အန္တရာယ်ရှိသော စရိုက် - ဘာသာပြန်

Chapter 66- မျက်နှာ

Unicode

မျှော်လင့်ထားသည့်အတိုင်း ယင်းဝမ်ရူမှာ သံသယတရားခံတစ်ဦးသာဖြစ်၏။ တိကျသော သက်သေအထောက်အထားမရှိပဲနှင့်တော့ အကြာကြီး ထိန်းသိမ်းထား၍မရနိုင်။

နောက်ထပ်စစ်မေးခန်းထဲမှ မန်နေဂျာဖြစ်သူက အသေအချာပြင်ဆင်လာပုံရသည်။
" ကျွန်မတို့ကို ဒီလိုခေါ်ထားလို့ မရဘူးလေ..ကျွန်မတို့ ပြောသင့်တာ အကုန်ပြောပြီးပြီ.. ရှင်တို့မှာလဲ သက်သေမရှိဘူး"

" ကျန်းဖုန်းကို သတ်တဲ့သက်သေတော့ မရှိဘူးပေါ့"
တစ်ဖက်မှ မှုခင်းရဲအရာရှိတစ်ယောက်က ဒေါသထွက်ထွက်နှင့် ဆက်ပြောသည်။
" ဒါပေမဲ့ ခွဲစိတ်မှုကို တိတ်တဆိတ်နာမည်ပြောင်းတဲ့ ပြဿနာတော့ ရှိနေတယ်.. ခင်ဗျားတို့ကို ပြန်ခွင့်မပေးနိုင်ပါဘူး"

မန်နေဂျာ : "..."

တစ်ဖက်ခန်းတွင်တော့

ယင်းဝမ်ရူမှာ စစ်မေးခန်းထဲ တစ်ယောက်ထဲ ထိုင်၍ လက်နှစ်ဖက်ယှက်ထားသဖြင့် လက်သည်းများက အသားထဲ စိုက်ဝင်လုနီးပါးဖြစ်နေသည်။

အခန်းထဲ သူမမှလွဲ၍ တခြားသူမရှိသော်လဲ သူမအသံကို ကြားနိုင်ကြကြောင်း သိသည့်အတွက် ပြောလိုက်သည်။
" ကျန်းဖုန်း တိုက်ပေါ်က ပြုတ်ကျသေရတဲ့အကြောင်းရင်းကို ကျွန်မမသိပေမဲ့ ရှင်တို့စုံစမ်းရေးကို ကျွန်မ သေသေချာချာ ပူးပေါင်းပါဝင်မှာပါ... ကျွန်မရဲ့ ကိုယ်ဝန်အကြောင်းကိုတော့ မပြောလို့မရဘူးလား.. ကျေးဇူးပြုပြီး ဒါတစ်ခုကိုတော့ မဖော်ပြကြပါနဲ့"

သူမစကားများကြောင့် ဝူကျီပင်း သက်ပြင်းချမိသည်။ အနုပညာအသိုင်းအဝိုင်းအကြောင်း သူ သိပ်မသိ။
" ဘာလို့လဲ.. သူ့သွေးသူ့သားပဲ မဟုတ်ဘူးလား"

စစ်မေးပြီးနောက် ယင်းဝမ်ရူ၏ အမှုကို တခြားမှုခင်းရဲတပ်ဖွဲ့ကို လွှဲပြောင်းပေးလိုက်သည်။ ထို့နောက် ဝူကျီပင်းက ရှဲ့လင်ကို သေချာကြည့်သည်။
" မင်း အဲ့ဆရာဝန်ကို ဘယ်လိုစည်းရုံးလိုက်တာလဲ..‌ လာဘ်ယူပြီး တရားမဝင်ခွဲစိတ်မှုကို ဘယ်လိုလုပ်ဝန်ခံတာလဲ.. သူ ထောင်ထဲဝင်ရမှာ မသိဘူးလား"

ရှဲ့လင် : "အရမ်းအံ့ဩစရာမရှိပါဘူး.. ယင်းဝမ်ရူဆီကနေလဲ သူ ငွေလက်ခံထားသလိုပေါ့"