KEEP ME CLOSE (Isaac Genesis Zodiac)

CHAPTER 001 - Best Friends Since 1998

            TRINI AND GENESIS AT FIVE – They became friends.

            "Mrs. Zodiac!"

            Napalingon si Felicia mula sa pagpili ng mga karne sa estante ng meat section ng supermarket nang may marinig na pagtawag. Hinanap nito ng tingin ang kung sino man ang nakakilala rito, at nang makita si Mrs. Valencia na malapad na nakangiting humahakbang palapit bitbit ang grocery basket sa isang kamay ay napa-ngiti na rin si Felicia.

            Si Mrs. Valencia ay nagmamay-ari ng pinaka-malaking agriculture product sa bayan nila at siyang pinagkukunan ng supply ng kaniyang asawa. She and her husband, Arc Zodiac, had become friends with Lanie Valencia and her husband Antony.

            "Mabuti at nakita kita," ani Mrs. Valencia nang makalapit. Sa loob ng basket nito ay mga baking supplies.

            "Magandang hapon, Mrs. Valencia. Dito ka rin pala namimili?"

            "Minsan lang. Ang madalas na pinapapunta ko rito ay ang kasambahay namin. Abala sila ngayon sa bahay kaya kami ng mag-ama ko ang pumunta rito."

            "Oh, kasama mo pala si Mr. Valencia at ang inyong anak?"

            Muling tumango si Mrs. Valencia bago lumingon at ini-turo ang asawang nasa beverage aisle at kumukuha ng mga bottled juice saka inisisilid sa cart na nasa tabi nito. Sa cart ay nakaupo ang limang taong gulang na anak ng mga ito na noon pa lang nakita nang personal ni Felicia.

            "Namimili kami ng kulang na mga sangkap para sa party bukas. Mabuti at nakita kita ngayon. Nais ko sana kayong imbitahan ni Mr. Zodiac kasama ang inyong mga anak."

            "Party?"

            "My daughter's 5th birthday." Ngumiti ito saka humarap. "Pupunta pa sana kami sa bahay ninyo pagkatapos naming manggaling dito para imbitahan kayo. Nakalimutan kasing magsabi ni Tony noong huling beses na pumunta sa store si Mr. Zodiac para mamili ng mga fertilizer."

            "Oh, that's alright. Wala namang pasok ang mga bata bukas dahil Sabado. Ano'ng oras ang party?"

            "Alas nueve ng umaga; kids party kaya sana makasama lahat ng mga anak ninyo."

            "Hindi ba nakakahiyang lahat sila ay dalhin namin, Mrs. Valencia? We have twelve sons at malakas kumain ang mga iyon."

            Humagikhik si Mrs. Valencia sa biro ni Felicia. "Naku, mas maigi nga iyon at maubos ang mga handa. Isa pa'y wala namang ibang bisita maliban sa ilang mga ka-klase ni Trini sa nursery. Aasahan namin kayo, ha, Mrs. Zodiac?"

            Tumango si Felicia; ang tingin ay lumampas nang makita ang paglapit ni Mr. Valencia at ang anak. Binati ni Felicia ang ginoo at ang anak nito, at habang nagkakamustahan ay saka naman lumapit ang limang taong gulang na si Genesis at kumunyapit sa ina.

            "Ma, let's go home. I'm sleepy."

            Nalipat ang tingin ng mag-asawang Valencia sa batang lalaki na naka-pajama lang at puting sando. May hawak itong candy jar sa isang kamay at nakatingala sa ina.

            "Oh, kasama mo pala ang isa sa mga anak ninyo, Mrs. Zodiac?" tanong ni Mrs. Valencia.

            Nakangiting tumango si Felicia. "Kasama ko ang dalawa kong anak ngayon. Each time I come here, two of my sons would come along. Naka-schedule ang araw na kasama ko sila para hindi mag-agawan." Felicia chuckled and looked at her son. "Where is your Kuya Tau?"

            "He went looking for his favorite snack. He said he'll meet us at the counter." Itinaas ni Gene ang hawak na candy jar. "Can you buy this for me, Ma?"