြီးလေ "
"မဒီ့အတွက်ကတော့ အရေးကြီးတယ် ။ ဒါပေမယ့် ရှိုင်းအတွက်တော့ မသိဘူး ။ မဒီ နဲ့ နေ့လယ်စာ သွားစားရအောင် ။ စားရင်း ပြောကြမယ်လေ "
ရှိုင်း အလိုမကျမှုကြောင့် မျက်မှောင်ကြုတ်သွားရပြန်သည် ။ သူ့ဘက်က ပြီးပြတ်ပါပြီ ဆိုသော ဇာတ်လမ်းကို မဒီ့ဘက်က ဆက်ချင်နေသေးပုံ ရသည် ။
"နာရီဝက်တောင် လိုသေးတယ် ။ နောက်မှ စကားပြောရအောင် "
"စိတ်မပူနဲ့ ရှိုင်း ။ မဒီ့ ဖေဖေ့ကို သွားပြောပြီးပြီ ။ လာပါ သွားရအောင် "
မဒီက ထရပ်ပြီး ရှိုင်း၏လက်ကို တွဲကာ ခေါ်သွားသည် ။ ရှိုင်း သက်ပြင်းရှိုက်၍ မျက်နှာမသာမယာနှင့် ပါသွားတော့သည် ။
YOU ARE READING
ချစ်မိသူ အရှုံး ( Completed)
Romance📣( Season 1 + 2 ) Completed. Boy's Love Story . Own Creation . Thin Zar Moe Oo.