ဘုန်းပြည့်ချမ်းဟန် (Complete)

Part-65 (U+Z)

သုံးပတ်ခန့်ကြာပြီးနောက်မှာတော့ သူနဲ့ကိုကိုရဲ့ရင်သွေးလေးတွေ ဟားန၏ဝမ်းကြာတိုက်တွင်ရောက်ရှိနေခဲ့ပြီးဖြစ်ပါသည်။ ထိုသုံးပတ်လုံးလုံး ဆေးရုံနှင့်ဟိုတယ်လူးလာခေါက်ပြန်နေခဲ့သောနှစ်ယောက်သည်ဂျပန်နိုင်ငံ၏အလှအပတွေရော အထင်ကရနေရာတွေရောကိုပါစိတ်ဝင်စားဖို့အချိန်မရှိခဲ့ပါ။ သူတို့ခေါင်းထဲတွင် သန္ဓေသားမဖြစ်ထွန်းမှာ ဟားန၏ကျန်းမာရေးအခြေအနေမကောင်းမှာစသည့်ပူပန်မှုတွေဖြင့်သာပြည့်နှက်နေခဲ့သည်။ သုံးပတ်ကြာပြီးချိန်မှာတော့ အောင်မြင်ပြီးဖြစ်တဲ့သန္ဓေသားတွေ ဟားန၏သားအိမ်တွင်ကျန်းကျန်းမာမာရှိနေခဲ့လေပြီဖြစ်ပါ၏။ ဟားနရော သူတို့ရင်သွေးလေးတွေပါကျန်းကျန်းမာမာရှိနေပြီဆိုမှ နှစ်ယောက်သားအသက်ဝဝရှုနိုင်ပါတော့သည်။ ခွါညိုသည်လည်း ဟားနဘေးတွင်ရောက်နေပြီဖြစ်ပါသည်။ မိန်းကလေးလည်းဖြစ် ဆရာဝန်တစ်ဦးလည်းဖြစ်နေသောခွါညို့အား ယခုလိုကူညီပေးသည့်အပေါ် ကျေးဇူးအများကြီးတင်ရပါ၏။

ဂျပန်စရောက်ကတည်းက‌နေ ယခုအချိန်ထိဟားနနှင့်လုံးဝမတွေ့ရသေး။ ထိုအမျိုးသမီးလေးကအတွေ့မခံခြင်းဆိုပိုမှန်ပါလိမ့်မည်။ ဒီကိစ္စကူညီဖို့မည်မျှစိတ်အားထက်သန်ခဲ့ပါသည်ပြောပြော အမျိုးသားနှစ်ယောက်၏သွေးသားလွယ်ပေးထားရသည့်အပေါ် အပျိုစင်လေးတစ်ယောက်အနေဖြင့်တော့ ထိုအမျိုးသားတွေနှင့်တွေ့ဖို့ရှက်နေရှာပါလိမ့်မည်။ ထိုအချင်းအရာကိုနားလည်သောကြောင့် ချမ်း,တို့ကလည်းအတင်းအကြပ်တွေ့ခွင့်မတောင်းခဲ့။ ကျေးဇူးအထူးတင်သောအားဖြင့်တော့ ခွါညိုမှတစ်ဆင့်လက်ဆောင်လေးပေးဖြစ်ခဲ့ပါ၏။ ထိုလက်ဆောင်ကအခြားမဟုတ်။ သူတို့ဒီကိုမလာခင်အခြောက်လှန်းပြီးထည့်လာခဲ့သော ပိတောက်ပန်းခြောက်လေးများပင်ဖြစ်ပါသည်။ ထိုအမျိုးသမီးလေးသည် ဆာကူရာမြေမှာကြီးပြင်းလာခဲ့သည်မှာမှန်သော်လည်း ပိတောက်ပန်းရနံ့ကိုတော့သိထားသင့်သည်မဟုတ်ပါလား။

ခွါညို့ပြောစကားအရ ပိတောက်ပန်းခြောက်တွေကိုအားရပါးရရှုရှိုက်နေသောအမျိုးသမီးလေးသည် သူ၏ဖေဖေမွေးရပ်မြေကပန်းတွေပေါ့ဟုဆိုကာ ဝမ်းသာမျက်ရည်ကျခဲ့သည်ဆို၏။ ထို့နောက် အခွင့်ကြုံလျှင်တစ်နှစ်မှတစ်ခါသာပွင့်သည့် ပန်းတွေ၏လတ်လတ်ဆတ်ဆတ်ရနံ့ကိုလည်းခံစားကြည့်ချင်သည့်အကြောင်းလည်းပြောလာခဲ့ပါသည်။ မည်သည့်အချိန်ဘဲလာလာ နွေးထွေးစွာကြိုဆိုနေမည့်အကြောင်းလည်းခွါညိုမှတစ်ဆင့်ပြောခိုင်းလိုက်ရပါသေးသည်။