အန္တရာယ်ရှိသော စရိုက် - ဘာသာပြန်

Chapter 58- အရူးတစ်ယောက်နဲ့ တွေ့ခဲ့တယ်

Unicode

" ပါပါရာဇီ" တစ်ယောက်ကို ခန့်မှန်းရန် သိပ်မခက်။ ချီချင်းကဲ့သို့ အနုပညာလောကထဲကို ခြေလှမ်းတစ်ဝက်သာ ဝင်ရသေးသူပင် ပါပါရာဇီတစ်ယောက်၏ အပြောအဆို အလုပ်အကိုင်ကို ချက်ချင်းတန်းသိသည်။

သို့သော် ဗီလိန်နေရာများတွင်သာ တစ်ခန်းနှစ်ခန်းပါဖူးသော သူ့ကို လမ်းမပေါ် လျှောက်သွားနေရင်တောင် ဘယ်ပါပါရာဇီမှ လှည့်ကြည့်မည်မဟုတ်။

ရဲစခန်းထဲ ယောက်ျားတစ်ဦးနှင့် လက်ချင်းတွဲ၍ ထိုင်နေရင်တောင်မှ အဖက်လုပ်မည်မဟုတ်။

စောစောကလူတွင် ရန်သူများသည်ဆိုသောကြောင့် အလုပ်လုပ်ရာတွင် တော်သူ ဖြစ်နိုင်သည်။ ထိုသူ့ကို အနုပညာအသိုင်းအဝိုင်းမှ လူတိုင်း သတ်ချင်နေကြသော်လဲ ချီချင်းကိုတော့ သိပုံပင်မရ။

ထိုသူက ဆက်ပြောသည်။
" အစတုန်းကတော့ ကျုပ် မနေ့ညထဲက ရဲစခန်းကို ဖုန်းဆက်မလို့ပဲ..  ဒါပေမဲ့ သေချာစဉ်းစားပြီးတော့ မဆက်ဖို့ ဆုံးဖြတ်ခဲ့တယ်.. ဒီအတိုင်းပဲ ကျုပ်ကို သတိပေးချင်ရုံသက်သက်ထင်လို့ အကြီးအကျယ်ဖြစ်သွားရင် ဘယ်သူ့အတွက်မှ မကောင်းနိုင်တာနဲ့.... ဒါပေမဲ့ မနက်က ‌ဈေးဆိုင်သွားပြီး ပြန်လာတော့ အပေါ်ထပ်ကနေ ပန်းအိုးတစ်လုံး ပြုတ်ကျလာတယ်"

" ပြုတ်ကျလာတာ မမြင်လိုက်ဘူး ဒါပေမဲ့ ကံကောင်းလို့ ဖိနပ်ကြိုးပြေနေတာ ခြေတစ်လှမ်းဆုတ်ပြီး ပြန်ချည်မိခဲ့တာ.. မဟုတ်ရင် ခေါင်းပေါ် တည့်တည့်ပဲ"

ကျိမင်ရွေ့ : " ဒါက တကယ် သေမင်းတမန် ဇာတ်ကားထဲကအတိုင်းပဲ"

ပါပါရာဇီက မမှတ်မိသော်လဲ သူ့ကို တစ်ချက်ကြည့်လိုက်သော အကြည့်ကြောင့် ချီချင်း နေထိုင်ရခက်နေသည်။ ထို့ကြောင့် ရှဲ့လင်နှင့် လက်တွဲထားရာမှ လက်ကို အင်္ကျီလက်အောက် ဝှက်ကာ လက်ချောင်းထိပ်ဖျားလေးများကိုသာ ဖော်ထားသောကြောင့် ရုတ်တရက် ကြည့်ပါက မမြင်နိုင်ပေ။

ရှဲ့လင်လက်ဖဝါးနွေးနွေးလေးကို သူ့လက်ချောင်းအဖျားလေးများနှင့် လျှို့ဝှက်စွာ တွဲထားလေသည်။

ထို့နောက် မမျှော်လင့်ပဲ အင်္ကျီလက်အောက်ထဲသို့ တစ်စုံတစ်ခု တိုးဝင်လာသည်။