ကံကြမ္မာဖျက်ဆီးခြင်း ဧကရာဇ်၏ ခရီးလမ်း စာစဉ် (၃၃)
မူရင်းရေးသားသူ - lazySageDao
ဘာသာပြန်သူ - Fortuna(ကြည်ဖြူ) (ရိုးရာ)
အခန်း (၄၆၂) : အကြိမ်များစွာ
ဝမ်ဝေ့က အလယ်ပိုင်းကုန်းမြေရှိ ရွာငယ်လေးဆီ ပြန်ရောက်လာသည်။ သူက လေထဲတွင် မြောလွင့်နေရင်း အစိမ်းရောင်ဆံပင်ရှိသည့် မိန်းမလှတစ်ဦးအား ကြည့်နေလေ၏။ ကောင်းကင်မှ အလင်းပျောက်မြောက်များစွာက သူမ ခန္ဓာကိုယ်တွင်း ဝင်ရောက်သွားသည်။
မိနစ်ပိုင်းကြာမြင့်ပြီးသည့်နောက်တွင် သူမနှင့်တူသည့် ကိုယ်ပွားတစ်ခုက ပေါ်ထွက်လာ၏။ ထိုကိုယ်ပွားတွင် ဆံပင်အနက်ရောင် ရှိလေသည်။
ထိုကိုယ်ပွား ပေါ်ထွက်လာသည်နှင့် သူမက ရွာငယ်လေးအတွင်း မဝင်ရောက်ခင် သူမ၏ မျက်နှာကို သာမန်ပုံစံအမျိုးသမီးအဖြစ် ပြောင်းလိုက်၏။
သူမရဲ့ ကျမ်းက ငါ့လက်ရှိပြဿနာကို ကူညီပေးနိုင်လောက်တယ် ...
ထို့နောက် ဝမ်ဝေ့၏ စိတ်ထဲတွင် အနာဂတ် ပုံရိပ်တစ်ခု ပေါ်ထွက်လာသည်။ သူက စုယာနှင့် အလဲအလှယ်လုပ်ဖို့ ကြိုးစားသော်လည်း သူမက ငြင်းပယ်ခဲ့သည်။ နောက်ဆုံးတွင် သူတို့က တိုက်ခိုက်ခဲ့၏။ ဝမ်ဝေ့က နောက်ထပ် အနာဂတ်ကို မြင်ရဖို့ အချိန်စွမ်းအားကို ထိန်းချုပ်လိုက်သည်။
သူက သူမအား ခိုးကြောင်ခိုးဝှက်တိုက်ကာ သူမ၏ မှတ်ဉာဏ်များကို ဖတ်ရှုဖို့ ကြိုးစားရင်း သူမ၏ ဝိညာဉ်မှ သူ အလိုရှိသည့်အရာကို ရယူဖို့ ကြိုးစားနေစဉ် သူမက သူမဘာသာသူမ ဖောက်ခွဲပစ်ခဲ့သည်။
ထို့ကြောင့် သူက တတိယမြောက် အနာဂတ်ကို စတင်သုံးသပ်လိုက်သည်။ ကံဆိုးစွာဖြင့် သူ မစတင်ခင် ကြည်လင်ပြတ်သားသည့် အသံတစ်သံကို ကြားလိုက်ရ၏။
" ရှင် ဒီမှာ ရှိတာသိတယ်။ ထွက်ခဲ့"
ဝမ်ဝေ့က ခေတ္တမျှ တုံ့ဆိုင်းသွားပြီး သူမက မည်သို့အာရုံခံမိကြောင်း စဉ်းစားနေသည်။ သူက ဘေးပတ်လည်ကို ကြည့်ကာ သူမက တခြားတစ်ယောက်ကို ပြောနေတာလားဟု စစ်ဆေးကြည့်လိုက်သော်လည်း သူ့အာရုံတွင် မည်သည်မှ မခံစားမိပေ။
