Unicode
စကားပြောနေစဉ်တစ်လျှောက်လုံး ရှဲ့လင်မျက်လုံးတို့က ချီချင်းလက်မှ လုံးဝမခွာ။
လက်သုတ်ပြီးသော်လဲ ဘေးမှလူ စိုက်ကြည့်နေသည်ကို ချီချင်းခံစားနေရသောကြောင့် လက်ကောက်ဝတ်မှ လက်ချောင်းထိပ်လေးများအထိ အထပ်ထပ် ပွတ်တိုက်နေရာ ဒဏ်ရာရှိသော လက်ချောင်းထိပ်သို့ ရောက်မှပင် ရပ်သွားလေတော့သည်။
ချီချင်း၏ အေးစက်စက်အသံ ထွက်ပေါ်လာသည်။
" ခင်ဗျား ကြည့်လို့ဝပြီလား"ရှဲ့လင်က ခဏကြာအောင် စဉ်းစားပြီးမှ ပြန်ဖြေသည်။
" မဝသေးဘူးလို့ ဖြေရင် ကိုယ့်ကို နည်းနည်းလောက် ပေးကြည့်ဦးမှာလား"ချီချင်း : "..."
ချီချင်း : " ဒေါက်တာဝူက ခင်ဗျားကိုသေချာမပြောလိုက်ဘူးပဲ"
ရှဲ့လင် : " ဘာကိုလဲ"
ချီချင်း : " ခင်ဗျား ရောဂါ တော်တော်လေး ပြင်းထန်တယ်ဆိုတာကို"
နားနေခန်းထဲ ဘာတွေဖြစ်နေသည်ကို သေချာမသိသော စာရေးမှာ ခပ်လှမ်းလှမ်းမှ လှမ်းအော်လိုက်သည်။
" လူကြီးမင်းချီ.. ဝင်လို့ရပါပြီရှင့်"ရေရွှဲနေသော လက်အိတ်ကို ဆုပ်ကိုင်၍ ချီချင်း မတ်တပ်ထရပ်လိုက်သည်။ ထိုသူနှင့် စကားတစ်ခွန်းပင် ဆက်မပြောချင်တော့။
ရှဲ့လင်ကတော့ အပြုံးမပျက်။ ရှည်လျားသော အနက်ရောင် ကုတ်အင်္ကျီနှင့် စတိုင်ပင်ကို ဝတ်ထားရင်း သက်တောင့်သက်သာပင် ဆိုဖာပေါ် ထိုင်နေသည်။ ချီချင်းလက်ကို စိုက်ကြည့်နေရာမှ အကြည့်လွှဲကာ လက်သူကြွယ်မှ ငွေရောင်လက်စွပ်ပါးပါးလေးကို နှစ်ကြိမ်တိတိ လှည့်လိုက်သည်။ စောစောကပြောလိုက်သော သူ့စကားက သိပ်မထိရောက်ဘူးဟု ခံစားလိုက်ရ၍ နောက်တစ်ခွန်းထပ်ပြောလိုက်သေးသည်။
" နောက်တစ်ခေါက် ဓားကိုင်ရင် သတိထားနော်... မင်းရဲ့လက်လေးတွေ တအားလှတာ.. နောက်ထပ် ဓားမထိစေနဲ့ဦး""..."
........
တံခါးဖွင့်၍ ဝင်လာသည့်အချိန်မှစ၍ သူ့လူနာ ဒီနေ့ စိတ်တိုနေပုံရသည်ကို ဒေါက်တာဝူ သတိထားမိနေသည်။
" ဒီနေ့ တစ်ခုခု ဖြစ်ခဲ့လို့လား.. ခင်ဗျားကြည့်ရတာ စိတ်တိုနေတဲ့ပုံပဲ"
YOU ARE READING
အန္တရာယ်ရှိသော စရိုက် - ဘာသာပြန်
Mystery / ThrillerTitle - Dangerous Personality Author - Mu Gua Huang MC- Xie Lin x Chi Qing Chapter 161 + 2 extras ထူးဆန်းသည့် ပြန်ပေးဆွဲမှုတစ်ခုအပြီးတွင် ချီချင်းတစ်ယောက် မမျှော်လင့်ပဲ တစ်ပါးသူစိတ်ကို ဖတ်နိုင်သည့် စွမ်းရည်တစ်ခုကို ရရှိခဲ့သည်။ ထိုအချိန်မှစ၍ သူ့ပုံစံ...